JOB 8 - Hakcipta - Biatah Bidayuh

Bildad

^1-2 Gibayuh kah kuu ko minyu nang au-tarun?

³ Tapa bŭn pirusak pinyitŭnggŭn; Ayŭh bŭn re dŭh ndai kayuh adi batur.

⁴ Anak anak mu tatu agi bidosa rawan Tapa, ngapŭi Ayŭh ngukum ngara nimun adi patut ngara trima.

⁵ Jiroh Tapa Bisa-pŭrŭg, ka mite Ayŭh masi di kuu;

⁶ kambŭi kuu sawŭ batur buang jujur, Tapa re mandŭg di turung kuu ka ramin arŭn mu Ayŭh re pari ka kuu ndu upah.

⁷ Sopŭrŭg pinyikaya mu adi manyap re au-tarun danding ngga kayuh adi Tapa re nggen di kuu.

⁸ Tayung-babuk ta bijak, ngapŭi birajar so ngara.

⁹ Pimudip ta purok, ata dŭh puan ani ani; tipuh ta di ong mbŭh keya ka singangi.

¹⁰ Pak bada tayung-babuk adi bijak ngajar kuu; dingah kayuh adi ngara nang:

¹¹ “Tŭngŭn reed dŭh dapŭd timbu di tarun yŭn adi mating piin; bŭn-i dog dapŭd di sapa tana padak.

¹² Kambŭi piin badŭh, diŭ-i rayu so anak anak kayuh-udip adi bŭkŭn, darŭm-i gibabŭ sŭ ka dŭh bisa dog ndu yŭn pakai.

¹³ Daya adi dŭh puan Tapa inŭh keya ka tŭngŭn reed; pingarap ngara mating tia kan Tapa dog kambŭt.

¹⁴ Ngara bisangan di kayuh adi gayo mun sarin taka.

¹⁵ Kambŭi ngara minyandis di sarin taka, tungang kah-i nan ngara? Kambŭi ngara bidawed di sirah tiburi, tungang kah-i turung ngara mijog?”

¹⁶ Daya adi ginaka timbu mun uduh di sura, mun uduh adi ngukap di ndi tarun tana teya.

¹⁷ Uat-i marut dudu batuh ka rakat di barang batuh.

¹⁸ Pak ripas-i dog dimbut mating daya puan uduh ko timbu diginŭ.

¹⁹ Sawŭ, anŭ adŭ kayuh adi daya adi ginaka angan; adi bŭkŭn mandŭg ka tambit arok ngara.

²⁰ Pak Tapa dŭh re tagan daya adi tŭtŭd, Ayŭh bŭn turung daya adi arap.

²¹ Ayŭh re bada kuu tawŭh ka nyirais dinge,

²² pak Ayŭh re pimangŭh ngara adi tiru di kuu, ka ramin arŭn daya adi ginaka re mating tia.