JEREMIAH 8 - Hakcipta - Biatah Bidayuh

¹ “Di tika anŭ turang turang bara raja ngga bara pinurung pritah Judah, samŭn turang turang bara imam, bara nabi, ngga daya daya bŭkŭn adi rŭŭ di Jerusalem, re dog kadi so kubur ngara.

² Turang turang anŭ re dŭh dog kubur, pak re mingare di tunduh tana mun tamŭh. Turang turang anŭ re mingare yŭn batŭh andu, buran, ka bitang bitang, adi dog rindu ka adi yŭn ngara anŭ bituan, ka adi yŭn ngara bisiken ka nyambah.

³ Ka daya so bangsa adi arap ati adi gibabŭ udip, adi rŭŭ di rais rais adi yŭn Ku mbŭh bada ngara papar sasah, re raan dŭ kabŭs so ngara udip. Aku, adi TUHAN Bisa-pŭrŭg, mbŭh minyu.”

Dosa ngga Ukum

⁴ TUHAN bada aku kidaan di daya-I, “Kan daya rabu, dŭh kah ayŭh makat? Kan daya manyap di aran, dŭh kah ayŭh pari ka panu so puun-i dinge?

⁵ Mani meh garang, daya Ku, angān bu tagan Aku ka dŭh pari ka Aku? Angān rakat di tibudo ngan ka abah pari ka Aku.

⁶ Aku nakit dingah, pak angān dŭh minyu kayuh adi sawŭ. Mating so angān adi nyesar di pingandai arap ngan. Mating so angān adi mbŭh siken, ‘Ani sarah ku?’ Barang naan tunda pinyiraan adŭp-i, mun kuda bikaduh nyurong ka yŭn biperang.

⁷ Manuk bangau sirabi ka puan jam adi ngga-i pari; manuk tikukur, manuk tipiris ka manuk kuaring puan tipuh adi ngga-i bipindah ka tarun bŭkŭn. Pak, daya Ku, dŭh kah angān puan ukum-adat adi ngga Aku mritah angān.

⁸ Birani angān nang adŭp ngan bijak ka puan ukum-adat Ku? Tingga, ukum ukum-adat mbŭh dog ngubah gurū gurū adat adi dŭh tŭnggŭn.

⁹ Bara daya ngan adi bijak mbŭh dog pimangŭh; ngara mbŭh riruk buang dŭh dapŭd nang ani ani. Ngara tirawan pinganang Ku; ani meh pinyibijak ngara madin?

¹⁰ Ngapŭi Aku re nggen ŭmŭh ngara ka daya bŭkŭn, ka sawŭn ngara ka dari bŭkŭn. Barang naan daya, adi bās ngga adi sŭ, suba an dapŭd duit ngga aran adi dŭh batur. Nabi ngga imam gŭh nipu daya.

¹¹ Ngara nang tawan daya Ku karag adŭ, ‘Sopŭrŭg kayuh tirase,’ ngara nang, kan sopŭrŭg kayuh dŭh tirase.

¹² Daya Ku, mangŭh kah angān ripas angān ndai kayuh adi sipŭ anŭ? Dŭh, angān manŭn dŭh mangŭh; raŭn ngan dŭh gŭh pandai marui bireh! Ngapŭi angān re rabu mun ngara adi bŭkŭn mbŭh rabu; kan Aku ngukum angān, anŭ re pimungan ngan. Aku, adi TUHAN, mbŭh minyu.

¹³ “Aku raan nguruk daya Ku, mun tukang teya nguruk buwa pingatŭm; pak ngara keya ka tŭngŭn anggor adi mating buwa-i, keya ka tŭngŭn ara adi mating buwa-i; ndŭg ka dawŭn dawŭn-i gŭh mbŭh rayu. Anŭ meh sabab Aku mbŭh bada daya sapa tambit tarun tana anŭ.”

¹⁴ “Mani ata dŭh ndai ani ani?” Daya Tapa siken. “Ja ata bikaduh ka kupo kupo adi bikuta, ka kabŭs diginŭ. TUHAN adi Tapa ta mbŭh nunggu ata ka tandah ata kabŭs; Ayŭh mbŭh nggen di ata rasun bada ata nok, sabab ata mbŭh bidosa rawan Ayŭh.

¹⁵ Ata harap udip damai ngga tika pinyibua mandŭg, pak mating guna-i amai gŭt-i pinyitaru adŭ adi mandŭg.

¹⁶ Pinganyu ta mbŭh agi darŭm kupo Dan; ata dingah jawŭn so udung kuda ngara. Ndi tarun tana bigagar kan kuda ngara jawŭn. Pinganyu ta mbŭh mandŭg di pirusak tarun tana ta samŭn sopŭrŭg kayuh darŭm-i, kupo ta ka sopŭrŭg daya adi darŭm-i.”

¹⁷ “Ingat!” TUHAN nang, “Aku pait jippŭh di ruang ngan, jippŭh adi bisā adi dŭh dapŭd dog ngamat, ka-i re matuk angān.”

Jeremiah Susah Pikir bara Daya-I

¹⁸ Pinyusah ku dŭh dapŭd dog pibua; Atin ku susah buang mandam.

¹⁹ Dingah! Di ndi tarun tana rais aku dingah daya ku nyirais nang, “Mbŭh mating kah TUHAN di Zion? Mbŭh mating kah raja Zion diginŭ?” TUHAN, adi raja ngara, nam, “Mani angān kinuas Aku ngga pingandai ngan adi nyambah tibudo ka mutu ubak ngan ka tapa tapa saruh adi dŭh biguna?”

²⁰ Daya Israel nyirais, “Tipuh paras mbŭh rupas, tipuh ngatŭm mbŭh ripuan, pak kieh bayuh dog nyiramat.”

²¹ Atin ku mbŭh asur sabab daya ku mbŭh asur; aku ngurid; aku mbŭh raru asa.

²² Mating kah uri di Gilead? Mating kah doktor diginŭ? Mani meh, garang, daya ku dŭh dog pibua?