JEREMIAH 6 - Hakcipta - Biatah Bidayuh

Jerusalem dog Kirurung Pinganyu

¹ Daya Benjamin, bikaduh nyiramat adŭp ngan! Bu so Jerusalem! Mambak trompet di Tekoa ka ndai apui ngga nggen tandā di Beth Haccherem. Pinyirabur ngga pinyirusag mbŭh re mandŭg so utara.

² Kupo Zion inŭh ramus, pak-i re dog pirabur;

³ bara raja re bibari diginŭ ngga tibaran tibaran bara soldadu ngara. Ngara re pijog bari ngara maning kupo, ka barang naan bibari di tarun yŭn adi nanyam ka pinyiraan adŭp-i.

⁴ Ngara re nang, “Sidia yŭn nyerang Jerusalem! Sidia adŭp ngan! Ata nyerang ngga yun kumbeng!” Pak komŭnŭ ngara re nang, “Mbŭh rambat, andu mbŭh re karŭm, singangi singangi singumi andu mbŭh tanŭ ka bitambah ambu.

⁵ Ata re nyerang singarŭm; ata re nyirubuh kuta kuta kupo.”

⁶ TUHAN Bisa-pŭrŭg mbŭh nggen ukum bada raja raja tabŭng tŭngŭn tŭngŭn kayuh ka nugung tana ngga nyikapung Jerusalem. Ayŭh nang, “Aku re ngukum kupo ati sabab-i mbŭh puno ngga kraja pingandai kinanyuh.

⁷ Nimun prigi nyikŭn piin tibŭn, simŭnŭ gŭh Jerusalem bada kraja pingandai arap-i tibŭn. Aku dingah pinyiganas ngga pinyirusag darŭm kupo; andam ngga tawan adŭ adi aku kiris.

⁸ Daya Jerusalem, tandah pinyusah anŭ jadi pinyibakan di angān, kambŭi dŭh Aku re tagan angān; Aku re bada kupo ngan jadi tarun tana-pajam, tarun adi mating daya rŭŭ dieh.”

Israel adi An Birawan

⁹ TUHAN Bisa-pŭrŭg nang di aku, “Israel re dog pisen bada bisig mun teya anggor adi so buwa anggor bauh dog sun. Ngapŭi meh, san jam gibabŭ agi, kuu dŭh siŭn dŭh nyiramat daya adi gibabŭ udip.”

¹⁰ Aku nam, “Asi re an dingah aku kambŭi aku minyu ka bakan ngara? Ngara baking ka abah dingah pinganang Mai; ngara tawŭh kayuh adi Kaam bada aku nang.

¹¹ Baji Mai di ngara bijagu gŭh darŭm aku, TUHAN, ka aku dŭh tungang nyijŭn-i tia.” Komŭnŭ TUHAN nang di aku, “Ren baji Ku di tunduh bara anak-sŭ di aran raya ka di tunduh anak anak-anya. Banŭh banŭh ngga sawŭn sawŭn ngara re dog taban ngga bu, ndŭg ka adi minyamba re dŭh gŭh dog kidŭm.

¹² Ramin ramin ngara re dog nggen di daya bŭkŭn, ka simŭnŭ gŭh teya ngara ngga sawŭn ngara. Aku re ngukum daya di tarun tana ati.

¹³ Barang naan daya, bās ngga sŭ, suba dapŭd duit ngga aran adi dŭh batur; nabi ngga imam gŭh nipu daya.

¹⁴ Ngara nang tawan daya Ku karag adŭ. ‘Sopŭrŭg kayuh tirase,’ ngara nang, kan sopŭrŭg kayuh dŭh tirase.

¹⁵ Mangŭh kah ngara ripas ngara ko ndai kayuh adi sipŭ anŭ? Dŭh, ngara taŭn dŭh mangŭh; raŭn ngara dŭh gŭh pandai marui bireh. Ngapŭi ngara re rabu mun ngara adi bŭkŭn adi mbŭh rabu. Kan Aku ngukum ngara, anŭ re pimungan ngara. Aku, adi TUHAN, mbŭh minyu.”

Israel Tirawan Aran Tapa

¹⁶ TUHAN nang di daya-I, “Mijog di sakap sakap aran ka tingga. Siken diki aran amba adi jah ka diki aran adi siabo kana. Kadŭg-i, ka kuu re udip darŭm damai.” Pak ngara nang, “Dŭh, abah kieh!”

¹⁷ Komŭnŭ TUHAN tijuan daya adi tukang jaga bada nyiringa jawŭn trompet adi nggen tandā. Pak ngara nang, “Kieh dŭh re nyiringa.”

¹⁸ Jadi TUHAN nang, “Dingah, angān bangsa bangsa, ka birajar kayuh adi re jadi di daya Ku.

¹⁹ Dingah, ong! Ndu ukum yŭn sopŭrŭg atur kraja pingandai ngara Aku re nyirubuh bara daya anŭ, sabab ngara mbŭh tirawan ajar Ku ka dŭh tunda pinganang Ku.

²⁰ Re Ku ngga mani kimanyan adi ngara taban so Sheba, bait rapah rapah so tarun tana adi jo? Aku dŭh re trima pinganggen ngara bait re munos asŭng di sadis ngara.

²¹ Ngapŭi Aku re bada bara daya anŭ sikak ka rabu. Pimas ngga anak-anya re kabŭs, ka simŭnŭ gŭh jerā ngga rasū.”

Serang so Utara

²² TUHAN nang, “Daya re mandŭg so ndi rais di utara; bangsa adi bikuasa adi jo mbŭh sidia yŭn biperang.

²³ Ngara mbŭh tambit bawŭh ngara ngga pedang ngara; ngara inŭh daya adi gaok buang dŭh biyŭn masi. Dudu ngara sak jawŭn girumbang di rawŭt, darŭm ngara nunggang kuda. Ngara mbŭh sidia yŭn bisaad rawan Jerusalem.”

²⁴ “Kieh mbŭh dingah agah anŭ,” daya di Jerusalem nang, “ka kieh mbŭh kimŭtŭr taru; kieh mbŭh susah buang naman adŭp ami mun dayung naman sarang andam re biranak.

²⁵ Kieh dŭh birani re di ka sapa rais bait panu di aran, sabab pinganyu ami bisinyata ka kieh mbŭh jadi taru amai ngara agi di barang yŭn maning kieh.”

²⁶ TUHAN nang di daya-I, “Kasŭk banang guni ka gurai adŭp ngan di apŭk. Bandar bandar muās mun angān muās anak tambŭ dari ngan, sabab sianŭ adi mandŭg di pirabur angān re gŭgŭh nyerang.

²⁷ Jeremiah, suba daya Ku, nimun kuu suba basi ka dapŭd ani sibandar-i.

²⁸ Sopŭrŭg ngara inŭh daya adi baking adi an birawan, riang mun timaga ka basi. Sopŭrŭg ngara arap, panu kamati kamanŭ kirakar arap daya.

²⁹ Buwang apui mbŭh raru paras, pak kais basi dŭh riris ka manyap. Mating guna re adu adu suba daya Ku yŭn bada bisig, sabab ngara adi arap dŭh dog kadi.

³⁰ Ngara re dog kadŭn taki basi, sabab Aku, adi TUHAN, mbŭh tirawan ngara.”