JEREMIAH 5 - Hakcipta - Biatah Bidayuh

Dosa Jerusalem

¹ Daya di Jerusalem, panu matak mari di aran kupo ngan! Tingga bait tauh! Tingga adŭp ngan! Jiroh di ndi passar passar! Tungang kuu dapŭd ndi naan daya adi ndai kayuh adi batur ka suba tŭtŭd di Tapa? Kambŭi agi, TUHAN re apun Jerusalem.

² Sunggu angān nang adŭp ngan nyambah TUHAN, angān nang sakanŭ dŭh ngga atin sawŭ.

³ Tatu TUHAN jiroh atin tŭtŭd. Ayŭh ngukum angān, pak angān dŭh mbit piduri; Ayŭh pān angān, pak angān abah birajar. Angān baking ka dŭh raan ko bidosa.

⁴ Komŭnŭ aku pikir, “Ngara ati daya adi budo bawa. Ngara budo darŭm urah ngara; ngara dŭh puan ani anŭ adi Tapa ngara raan, kayuh adi TUHAN raan ngara ndai.

⁵ Aku re di ka yŭn daya adi bikuasa, ka minyu ngga ngara. Tatu ngara puan kayuh adi Tapa ngara raan, kayuh adi TUHAN raan ngara ndai.” Pak sopŭrŭg ngara tirawan kuasa TUHAN ka abah nundok di Ayŭh.

⁶ Anŭ inŭh sabab ngara re dog siŭ singah so tuān; kasong tarun so tarun tana-pajam re nyirigat nyiratak ngara, ka busing tarun adi mangah re panu mŭrŭt kupo kupo ngara. Kambŭi ngara anŭ ruah, ngara re dog nyirigat sabab dosa ngara raru bagŭ ka pari pari ngara tagan Tapa.

⁷ TUHAN siken “Re ngga mani Aku apun dosa daya Ku? Ngara tagan Aku ka mbŭh nyambah tapa tapa bŭkŭn adi dŭh sawŭ. Aku paan daya Ku ndŭg ka ngara bisoh, pak ngara tanggah ka saat jam ngga dayung sundar.

⁸ Ngara mbŭh keya ka dari kuda adi gamu buang mingaras, barang naan ripong di sawŭn dingan-i.

⁹ Re dŭh kah Aku ngukum ngara amai sopŭrŭg anŭ ka maras dendam di bangsa adi mun anŭ?

¹⁰ Aku re pait pinganyu bada pirusak teya anggor daya Ku, pak dŭh batur batur pirusak-i. Aku re bada ngara kadi daan daan-i, sabab daan daan anŭ dŭh jaku.

¹¹ Daya Israel ngga daya Judah mbŭh bandar bandar tirawan Aku. Aku, adi TUHAN, mbŭh minyu.”

TUHAN Tirawan Israel

¹² Daya TUHAN mbŭh nyipunok Ayŭh ka mbŭh nang, “Ayŭh re dŭh ndai ani ani. Kieh re dŭh dog nyatŭk pinyusah; kieh re dŭh kiris perang bait dog apag.”

^13-14 Ngara nang bara nabi minyu au-tarun, buang dŭh biyŭn pinganang so TUHAN. TUHAN Tapa Bisa-pŭrŭg nang di aku, “Jeremiah, sabab sopŭrŭg daya ati mbŭh minyu sakanŭ, Aku re bada buwa pinganang Ku mun apui di baba mu. Ngara re keya ka apŭg kayuh, ka apui re man ngara.”

¹⁵ Daya Israel, TUHAN inŭh taban ndi bangsa so tarun adi jo bada nyerang angān. Anŭ inŭh bangsa adi bake adi mbŭh agi so jah, ka piminyu-i angān dŭh puan.

¹⁶ Bara adi tukang nimbak reja-panah ngara inŭh soldadu adi bake adi dŭh biyŭn masi.

¹⁷ Ngara re kubo buwa pimuruh ngga pinguman ngan; ngara re siŭ anak anak dari ngga anak anak dayung ngan. Ngara re siŭ biri biri ngga sapi sapi ngan ka pirusak tŭngŭn anggor ngga tŭngŭn ara ngan. Kupo kupo adi bikuta adi yŭn ngan rŭŭ re dog pirabur tibaran bara soldadu ngara.

¹⁸ TUHAN Raja nang, “Pak di tipuh anŭ gŭh Aku dŭh re batur batur pirabur daya Ku.

¹⁹ Kan ngara siken mani Aku ndai simŭnŭ, kidaan di ngara, Jeremiah, nang nimun ngara tagan Aku ka bituan di tapa daya tami di tarun tana adŭp ngara, simŭnŭ gŭh ngara re bituan di daya tami di tarun tana adi dŭh tung adŭp ngara.”

Tapa Bakan Daya-I

²⁰ TUHAN nang, “Kidaan di sesang Jacob, kidaan di daya Judah:

²¹ Dingah, angān daya adi budo buang bawa, adi biyŭn batŭh pak dŭh kiris, adi biyŭn kajit pak dŭh dingah.

²² Aku ati TUHAN; mani angān dŭh taru Aku? Mani angān dŭh kimŭtŭr di sirung jawin Ku? Aku na sumat ndu baat rawŭt, baat adi tatap adi dŭh rawŭt dapŭd mutas. Rawŭt bisa magā ka ndai girumbang, pak dŭh dapŭd mutas-i.

²³ Pak angān! Angān baking ka an birawan; angān mbŭh miriseu ka tagan Aku.

²⁴ Angān bŭn bipikir re an stabi di Aku, sunggu Aku adi nggen ujen di tipuh jaya ngga ujen di tipuh bunga, ka nggen di angān tipuh ngatŭm barang sawa.

²⁵ Pak dosa ngan adi pijo kayuh kayuh anŭ so adŭp ngan.

²⁶ “Daya adi ndai kayuh adi arap rŭŭ bigaur ngga daya Ku; ngara keya ka daya adi tŭŭn jarat ngga nakap manuk, pak ngara mbŭh tŭŭn jarat adi ngga nakap manusia.

²⁷ Nimun daya adi tukang ngasū ngisi kirungan ngga manuk, ngara mbŭh ngisi ramin ngara ngga dudu kayuh sirapas. Anŭ inŭh sabab ngara bikuasa buang kaya,

²⁸ gamu buang ari bisoh. Ngara dŭh ngang darŭm kraja pingandai arap. Ngara dŭh turung anak tumang di hak ngara, dŭh tŭnggŭn ngga daya adi dog kinanyuh.

²⁹ “Pak Aku, adi TUHAN, re ngukum ngara amai kayuh kayuh anŭ; Aku re maras dendam di tunduh bangsa ati.

³⁰ Kayuh adi sipŭ ka adi gŭgŭh daya kiris mbŭh jadi di tarun tana ati:

³¹ Sopŭrŭg kayuh adi bara nabi nang inŭh pinganang kadong; bara imam mritah so ka pesan bara nabi anŭ, ka daya Ku mating matah. Pak ani re ngara ndai kan sopŭrŭg-i mungan?”