JEREMIAH 34 - Hakcipta - Biatah Bidayuh

Pinganang Yŭn Zedekiah

¹ TUHAN minyu ngga aku kan Raja Nebuchadnezzar so Babylonia ngga tibaran bara soldadu-i, adi dog batu bara soldadu so rais rais ngga bangsa bangsa adi mbŭh di ribo-i, nyerang Jerusalem ngga kupo kupo maning-i.

² TUHAN, adi Tapa Israel, bada aku di ka nang di Zedekiah adi raja Judah, “Aku, adi TUHAN, re nyerah kupo ati ka raja Babylonia, ka ayŭh re badang-i.

³ Kuu re dŭh dapŭd bu pirupas adŭp mu; kuu re dog nakap ka dog nggen di ayŭh. Kuu re situra jawin ngga ayŭh ka minyu ngga ayŭh; komŭnŭ kuu re di ka Babylonia.

⁴ Zedekiah, dingah kayuh adi Aku nang pasar kuu. Kuu dŭh re dog siŭ darŭm bisaad.

⁵ Kuu re kabŭs ngga sanang, ka nimun daya badang kimanyan kan ngara kubur tayung-babuk mu, adi bara raja diŭ so kuu, simŭnŭ gŭh ngara re badang kimanyan yŭn mu. Ngara re ngurid kuu ka nang, ‘Raja ami mbŭh kabŭs!’ Aku, adi TUHAN, mbŭh minyu.”

⁶ Komŭnŭ aku nggen pinganang anŭ ka Raja Zedekiah di Jerusalem

⁷ atan tibaran bara soldadu raja Babylonia aŭn nyerang kupo. Tibaran bara soldadu anŭ nyerang gŭh Lachish ngga Azekah, adi kaŭs-i kupo adi bŭkŭn adi bikuta adi dŭm di Judah.

Pingandai adi Dŭh Kana di Tunduh Urun

⁸ Raja Zedekiah ngga bara daya di Jerusalem mbŭh ndai pekat-janji an pirupas

⁹ urun urun ngara adi daya Hebrew, adi dari ngga adi dayung, isa daya dŭh biyŭn urun adi samah bangsa ngga adŭp-i.

¹⁰ Sopŭrŭg daya ngga pinguru pinguru ngara mbŭh situju an pirupas urun urun ngara ka dŭh tia piurun ngara. Ngara sawŭ pirupas ngara,

¹¹ pak ripas anŭ ngara nukar pikir, tambit ngara pari, ka takan ngara bada jadi urun dinge.

¹² Komŭnŭ TUHAN,

¹³ adi Tapa Israel, bada aku kidaan di bara daya: “Aku ndai simanya ngga tayung-babuk ngan di andu Aku taban ngara ngga ruah so Egypt ka pirupas ngara so dog piurun. Aku bada ngara,

¹⁴ barang ju sawa, pirupas tadŭ tadŭ urun ngara adi daya Jahudi adi mbŭh bituan di ngara nŭm sawa. Pak tayung-babuk ngan dŭh an dingah Aku ka dŭh mbit piduri di pinganang Ku.

¹⁵ Kudu kudu andu adi mbŭh ripas angān ngubah adŭp ngan ka ndai kayuh adi pimunos asŭng Ku. Sopŭrŭg ngan samah situju an pirupas dingan ngan adi samah bangsa, ka angān ndai simanya di sirung jawin Ku, di Ramin Ku adi yŭn Aku dog nyambah.

¹⁶ Pak komŭnŭ angān nukar pikir ngan ka dŭh stabi di Aku. Sopŭrŭg ngan tambit pari urun ngan adi angān muko pirupas nanyam ka pinyiraan ngara, ka angān takan ngara bada jadi urun dinge.

¹⁷ Jadi madin, Aku, adi TUHAN, nang angān dŭh nundok di Aku: angān dŭh nggen pinyirupas di dingan ngan adi samah bangsa ngga adŭp ngan. Sabab anŭ, Aku re nggen di angān pinyirupas: pinyirupas kabŭs biperang, kabŭs dog andam, ka kabŭs sikirau. Aku re bada barang bangsa di ong tikaran kiris kayuh adi Aku ndai di tunduh ngan.

^18-19 Bara pinurung di Judah ngga Jerusalem, samah ngga bara pinurung istana, bara imam, ngga sopŭrŭg bara pinguru, ndai simanya ngga Aku. Ngara siŭ dari sapi ka mire-i nyinuwŭh ka panu di asah duwŭh pire anŭ ngga natu simanya anŭ. Pak ngara miranggar simanya anŭ ka dŭh tunda pinganang pinganang-i. Jadi Aku re ndai di tunduh ngara kayuh adi ngara ndai di tunduh sapi anŭ.

²⁰ Aku re nggen ngara ka darŭm tangan pinganyu ngara, adi re siŭ ngara, ka tadang ngara re dog man manuk ngga dāng dāng tarun.

²¹ Aku re nggen gŭh Zedekiah adi raja Judah ngga bara pinurung-i ka tangan ngara adi re siŭ ngara. Aku re nggen ngara ka tangan tibaran bara soldadu Babylonia, adi madin aŭn rŭŭ nyerang angān.

²² Aku re pesan, ka ngara re pari ka kupo ati. Ngara re nyerang-i, sirabut-i, ka badang-i. Aku re bada kupo kupo Judah mun tarun tana-pajam di yŭn daya mating rŭŭ dieh. Aku, adi TUHAN, mbŭh minyu.”