JOB 23 - Hakcipta - Biatah Bidayuh

Job

^1-2 Aku babŭ birawan ka matah Tapa; aku dŭh tungang nyijŭn sidaing ku.

³ Kasi ka aku puan tarun yŭn dapŭd Ayŭh, ka bisa di ka yŭn-I.

⁴ Aku bisa kidaan har ku di Ayŭh ka minyu nyibandar adŭp ku.

⁵ Aku raan puan ani re-I nang ka simuki Ayŭh nam aku.

⁶ Re Tapa pakai kah sopŭrŭg pinyibake-I ngga rawan aku? Dŭh, Ayŭh re dingah kan aku minyu.

⁷ Aku daya adi kana ka aku dapŭd minyu ngga Ayŭh pasar har ku; Ayŭh re kidaan aku dŭh sarah yŭn adu adu.

⁸ Aku agi jiroh di timor, pak Tapa mating diginŭ; aku mating dapŭd Ayŭh di andu aku jiroh Ayŭh di barat.

⁹ Tapa mbŭh ndai kraja-I di utara ka di siratan, pak babŭ gŭh aku dŭh kiris Ayŭh.

¹⁰ Pak Tapa puan kayuh adi ndai ku; kambŭi Ayŭh suba aku, Ayŭh re dapŭd aku bisig keya ka mas.

¹¹ Aku tunda ngga tŭtŭd aran adi-I mien, ka bŭn miriseu so aran adi muko-I natu.

¹² Aku ari ndai kayuh adi Tapa pesan; aku tunda pinyiraan-I, dŭh pinyiraan adŭp ku.

¹³ Ayŭh bŭn birubah. Mating daya dapŭd nyakar Ayŭh puan kah matŭn Ayŭh ndai kayuh adi raan-I ndai.

¹⁴ Ayŭh re pijadi kayuh adi mbŭh-I ngatur yŭn ku; kayuh anŭ inŭh ndi so dudu anŭ adi mbŭh-I ngatur;

¹⁵ Aku kimŭtŭr taru di sirung jawin-I.

^16-17 Tapa Bisa-pŭrŭg mbŭh ngarah atin pagan ku. Tapa inŭh, dŭh karŭm, adi bada aku taru; sunggu pinyikarŭm inŭh adi bada aku karak.