JOB 36 - Hakcipta - Biatah Bidayuh

^1-2 Sabar ka dingah dawŭ-i kayuh adi aku nang ngga ngarun Tapa.

³ Pinyipuan ku tŭrŭp; aku re pakai kayuh adi aku puan ngga kiren Tapa adi pinapa ku tŭnggŭn.

⁴ Mating kayuh adi aku nang dŭh sawŭ; di sirung jawin mu inŭh daya adi bijak.

⁵ Munki masam bake inŭh Tapa! Ayŭh dŭh ngamun daya; mating kayuh adi dŭh-I mirati.

⁶ Ayŭh dŭh bada daya adi bidosa adu adu udip, ka Ayŭh ari bada daya sirata dapŭd pinyitŭnggŭn.

⁷ Ayŭh grindung ngara adi tŭnggŭn; Ayŭh nyibandar ngara mritah mun raja ka tandah ngara adu adu dog stabi.

⁸ Pak kambŭi daya dog muak ngga parik basi, sangsara amai kayuh adi ngara mbŭh ndai,

⁹ Tapa kiren di ngara dosa ngara ngga atin gambung ngara.

¹⁰ Ayŭh bada ngara dingah pinyibakan-I ka dŭh tia bidosa pak pari ka adŭp-I.

¹¹ Kambŭi ngara dingah pinganang Tapa ka bituan di Ayŭh, ngara re udip darŭm damai buang mujur sitŭkŭd umbur ngara.

¹² Pak kambŭi dŭh, ngara re kabŭs darŭm bawa ngara ka mutas sungi mŭrŭt ong daya adi mbŭh kabŭs.

¹³ Ngara adi dŭh puan Tapa nyikŭn atin baji, ndŭg ka di tika dog ukum, ngara dŭh bidua mite turung.

¹⁴ Ngara kabŭs darŭm ngara babŭ mara, amai pimudip ngara puno ngga pingandai kais.

¹⁵ Pak Tapa ngajar daya ngga udip sangsara ka pakai pinyusah ngga kuka batŭh ngara.

¹⁶ Tapa pirupas kuu so pinyusah, ka bada kuu udip darŭm damai; pinguman bitugung di tunduh mija mu.

¹⁷ Pak madin kuu dog ukum nanyam patut ku trima.

¹⁸ Bijaga ka dŭhnyah bada suap nipu kuu, puan kah pinyikaya kinanyap kuu.

¹⁹ Mating guna kuu bagan mite turung; sopŭrŭg pinyibake mu dŭh dapŭd turung kuu madin.

²⁰ Dŭhnyah natis andu adi raru karŭm, tika adi ngga bangsa bangsa rarap.

²¹ Bijaga ka dŭhnyah bigiring ka pingandai arap; sangsara mu inŭh ngga pijo kuu so kayuh adi mun anŭ.

²² Ingat munki masam bās inŭh kuasa Tapa; Ayŭh inŭh gurū adi siabo bās.

²³ Mating daya dapŭd mritah Tapa ndai kayuh puan kah nyarah ayŭh nang ndai pingandai arap.

²⁴ Ayŭh ari dog muji amai kayuh adi ndai-I; kuu gŭh dŭh siŭn dŭh muji Ayŭh.

²⁵ Barang naan daya mbŭh kiris kayuh adi-I mbŭh ndai; pak ata batur dapŭd tingga so jo.

²⁶ Ata dŭh dapŭd puan bās-I ngga sipuno-i puan kah mirang kiang sawa-I.

²⁷ Tapa inŭh adi tambit piin so ong ka bada-i jadi sirah ujen.

²⁸ Ayŭh bada piin rabu so abun jadi ujen yŭn sopŭrŭg manusia.

²⁹ Mating daya puan munki abun panu puan kah munki dudū jawŭn so rangit, di yŭn Tapa rŭŭ.

³⁰ Ayŭh pijawa rangit ngga kijat, pak rasan rawŭt babŭ karŭm patŭ'.

³¹ Simŭnŭ inŭh Ayŭh paan manusia ka nggen raru bagŭ pinguman.

³² Ayŭh nakap kijat ngga tangan-I ka mritah-i bada nyatŭk kayuh adi dog nŭtŭn.

³³ Dudū kidaan sabak ribut mbŭh sindŭk, ka bara sapi puan-i mbŭh mandŭg.