JOB 6 - Hakcipta - Biatah Bidayuh

Job

^1-2 Kambŭi pinyusah ku dog nimbang bat-i,

³ tatu-i bat dŭ so sumat di rawŭt, ngapŭi aku minyu ngga dŭh bipikir diŭ.

⁴ Tapa Bisa-pŭrŭg mbŭh tabŭk aku ngga reja-panah, ka rasun-i mbŭh ngukap darŭm pŭrŭng ku. Tapa nyerang aku, ka aku mbŭh raru taru.

⁵ Kaldi munos asŭng-i kan-i man kupai, ka sapi pajam kan-i man kupai pisŭk.

⁶ Pak asi raan man pinguman adi dŭh dog na garo dieh? Ani sap buda-turoh?

⁷ Mating pinyiraan ku di pinguman adi mun anŭ, ka sopŭrŭg kayuh adi aku man bada aku nguta.

⁸ Mani Tapa abah nggen kayuh adi aku mite? Mani Ayŭh abah nam dua ku?

⁹ Pati ka Ayŭh siŭ adŭ aku, simudan-i!

¹⁰ Kambŭi aku puan Ayŭh raan, aku minanjon angan, sunggu-i aku raru mandam. Aku puan Tapa inŭh kudus; aku bŭn matah pinyipesan-I.

¹¹ Ani pinyibake re ku ngga gibabŭ udip? re ngga mani aku gibabŭ an udip kambŭi pingarap ku mating?

¹² Aku dog ndai so batuh kah? Pŭrŭng ku timaga kah?

¹³ Mating pinyibake ku dŭm ngga nyiramat adŭp ku; mating tia yŭn aku mite turung.

¹⁴ Di tika pinyusah mun ati aku biguna di jerā adi tŭtŭd, bait aku tagan Tapa puan kah dŭh.

¹⁵ Pak angān, adi jerā ku, dŭh dapŭd dog sabah, keya ka anak sungi adi badŭh kan ujen mating rabu.

¹⁶ Anak sungi mbŭh bitabat bada salju ngga piin-maku,

¹⁷ pak di tika paras ngara miyap, ka rasan sungi badŭh ka mating kayuh dieh.

¹⁸ Bara pinunggang onta manyap jiroh piin; ngara bigandon ka kabŭs di tarun tana-pajam.

¹⁹ Bara pinunggang onta so Sheba ngga Tema jiroh piin,

²⁰ pak ngara asa, sabab ngara muko ruai sabah adŭp-i re dapŭd.

²¹ Di aku angān keya kaanak sungi, angān taru kan angān kiris pinyusah ku.

²² Mbŭh kah aku mite pinganggen so angān, puan kah nyuap daya ngga ngarun aku,

²³ puan kah nyiramat aku so pinganyu bait so ngara adi gaok ginaka?

²⁴ Ngajar garang aku; kidaan di aku sarah ku. Aku bisa pajam ka dingah.

²⁵ Pinganang adi so atin adi batur bisa dog sabah, pak angān minyu kayuh adi sipadin.

²⁶ Angān pikir aku minyu au-tarun; ka mani meh angān nam pinganang susah ku?

²⁷ Ndŭg ka angān taran dadu ngga dapŭd anak tumang jadi urun ngan ka jua jerā ngan ngga dapŭd pinyikaya!

²⁸ Tingga jawin ku. Aku dŭh kadong angān.

²⁹ Pinganang ngan paŭh mbŭh dŭh patut. Dŭh tia mun anŭ. Dŭhnyah nyarah aku. Aku dŭh sarah.

³⁰ Pak angān babŭ pikir aku kadong, ka dŭh natŭng kayuh adi batur ngga adi sarah.