JOB 1 - Hakcipta - Biatah Bidayuh

Shetan Suba Job

¹ Agi ndi naan daya dŭn Job, rŭŭ di tarun tana Uz, adi nyambah Tapa ka tŭtŭd di Ayŭh. Ayŭh daya adi kana, adi raru nakit ngga adŭp-i dŭh ndai kayuh arap.

² Ayŭh biyŭn ju anak dari ka taruh anak dayung,

³ ka biyŭn 7,000 biri, 3,000 onta, 1,000 sapi, ka 500 kaldi. Ayŭh gŭh biyŭn raru bagŭ daya-gaji ka ayŭh inŭh daya adi siabo kaya di timor.

⁴ Anak anak Job bikires ndai gawai man, ka sopŭrŭg adi bŭkŭn ari mandŭg, ka ngara ari bagan jurud dayung ngara adi taruh madis bada sua ngga ngara.

⁵ Isan isan ripas barang gawai, Job an makat awar ka jugan sadis yŭn barang naan anak-i ngga pibisig ngara. Ayŭh ari ndai simŭnŭ sabab di pikir-i kadŭ agi anak-i dŭh rada adŭp-i mbŭh bidosa nang pinganang sarah rawan Tapa.

⁶ Kan andu mbŭh mandŭg adi ngga bara malaikat tikuruk di sirung jawin TUHAN, Shetan agi sua di dupan ngara.

⁷ TUHAN siken ayŭh, “Ani mbŭh mu ndai?” Shetan nam, “Aku agi panu kamati kamanŭ, bidandong di ong.”

⁸ “Agi kuu kiris urun Ku Job?” TUHAN siken. “Mating daya di ong re tŭtŭd buang kana mun ayŭh. Ayŭh nyambah Aku ka mbŭh kingat adŭp-i dŭh ndai kayuh arap.”

⁹ Shetan nam, “An kah Job nyambah Kaam kambŭi ayŭh dŭh dapŭd ani ani so kraja sambah-i anŭ?

¹⁰ Kaam ari grindung ayŭh, rawang-i, ka sopŭrŭg kayuh adi ayŭh dapu. Kaam nyiberkat sopŭrŭg kayuh ndai-i, ka Kaam mbŭh nggen di ayŭh sukup sapi ngga ngisi ndi tarun tarun tana rais.

¹¹ Pak madin nyamtadar-i Kaam tambit sopŭrŭg kayuh adi-i dapu, ayŭh re bandar bandar mangu Kaam!”

¹² “Bisa,” TUHAN nang di Shetan, “sopŭrŭg kayuh adi-i biyŭn inŭh darŭm tangan mu, pak kuu dŭh siŭn kinaman adŭp Job.” Jadi Shetan ruah so yŭn TUHAN.

Anak anak Job ngga Kaya raja-i dog Pirabur

¹³ Agi ndi andu kan anak anak Job bigawai di ramin kaka pinuai ngara,

¹⁴ ndi naan pinyisung bikaduh ka yŭn Job. “Kieh majak tana di ŭmŭh ngga sapi,” ayŭh nang, “ka agi dudu kaldi di tarun tana kupai dŭh jo so nŭ.

¹⁵ Gŭgŭh bara daya Sheba nyerang ka sirapas sopŭrŭg-i. Ngara siŭ sopŭrŭg daya-gaji mai adŭ-i aku. Aku sadi adŭ adi dapŭd pirupas adŭp ku ka di kidaan di kaam.”

¹⁶ Ayŭh gibabŭ minyu kan ndi naan dinge daya-gaji mandŭg ka nang, “Kijat nyatŭk biri biri samŭn ngara adi pingingat-biri ka siŭ sopŭrŭg ngara. Aku sadi adŭ adi dapŭd bikaduh bu ka di kidaan di kaam.”

¹⁷ Ayŭh gibabŭ minyu kan ndi naan dinge daya-gaji mandŭg ka nang, “Taruh tibaran pirupak daya Chaldea nyerang kieh, tambit onta onta, ka siŭ sopŭrŭg daya-gaji adŭ-i aku. Aku sadi adŭ adi dapŭd bikaduh bu ka di kidaan di kaam.”

¹⁸ Ayŭh gibabŭ minyu kan daya-gaji adi bŭkŭn mandŭg ka nang, “Bara anak mai aŭn bigawai di ramin kaka ngara,

¹⁹ kan sabak ribut mandŭg so tarun tana-pajam. Sabak anŭ poh ka nyirubuh ramin ka siŭ sopŭrŭg ngara. Aku sadi adŭ adi dapŭd bikaduh bu ka di kidaan di kaam.”

²⁰ Ka Job rasu mijog ka nyiratak piraka-i darŭm susah. Ayŭh gumbak ubok-i ka suman adŭp-i di tana.

²¹ Ayŭh nang, “Aku dŭh biyŭn ani ani kan aku dog biranak, ka aku re kabŭs dŭh gŭh biyŭn ani ani. TUHAN nggen, ka madin Ayŭh mbŭh tambit pari. Isa-i adŭn-I dog muji!”

²² Sunggu sopŭrŭg kayuh anŭ mbŭh jadi, Job dŭh bidosa ka dŭh nyarah Tapa.