JEREMIAH 41 - Hakcipta - Biatah Bidayuh

¹ Di buran adi ju sawa anŭ, Ishmael adi anak Nethaniah ka sukuh Elishama, adi ndi naan so rawang raja ka ndi naan so daya adi bās di ribo raja. Ayŭh di ka Mizpah ngga simŭng naan daya di bidapŭd ngga Gedaliah. Darŭm ngara samah man

² Ishmael ngga simŭng naan daya-i nyitak pedang ka siŭ Gedaliah.

³ Ishmael siŭ gŭh sopŭrŭg daya Israel adi agi ngga Gedaliah di Mizpah ngga bara soldadu daya Babylonia adi tipia agi diginŭ.

⁴ Andu anŭ ndi, diŭ so daya puan pasar Gedaliah dog siŭ,

⁵ mai puru naan daya mandŭg so Shechem, Shiloh, ka Samaria. Ngara mbŭh gumbak gagap ngara, nyiratak piraka ngara, ka nidi adŭp ngara. Ngara taban gandom ngga kimanyan an ngara jugan di Ramin TUHAN.

⁶ Jadi Ishmael ruah so Mizpah di bidapŭd ngga ngara, buang sien ayŭh nang di ngara, “Ja di tingga Gedaliah.”

⁷ Kan ngara mbŭh darŭm kupo, Ishmael ngga bara daya-i siŭ ngara ka taran tadang ngara ka darŭm prigi.

⁸ Pak agi simŭng naan daya so tibaran anŭ nang di Ishmael, “Turung dŭhnyah siŭ kieh! Kieh biyŭn gandom, jeri, inyo kanā, ka ju banyis dog sukan di ŭmŭh.” Jadi ayŭh dŭh siŭ ngara.

⁹ Prigi adi yŭn Ishmael taran tadang ngara adi ayŭh muko siŭ inŭh adi baga dŭ adi Raja Asa ko kareh di andu ayŭh dog nyerang Raja Baasha so Israel. Ishmael ngisi prigi anŭ ngga tadang.

¹⁰ Komŭnŭ ayŭh nakap anak anak dayung raja ngga sopŭrŭg daya bŭkŭn di Mizpah, adi Nebuzaradan adi pingibās soldadu muko na di ribo pinyijaga Gedaliah. Ishmael nakap ngara ka matak kadŭg aran nuju parad ka utung tarun tana Ammon.

¹¹ Johanan ngga sopŭrŭg pinguru tibaran bara soldadu adi agi ngga ayŭh dingah pasar pingandai sarah adi Ishmael mbŭh ndai.

¹² Jadi ngara taban bara daya ngara ka tadak ayŭh, ka nyandat ayŭh sindŭk pagong adi bayah di Gibeon.

¹³ Kan bara daya-takap Ishmael kiris Johanan ngga bara pinguru soldadu-i, ngara gaŭn,

¹⁴ ka bikaduh tudu ngara.

¹⁵ Pak Ishmael ngga mai naan daya-i bu mangān Johanan di ka tarun tana Ammon.

¹⁶ Komŭnŭ Johanan ngga bara pinguru soldadu-i nguruk bara daya adi Ishmael mbŭh nakap di Mizpah ripas ko siŭ Gedaliah — bara soldadu, bara dayung, anak-anya, ka eunuch.

^17-18 Ngara taru daya Babylonia sabab Ishmael muko siŭ Gedaliah, adi raja Babylonia mbŭh bada jadi gabenor di tarun tana anŭ. Jadi ngara matak ka Egypt, bu jo so daya Babylonia. Di pimanu ngara anŭ ngara rŭŭ di Chimham, sindŭk Bethlehem.