JEREMIAH 46 - Hakcipta - Biatah Bidayuh

Egypt dog Ngarah di Carchemish

¹ TUHAN minyu ngga aku pasar bangsa bangsa,

² piguru so Egypt. Ati inŭh kayuh adi Ayŭh nang pasar tibaran bara soldadu Neco adi raja Egypt, adi Raja Nebuchadnezzar so Babylonia ngarah di Carchemish sindŭk Yang Euphrates darŭm sawa adi pat Jehoiakim jadi raja Judah:

³ “Bara pingubak soldadu Egypt nyirais, ‘Sidia pinangin ngan ka matak di biperang!

⁴ Na tapas-pinyiguru di kuda ngan ka nunggang-i! Bidiban meh ka kasŭk tupi basi ngan! Ngasa jarok ngan! Kasŭk piraka perang ngan!’

⁵ “Pak ani meh kiris Ku?” TUHAN siken. “Ngara mbŭh sikanang amai tikaran. Bara soldadu ngara mbŭh ngundur; raru taru, ngara bikaduh ngga situngang tungang ngara buang dŭh kimat punok.

⁶ Ngara adi raju bikaduh dŭh dapŭd bu; bara soldadu dŭh dapŭd pirupas adŭp ngara. Di utara, sindŭk Yang Euphrates ngara sikak ka rabu.

⁷ Asi anŭ adi makat mun piin Yang Nile, mun sungi adi ngapuh tabing-i?

⁸ Egypt inŭh anŭ, makat mun Yang Nile, mun sungi adi ngapuh tabing-i. Egypt nang, ‘Aku re makat ka ngapuh ong; aku re pirabur kupo kupo samŭn bara daya adi rŭŭ diginŭ.

⁹ Mritah kuda kuda bada panu, ka krita krita kuda bada raju panu! Pait bara soldadu: bara daya so Ethiopia ngga Libya, taban pinangin, ngga ngara adi sukup pandai nimbak reja-panah so Lydia.’ ”

¹⁰ Ati inŭh andu TUHAN Raja Bisa-pŭrŭg: andu ati Ayŭh re maras dendam; andu ati Ayŭh ngukum bara pinganyu-I. Pedang-I re man ngara ndŭg ka-i mbŭh bisoh, ka nok deya ngara ndŭg ka mbŭh puas. Andu ati Ayŭh adi Bisa-pŭrŭg nyadis bara dangah-I di utara, sindŭk Yang Euphrates.

¹¹ Daya Egypt, di ka Gilead ka jiroh uri! Sopŭrŭg uri ngan mbŭh tatŭng dŭh biguna; mating kayuh dapŭd pibua angān.

¹² Bangsa bangsa mbŭh dingah arap ngan; barang naan mbŭh dingah sien ngan. Ndi naan soldadu sikak soldadu adi bŭkŭn, ka soduwŭh ngara rabu ka tana.

Pimandŭg Nebuchadnezzar

¹³ Di tika Raja Nebuchadnezzar so Babylonia mandŭg di nyerang Egypt, TUHAN minyu ngga aku. Ayŭh nang,

¹⁴ Piagah ati di kupo kupo Egypt, anŭ inŭh Migdol, Memphis, and Tahpanhes: ‘Sidia yŭn ngibān adŭp ngan; sopŭrŭg adi angān biyŭn re dog pirusak darŭm perang!

¹⁵ Mani Apis, adi tapa ngan adi bake anŭ rabu? TUHAN mbŭh mukong ayŭh!’

¹⁶ Bara soldadu ngan mbŭh sikak ka rabu; barang naan nang di dingan-i, ‘Rikas! Ja mari ka bangsa adŭp ta ka bu jo so pedang pinganyu!’

¹⁷ “Nggen di raja Egypt dŭn adi bauh: ‘Sibidudu adi taran pluang-i’.

¹⁸ Aku, adi TUHAN Bisa-pŭrŭg, inŭh raja. Aku Tapa adi udip. Nimun Darŭd Tabor bigatung so darŭd darŭd adi bŭkŭn ka Darŭd Carmel bigatung so jawin rawŭt, simŭnŭ gŭh pinyibake sianŭ adi nyerang kuu.

¹⁹ Sidia adŭp ngan re dog nakap, angān daya Egypt! Memphis re jadi tarun tana-pajam, jadi tibawang adi abah daya rŭŭ dieh.

²⁰ Egypt inŭh keya ka sapi adi gamu, dog nyerang adŭd so utara.

²¹ Ndŭg ka bara soldadu-i adi dog bayar dŭh dapŭd ndai ani ani mun anak sapi. Ngara dŭh re tan biperang; sopŭrŭg ngara re bigiring ka bikaduh bu. Andu ukum ngara mbŭh mandŭg, andu adi ngga ngara dog pirabur.

²² Egypt bikaduh bu, jawŭn-i sak jippŭh, darŭm tibaran bara soldadu pinganyu mbŭh makin sindŭk. Ngara nyerang-i ngga kapak, mun daya tabŭng tŭngŭn kayuh

²³ ka pirusag tuān adi tabar. Kiang ngara dŭh dapŭd dog mirang; bara soldadu ngara bagŭ so dudu kadis.

²⁴ Daya Egypt dog pimangŭh; ngara dog ngarah daya so utara. Aku, adi TUHAN, mbŭh minyu.”

²⁵ TUHAN Bisa-pŭrŭg, adi Tapa Israel, nang, “Aku re ngukum Amon, adi tapa daya Thebes, simŭnŭ gŭh Egypt ngga tapa tapa-i ka raja raja-i. Aku re tambit raja Egypt samŭn sopŭrŭg daya adi bisangan di ayŭh,

²⁶ ka nggen ngara ka darŭm tangan ngara adi raan siŭ ngara, ka darŭm tangan Raja Nebuchadnezzar ngga tibaran bara soldadu-i. Pak ripas anŭ, daya re rŭŭ di Egypt dinge, nimun di jaman adi mbŭh ripas. Aku, adi TUHAN, mbŭh minyu.”

TUHAN Re Nyiramat Daya-I

²⁷ “Daya Ku, dŭhnyah taru, angān daya Israel, dŭhnyah tikaran. Aku re nyiramat angān so rais adi jo anŭ, so rais adi yŭn ngan jadi daya-takap. Angān re mari ka udip darŭm damai; angān re udip pagŭng, ka mating daya re bada angān taru.

²⁸ Aku re mandŭg ka angān ka nyiramat angān. Aku re pirabur sopŭrŭg bangsa adi yŭn Ku mbŭh bada angān papar sasah, pak Aku dŭh re pirabur angān. Aku dŭh re tandah angān dŭh dog ukum; pak kan Aku ngukum angān, Aku ngukum angān ngga pinyitŭnggŭn. Aku, adi TUHAN, mbŭh minyu.”