JEREMIAH 7 - Hakcipta - Biatah Bidayuh

Jeremiah Ngajar di Ramin TUHAN

^1-3 TUHAN bada aku di ka tiban-bās Ramin TUHAN adi so daya Judah mŭrŭt an di bisambah. Ayŭh bada aku mijog diginŭ ka kidaan di daya bagŭ kayuh adi TUHAN Bisa-pŭrŭg, adi Tapa Israel, an nang di ngara: Ngubah aran pimudip ngan samŭn kraja pingandai ngan, ka Aku re bada angān adu adu rŭŭ digiti.

⁴ Dŭh tia sabah pinganang kadong adi nang, ‘Ata siramat! Ati inŭh Ramin TUHAN, ati inŭh Ramin TUHAN, ati inŭh Ramin TUHAN!’

⁵ “Ngubah aran pimudip ngan ka dŭh tia ndai pingandai ngan adi sarah anŭ. Nakit ngga dingan ngan.

⁶ Dŭh tia kinanyuh daya saruh, anak tumang, ka dayung uban. Dŭh tia siŭ daya adi dŭh sarah di tarun tana ati. Dŭh tia nyambah tapa tapa bŭkŭn, amai anŭ re pirabur angān.

⁷ Kambŭi angān ngubah aran pimudip ngan samŭn kraja pingandai ngan, Aku re nyibandar angān adu adu rŭŭ digiti di tarun tana adi Aku mbŭh nggen di tayung-babuk ngan ndu tana bisaka.

⁸ “Tingga, angān sabah pinganang tipu.

⁹ Angān naku, siŭ daya, tanggah, nggen taksi kadong, jugan sadis ka Baal, ka nyambah tapa tapa adi angān bŭn puan.

¹⁰ Angān ndai kayuh kayuh anŭ adi Aku tiru, ka komŭnŭ angān mandŭg ka mijog di sirung jawin Ku, darŭm Ramin Ku, ka nang, ‘Kieh siramat!’

¹¹ Angān pikir Ramin Ku yŭn pirupak bisukan kah? Aku mbŭh kiris pingandai ngan.

¹² Panu di ka Shiloh, tarun adi mbŭh Ku mien yŭn Ku dog nyambah, ka tingga kayuh adi Aku mbŭh ndai di tunduh-i sabab dosa daya Ku Israel.

¹³ Angān mbŭh ndai sopŭrŭg dosa anŭ, ka sunggu Aku pari pari minyu ngga angān, angān abah dingah. Angān abah nam kan Aku bagan angān.

¹⁴ Ngapŭi meh, kayuh adi Aku ndai di tunduh Shiloh Aku re ndai di tunduh Ramin Ku ati, tarun yŭn adi angān sabah. Digiti di tarun yŭn ati adi aku mbŭh nggen di tayung-babuk ngan ka di angān, Aku re ndai kayuh adi Aku mbŭh ndai di tunduh Shiloh.

¹⁵ Aku re pibu angān so sirung jawin Ku nimun Aku pibu bara madis ngan, adi daya Israel. Aku, adi TUHAN, mbŭh minyu.”

Daya Israel Abah dingah Pinganang

¹⁶ TUHAN nang, “Jeremiah, dŭhnyah bidua yŭn bara daya ati. Dŭhnyah mite turung bait bidua ngarun ngara; dŭhnyah mite Aku masi di ngara, amai Aku dŭh re an dingah kuu.

¹⁷ Adŭp mu mbŭh kiris kayuh adi ngara ndai di kupo kupo Judah ka di aran aran Jerusalem!

¹⁸ Anak-anya ndu uwang, bara dari ndai apui, ka bara dayung kunyu tibaduk ngga ndai kue yŭn tapa dayung adi ngara kadŭn Rani Shorga. Ngara gŭh jugan sadis wain ka tapa tapa adi bŭkŭn, ngga kandam Aku.

¹⁹ Pak sibatur-i, dŭh-i Aku adi ngara kandam. Ngara kandam adŭp ngara ndŭg ka adŭp ngara mangŭh.

²⁰ Ngapŭi Aku, adi TUHAN Raja, re bada bisā baji Ku nyatŭk Ramin TUHAN ati. Aku re bada-i nyatŭk manusia ngga dāng dāng, samŭn tŭngŭn tŭngŭn kayuh ngga pimuruh. Baji Ku re mun apui adi dŭh daya tungang mura.

²¹ “Daya Ku, agi kada sadis adi angān kubo badang di tunduh mija-sambah, ka agi adi bisa angān man. Pak kayuh adi Aku, adi TUHAN, nang inŭh kana dŭ angān man sopŭrŭg-i.

²² Aku mating pesan tayung-babuk ngan pasar sadis badang bait tadŭ tadŭ sadis adi bŭkŭn, di andu Aku taban ngara ruah so Egypt.

²³ Pak Aku agi pesan ngara bada nundok di Aku, isa Aku jadi Tapa ngara ka ngara jadi daya Ku. Ka Aku bada ngara udip nanyam ka pesan Ku di ngara, isa ngara udip sanang.

²⁴ Pak ngara dŭh dingah pinganang ka dŭh mbit piduri. Tanŭ ka ngara ndai barang ka mun kayuh nanyam ka pinyiraan atin baking ngga atin arap ngara, ka jadi rabis arap so adi mbŭh.

²⁵ So andu adi ngga tayung-babuk ngan ruah so Egypt ndŭg andu ati, Aku ari pait urun urun Ku, adi bara nabi, ka angān.

²⁶ Pak daya dŭh an dingah bait piduri kayuh adi ngara nang. Tanŭ ka angān jadi rabis baking ka an birawan mun tayung-babuk ngan.

²⁷ “Jadi, Jeremiah, kan kuu kidaan sopŭrŭg pinganang ati di daya Ku, ngara dŭh re an dingah kuu; kuu re bagan ngara pak ngara re dŭh nam.

²⁸ Kuu re kidaan di ngara nang bangsa ngara abah dingah pinganang Ku, adi TUHAN Tapa ngara, bait birajar so ukum adi mbŭh nyatŭk ngara. Pinyitŭtŭd ngara di Aku mbŭh miyap. Mbŭh mating tia dog nyabŭt.

Pingandai Bidosa di Rubān Hinnom

²⁹ “Ngurid meh, angān daya Jerusalem; kapŭg ubok ngan ka taran-i. Nang ragu nyikubur di tibung sandah, sabab Aku, adi TUHAN, mbŭh baji, ka mbŭh tirawan daya Ku.

³⁰ “Daya Judah mbŭh ndai pingandai arap. Ngara mbŭh na tibudo tibudo ngara, adi Aku tiru, darŭm Ramin TUHAN ka mbŭh nyembar-i.

³¹ Darŭm Rubān Hinnom ngara mbŭh pijog ndi mija-sambah dŭn Topheth. Di tunduh mija-sambah anŭ ngara badang anak anak dari ngga anak anak dayung ngara, ndu sadis. Aku mating pesan ngara bada ndai simŭnŭ. Bŭn kayuh mun anŭ timbur darŭm pikir Ku.

³² Ngapŭi meh, tika-i re mandŭg adi ngga-i re dŭh tia dog kadŭn Topheth bait Rubān Hinnom, pak Rubān Siŭ. Ngara re kubur tadang daya diginŭ amai mating tia tarun adi bŭkŭn re yŭn kubur.

³³ Tadang re jadi pinguman yŭn manuk ngga dāng tarun, ka re mating daya adi re tukang kasig-i.

³⁴ Tarun tana anŭ re jadi tarun tana-pajam. Jawŭn pawŭn ngga gaŭn, samŭn jawŭn rami gawai banan sawan di kupo kupo Judah ngga di aran aran Jerusalem Aku re pirŭŭ.