JOB 21 - Hakcipta - Biatah Bidayuh

Job

^1-2 Dingah kayuh adi aku nang; anŭ adŭ saduh adi aku mite so angān.

³ Nggen di aku pluang ngga minyu ka komŭnŭ, kambŭi angān raan, angān bisa nyirimbe aku.

⁴ Kaii ku dŭh-i ngga manusia; aku biyŭn sabab kambŭi aku dŭh sabar.

⁵ Tingga adŭ aku, mbŭh sadang ngga bada batŭh ngan biringgo ka gŭgŭh?

⁶ Kan aku bipikir pasar kayuh adi mbŭh jadi di aku, aku kimŭtŭr buang taru.

⁷ Mani Tapa tandah daya adi arap tui udip, tandah ngara udip mujur ndŭg minyamba?

⁸ Ngara biranak mira ka nyukuh, ngara dapŭd kiris anak ngara masang bās baga bigatung.

⁹ Tapa dŭh pait pinyirusag ka ramin arŭn ngara; ngara udip dŭh darŭm taru.

¹⁰ Sawŭ, sopŭrŭg sapi ngara papah ka dŭh susah biranak.

¹¹ Anak ngara bikaduh ka birubi mun anak biri

¹² ka bitanda tunda jawŭn kachapi ngga tirari.

¹³ Ngara udip ngga pimudip adi mujur ka kabŭs dŭh ngga sangsara.

¹⁴ Daya ginaka bada Tapa pijo adŭp-I so ngara; ngara abah puan pinyiraan-I yŭn pimudip ngara.

¹⁵ Ngara nang mating guna-i bituan di Tapa mating utung-i nŭŭh bidua ka Ayŭh.

¹⁶ Ngara nang ngara tungang gŭh dapŭd kayuh so pinyibake adŭp ngara, pak pikir-kira ngara adi sakanŭ aku dŭh trima.

¹⁷ Mbŭh kah jawa daya adi ginaka dog mura? Agi kah ngara dog nyatŭk pinyirusag? Mbŭh kah Tapa baji ngga daya ginaka ka ngukum ngara

¹⁸ ka poh ngara keya ka siriyang dog poh sabah, puan kah keya ka dabu dog poh sabak ribut?

¹⁹ Angān nang Tapa ngukum anak amai dosa sama-i. Dŭh! Isa Tapa ngukum daya adi bidosa; isa Ayŭh bada ngara rada Ayŭh ndai simŭnŭ sabab dosa ngara.

²⁰ Daya bidosa patut trima ukum ngara; ngara patut kinyam baji Tapa Bisa-pŭrŭg.

²¹ Kan ata kabŭs, babŭ kah ata piduri sanang kah dŭh rawang ta?

²² Dapŭd kah manusia ngajar Tapa, adi tingga arap kana daya samŭn ngara adi di yŭn adi siabo bigatung?

^23-24 Agi daya adi babŭ gures bake ndŭg andu adi ngga-i kabŭs; pinyikabŭs ngara sanang, pŭrŭng ganan ngara ramus pidanah.

²⁵ Adi bŭkŭn taŭn dŭh adŭ sanang udip; ngara udip ka kabŭs ngga atin adi majot.

²⁶ Pak sopŭrŭg manusia kabŭs ka dog kubur; sopŭrŭg dog man ŭrŭd.

²⁷ Aku puan pikir-kira arap ngan.

²⁸ Angān siken, “Diki ramin daya adi bās madin, ngara adi ndai pingandai arap?”

²⁹ Mbŭh kah angān minyu ngga daya adi bigandon? Puan ngan kah pinyiripot adi ngara taban ngga mari?

³⁰ Di andu Tapa baji ka ngukum daya, sŭn daya nang daya adi ginaka inŭh adi ari dog murau.

³¹ Mating daya adi tukang nyarah daya adi ginaka puan kah adi maras ngara amai kayuh adi ngara mbŭh ndai.

³² Kan ngara dog tawek ka kubur, ka kubur adi nakit dog jaga,

³³ biribu ribu naan daya sua di nyikubur, ka tana gŭh nakit dog na di tunduh tadang ngara.

³⁴ Ka angān! Angān suba an nyaduh aku ngga pinganang au-tarun! Sopŭrŭg pinyinam ngan inŭh pinganang kadong!