JOB 15 - Hakcipta - Biatah Bidayuh

Kirakar adi Numbor Duwŭh 15.1—21.34 Eliphaz

^1-2 Pinganang au-tarun, Job! Pinganang au-tarun!

³ Mating daya bijak re minyu mun kuu puan kah nyibandar adŭp-i ngga pinganang adi dŭh biyŭn rati.

⁴ Kambŭi tunda ka gaya mu, mating meh daya re taru Tapa; mating daya raan bidua ka Ayŭh.

⁵ Udip ginaka mu mbŭh tatŭng so gaya kuu minyu; kuu pandai minyu ngga sukan arap mu.

⁶ Dŭhsah aku nyarah kuu; piminyu adŭp mu mbŭh nyarah kuu.

⁷ Kuu pikir adŭp mu sibungas manusia adi dog biranak kah? Agi kah kuu diginŭ di tika Tapa napa darŭd?

⁸ Agi kuu dingah atur adi Tapa ndai? Kuu sadi kah adi dapu pinyibijak manusia?

⁹ Mating kayuh adi kuu puan ka kieh dŭh puan.

¹⁰ Kieh birajar pinyibijak ami so ngara adi mbŭh buda ubok-i, ngara adi dog biranak diŭ so sama mu.

¹¹ Tapa nggen di kuu saduh; mani dŭh trima-i? Kieh mbŭh minyu yŭn-I ngga pinganang adi sabar ka adi duduh.

¹² Pak kuu nurut atin mu ka tirek kieh ngga baji.

¹³ Kuu baji di Tapa ka piruah pinganang adi sakanŭ rawan Ayŭh.

¹⁴ Dapŭd kah manusia jadi sawŭ bisig? Dapŭd kah manusia bamai ngga Tapa?

¹⁵ Ndŭg ka bara malaikat-I dŭh gŭh Tapa sabah; ngara dŭh gŭh bisig di sirung jawin-I.

¹⁶ Ka manusia nok arap keya ka nok piin adud; sawŭ, ngara mbŭh madam ka dŭh biguna.

¹⁷ Madin dingah, Job, kayuh adi aku puan.

¹⁸ Ngara adi bijak mbŭh ngajar pinyawŭ di aku adi ngara birajar so tayung-babuk ngara, ka mating rusia adi ngara sukan.

¹⁹ Di tika anŭ mating daya tami darŭm tarun tana ngara; mating daya re bada ngara tagan Tapa.

²⁰ Daya ginaka adi kinanyuh daya bŭkŭn re sangsara sitŭkŭd umbur ngara.

²¹ Ngara re dingah sirŭŭn adi pitaru, ka bara pirupak re nyerang ngara di tika ngara pikir adŭp-i siramat.

²² Ngara mbŭh dŭh biyŭn pingarap ngga pirupas adŭp-i so pinyikarŭm, amai pinyiŭ adi pakai pedang mbŭh kajŭn an siŭ ngara,

²³ ka manuk volcha mbŭh kajŭn an man tadang ngara. Ngara puan pimudip ngara jŭ inŭh karŭm;

²⁴ pinyirusag, mun raja adi bikuasa, mbŭh kajŭn an nyerang ngara.

²⁵ Simŭnŭ inŭh nasip ngara adi rawan Tapa ka natang Ayŭh adi Bisa-pŭrŭg.

^26-27 Ngara sambuh ka an birawan; ngga atin baking ngara pakat pinangin ngara ka matak di rawan Tapa.

²⁸ Ngara inŭh adi sirabut kupo kupo ka adi sirapas ramin ramin adi dog tingge, pak perang re nyirubuh kupo kupo ngga ramin ramin anŭ.

²⁹ Ngara dŭh re adu adu kaya; mating kayuh adi ngara dapu re tan tui. Ndŭg ka singangi ngara re miyap,

³⁰ ka ngara re dŭh tungang pirupas adŭp ngara so pinyikarŭm. Ngara re mun tŭngŭn kayuh adi dog man apui dudu daan-i, adi re dog poh sabak rarak-i.

³¹ Kambŭi ngara sabah di kayuh adi dŭh biguna, ngara re trima gŭh kayuh adi dŭh biguna.

³² Diŭ so tipuh-i ngara re rayu, rayu mun daan adi re dŭh tia barŭm.

³³ Ngara re mun tŭngŭn anggor adi manyap buwa-i adi gibayuh masak; mun tŭngŭn kanā adi rabu rarak-i.

³⁴ Re mating sesang bara daya adi dŭh puan Tapa, ka Tapa re nyirubuh ramin adi dog pijog ngga suap.

³⁵ Ngara inŭh adi ndai pinyusah ngga arap; atin ngara ari puno ngga tipu.