JOB 3 - Hakcipta - Biatah Bidayuh

Job Ngadu ka Tapa

¹ Pinŭbŭn-i Job piguru minyu ka mangu andu adi ngga-i dog biranak.

Job

^2-3 O Tapa, mangu andu adi ngga aku dog biranak; mangu ngarŭm adi ngga aku piguru darŭm ite sindŭ ku!

⁴ Tapa, bada andu anŭ marui jadi karŭm. Dŭh tia ingat andu anŭ; dŭh tia bada jawa nyekar-i.

⁵ Bada-i jadi andu adi nyabūk ka karŭm patŭ'; nutu-i ngga abun, ka kadi jawa so batŭh andu.

⁶ Kadi ngarŭm anŭ so darŭm sawa ka dŭhnyah bada-i tia dog mirang;

⁷ bada-i pajam muog, ngga mating pinyirami.

⁸ Kidaan di bara nyamba-biruri bada mangu andu anŭ, ngara adi pandai kies Leviathan.

⁹ Dŭhnyah bada bitang isan isan nyekar; dŭhnyah bada ngarŭm anŭ kiris jawa.

¹⁰ Mangu ngarŭm anŭ amai-i bada aku dog biranak, amai-i bada aku dog pinyusah ka sangsara.

¹¹ Kasi ka aku kabŭs darŭm ite sindŭ ku bait pati ka dŭh dog biranak.

¹² Mani aku dog dakŭp sindŭ ku ka dog kŭkŭn-i? Mani ayŭh nyisuh aku di sudo-i?

¹³ Kambŭi aku kabŭs nganŭ, aku pati ka mbŭh rŭŭ-paya madin,

¹⁴ bŭŭs mun raja ka pimritah adi pari pijog istana jah.

¹⁵ Komŭnŭ aku bisa bŭŭs mun bara anak raja adi ngisi ramin ngara ngga mas ka pirak,

¹⁶ puan kah bŭŭs mun tadang anak pira adi mbŭh kabŭs sibayuh dog ruwan.

¹⁷ Darŭm kubur, daya ginaka dŭh ndai arap, ka daya adi kawŭk nyiraja, dapŭd rŭŭ so kraja.

¹⁸ Sirabi ka daya-takap kinyam damai, dŭh dog nyungak ka dŭh dog takan ndai kraja.

¹⁹ Sopŭrŭg agi diginŭ, adi timagah ngga adi dŭh timagah, ka daya urun dŭh tia dog nguasa tuan ngara.

²⁰ Mani tandah manusia udip darŭm sangsara? Mani nggen jawa di ngara adi susah?

²¹ Ngara kajŭn adŭp-i kabŭs, pak babŭ dŭh; ngara raan dŭ rubang kubur so tadŭ tadŭ rata.

²² Ngara dŭh sanang ndŭg ka ngara mbŭh kabŭs ka dog kubur;

²³ Tapa bada ngara dŭh puan ani re jadi di ngara jŭ, ka nyikapung ngara di barang parad.

²⁴ Puās mandŭg ka aku, dŭh-i pinguman, ka aku dŭh dapŭd ko nyidaing.

²⁵ Sopŭrŭg kayuh adi aku taru mbŭh dog aku.

²⁶ Aku dŭh kinyam damai, ka mating rŭŭ-paya, ka pinyusah ku dŭh bisa ko.