JOB 7 - Hakcipta - Biatah Bidayuh

¹ Pimudip manusia inŭh keya ka kraja-takan soldadu, keya ka pimudip jera kraja-bakar,

² keya ka urun natis sayung adi madŭd; keya ka daya adi nyiraja kajŭn gaji ngara.

³ Biburan buran udip ku dŭh biguna; barang ngarŭm aku susah.

⁴ Kan aku guring re bŭŭs, ngarŭm nyam adi raru tui; aku guring gurai marik adŭp ku ndi ngarŭm ngarŭm ka kajŭn andu jawa.

⁵ Pŭrŭng ganan ku puno bada ŭrŭd; ka-i raput bada tŭbŭ; ka-i bijire bada pinana.

⁶ Tipuh ku rikas mungan ngga mating tia pingarap, rikas dŭ so utos tanun taban tiburi.

⁷ Ingat, O Tapa, udip ku inŭh abus asŭng adŭ; pinyigaŭn ku mbŭh mungan.

⁸ Kaam kiris aku madin, pak re dŭh tia. Kambŭi Kaam jiroh aku, aku re mating tia.

^9-10 Mun abun adi miyap ka mbŭh mating, daya kabŭs ka dŭh re pari; ngara dog kambŭt sopŭrŭg daya adi puan ngara.

¹¹ Dŭh! Aku dŭh dapŭd pirŭŭ adŭp ku! Aku baji ka atin mandam ku dŭh aku re tungang nyijŭn. Aku dŭh siŭn dŭh minyu.

¹² Mani Kaam kurung aku? Kaam pikir aku ati dāng-bās rawŭt? kah?

¹³ Aku guring ka suba rŭŭ so kawŭk ku; aku jiroh pinyaduh yŭn andam ku.

¹⁴ Pak Kaam pitaru aku ngga pŭmŭh; Kaam bada aku kiris kayuh adi bada aku tikaran

¹⁵ ndŭg ka aku mbŭh raan dŭ dog nyiap so aku udip darŭm pŭrŭng adi sangsara ati.

¹⁶ Aku mbŭh reju; aku mbŭh kawŭk udip. Tandah aku sadi. Pimudip ku mbŭh dŭh tia biyŭn rati.

¹⁷ Mani Kaam mbit bat di manusia? Mani Kaam pirati kayuh adi ngara ndai?

¹⁸ Kaam pirasa ngara barang isan ka suba ngara barang jam darŭm ndi andu.

¹⁹ Abah kah Kaam kimat tarun bŭkŭn isa aku sipŭt tŭrŭn ruja ku?

²⁰ Kinaman kah Kaam bada dosa ku, Kaam adi kurung aku? Mani Kaam pari pari mukong aku? Agi kah aku ati tanuh adi raru bat di Kaam?

²¹ Dŭh kah Kaam dapŭd apun dosa ku? Dŭh kah Kaam dapŭd kambŭt sarah ku? Dŭm dŭh tui aku re di darŭm kubur ku, ka aku re mating kan Kaam jiroh aku.