JOB 10 - Hakcipta - Biatah Bidayuh

¹ Aku mbŭh reju udip. Dingah kayuh adi bandar bandar aku ngadu.

² Dŭhnyah nyarah aku, O Tapa. Kidaan di aku ani sarah ku?

³ Patut kah Kaam gaok ngga aku? Ngamun kayuh adi adŭp Mai mbŭh ndai? Ka komŭnŭ angan atur kraja daya ginaka?

⁴ Mun piningga ami kah piningga Mai?

⁵ Pimudip Mai purok mun jami kah?

⁶ Komŭnŭ mani meh Kaam nudug sopŭrŭg dosa ku, ka nyuki barang masam sarah adi aku mbŭh ndai?

⁷ Kaam puan aku dŭh sarah, ka mating daya re nyiramat aku so Kaam.

⁸ Tangan Mai ndai aku, ka madin tangan anŭ pirabur aku.

⁹ Ingat adŭp Mai adi ndai aku so tana-riyat; Kaam re pirandŭk aku pari jadi dabu tana kah?

¹⁰ Kaam nggen di sama ku pinyibake ngga pijadi aku; Kaam pikambang aku darŭm ite sindŭ ku.

¹¹ Kaam pijadi pŭrŭng ku ngga turang ngga uat, ka marut turang ku ngga isin ngga kurit.

¹² Kaam mbŭh nggen di aku asŭng ka pinyirindu adi dŭh bisa birubah.

¹³ Pak madin aku puan nang so tika anŭ Kaam taŭn mbŭh bisukan bisatur an kandam aku.

¹⁴ Kaam taŭn mbŭh nyibatŭh aku kadŭ aku an ndai dosa, isa Kaam bisa abah apun aku.

¹⁵ Pasu aku ndai dosa, mbŭh payah inŭh aku, pak kan aku ndai kana, aku dŭh dapŭd puji. Aku mbŭh sangsara ka mbŭh raru mangŭh.

¹⁶ Kambŭi aku nak dapŭd mujur nisit, Kaam ngasū aku mun ngasū singah; Biar-i Kaam ndai pingandai-nginga ramŭn an bada aku kinaman.

¹⁷ Kaam ari biyŭn taksi ngga rawan aku; baji Mai di aku dŭ dŭ bitambah; Kaam dŭh ko ko nyerang aku.

¹⁸ Mani, Tapa, Kaam bada aku dog biranak? Aku patut mbŭh kabŭs diŭ so daya kiris aku.

¹⁹ Amai ruah so sarin ite radus di ka kubur taŭn mbŭh kana dŭ so nŭŭh udip.

²⁰ Dŭh kah pimudip ku mbŭh re mungan? Dŭhnyah mito aku tia! Tandah aku pimunos asŭng ku ngga tipuh adi dŭm ati.

²¹ Dŭm dŭh tui aku re bu ka aku dŭh re pari; di ka tarun yŭn adi karŭm buang nyabūk,

²² tarun tana adi karŭm, adi yŭn dudu singangi, tarun yŭn adi dŭh bituku biruru, di yŭn adŭp jawa inŭh adŭp karŭm.