JEREMIAH 31 - Hakcipta - Biatah Bidayuh

Israel Pari ka Rais Adŭp-I

¹ TUHAN nang, “Tika-i re mandŭg adi ngga Aku jadi Tapa sopŭrŭg tibaran-asar Israel, ka ngara re jadi daya Ku.

² Di tarun tana-pajam Aku kiren masi Ku di ngara adi tungang pirupas adŭp ngara so dog siŭ. Kan daya Israel jiroh rŭŭ-paya,

³ Aku nandŭng di ngara so jo. Daya Israel, Aku ari rindu angān, jadi Aku re kiren di angān pinyirindu Ku adi dŭh bisa birubah.

⁴ Aku re pari pijog angān. Angān re pari tambit tamburin ngan ka birajang ngga gaŭn.

⁵ Angān re pari ndai teya anggor di sandah sandah Samaria, ka ngara adi purun-i re man ani ani adi teya anggor anŭ piruah.

⁶ Sawŭ, tika-i re mandŭg kan daya adi tukang jaga re bagan di sandah sandah Ephraim, ‘Ja di maad ka Zion, ka TUHAN Tapa ta.’ ”

⁷ TUHAN nang, “Biragu ngga gaŭn yŭn Israel, bangsa adi siabo bās. Nang ragu puji ngan, ‘TUHAN mbŭh nyiramat daya-I; Ayŭh mbŭh nyiramat sopŭrŭg adi dŭm.’

⁸ Aku re taban ngara so utara ka nguruk ngara so bŭngŭn bŭngŭn ong. Adi karak ngga adi bajang re mandŭg ngga ngara, dayung adi bite ngga ngara adi re biranak. Ngara re pari jadi ndi tibande bangsa.

⁹ Daya Ku re pari buang sien, bidua buang Aku taban ngara pari. Aku re kayak ngara ka anak anak sungi, kadŭg aran adi rata isa ngara dŭh sikak sikakong. Aku keya ka sama di Israel, ka Ephraim inŭh anak pinuai Ku.”

¹⁰ TUHAN nang, “Bangsa bangsa, dingah Aku, ka mutas rawŭt di piagah pinganang Ku. Aku bada daya Ku papar sasah, pak Aku re nguruk ngara ka kingat ngara mun pingingat-biri kingat kaban biri-i.

¹¹ Aku mbŭh pirupas daya Israel ka mbŭh nyiramat ngara so bangsa adi bikuasa.

¹² Ngara re mandŭg ka biragu ngga gaŭn di Sandah Zion angan pinganggen so Aku — pinganggen gandom ka wain ka inyo kanā, pinganggen biri ngga sapi sapi. Ngara re keya ka teya adi biyŭn sukup piin; ngara re biyŭn sopŭrŭg kayuh adi ngara biguna.

¹³ Nganŭ bara dayung re birajang ngga pawŭn, ka bara dari, adi mara ngga adi minyamba, re pawŭn. Aku re nyaduh ngara isa ngara ko ngurid ka jadi gaŭn, isa pinyusah ngara jadi sanang.

¹⁴ Aku re bada bara imam bisoh ngga bagŭ pinguman ka nggen sopŭrŭg kayuh adi daya Ku raan. Aku, adi TUHAN, mbŭh minyu.”

TUHAN masi di Israel

¹⁵ TUHAN nang, “Sirŭŭn dog dingah di Ramah, sirŭŭn muās adi sera. Rachel sien amai anak anak-i mbŭh mating tia, ka ayŭh abah dog nyaduh.

¹⁶ Ko sien ngutos randang batŭh mu. Sopŭrŭg adi angān mbŭh ndai yŭn anak anak ngan dŭh re dŭh biyŭn upah; ngara re pari so tangan pinganyu.

¹⁷ Re agi pingarap yŭn tipuh adi re; anak anak ngan re mari. Aku, adi TUHAN, mbŭh minyu.

¹⁸ “Aku dingah daya Israel nang darŭm susah, ‘TUHAN, kieh ko keya ka dāng adi dŭh tungang dog primon, pak Kaam ngajar kieh bada nundok. Taban kieh ngga pari; kieh mbŭh sidia an pari ka Kaam, TUHAN adi Tapa ami.

¹⁹ Kieh bu tagan Kaam, pak dŭh tui kieh rasu raan pari. Ripas Kaam ngukum kieh, kieh mutu ubak ami amai susah. Kieh mangŭh buang dog ngamun, sabab kieh bidosa di andu kieh gibabŭ mara.’

²⁰ “Israel, kuu inŭh anak pinuai Ku, anak adi Aku nyirot. Tiap kari Aku nyabŭt dŭn mu Aku ingat kuu ngga pinyirindu. Atin Ku inŭh di kuu; Aku re masi di kuu.

²¹ Pijog tandā pinijū di aran; jiroh aran adi angān kadŭg dawŭ-i. Mari meh, daya Israel, mari ka kupo kupo adi angān tagan.

²² Ndŭg sinde angān nyikite, angān daya adi dŭh tŭtŭd? Aku mbŭh napa kayuh adi bauh ka adi saruh, saruh mun dayung grindung dari.”

Di Tipuh adi Re, Daya Tapa Mujur

²³ TUHAN Bisa-pŭrŭg, adi Tapa Israel, nang, “Kan Aku pari daya Ku ka tarun tana ngara, ngara re pari nang darŭm tarun tana Judah ka darŭm kupo kupo, ‘Isa-i TUHAN nyiberkat sandah kudus Jerusalem, yŭn kudus di yŭn-I rŭŭ.’

²⁴ Daya re rŭŭ di Judah ka di sopŭrŭg kupo-i, ka diginŭ re agi tukang teya, ka bara pingingat-biri ngga kaban biri ngara.

²⁵ Aku re piranyah ngara adi kawŭk ka re pibisoh ngga pinguman barang naan adi ramah amai sikirau.

²⁶ Ngapŭi meh, daya re nang, ‘Aku bŭŭs, ka kan aku burah, aku ranyah.’

²⁷ “Aku, adi TUHAN, nang tika-i re mandŭg kan Aku re ngisi tarun tana Israel ka Judah ngga manusia ka dāng.

²⁸ Ka nimun Aku sidia an dimbut, an pitumbang, an taran, an pirabur, an kadi ngara, simŭnŭ gŭh Aku an purun ngara ka pijog ngara.

²⁹ Kan tika anŭ mandŭg, daya re dŭh tia nang, ‘Pimas man buwa anggor adi masŭm, pak anak adi kinyam sap masŭm-i.’

³⁰ Pak, sopŭrŭg adi man buwa anggor adi masŭm re kinyam jipŭh adŭp-i siin; ka sopŭrŭg re kabŭs sabab dosa adŭp ngara.”

³¹ TUHAN nang, “Tika-i re mandŭg adi ngga Aku re ndai simanya bauh ngga daya Israel ka ngga daya Judah.

³² Anŭ re dŭh mun simanya amba adi Aku ndai ngga tayung-babuk ngara kan Aku taban ngara ngga tangan adŭp Ku ruah so Egypt. Sunggu Aku mbŭh keya ka banŭh di ngara, ngara dŭh sita simanya anŭ.

³³ Simanya bauh adi Aku re ndai ngga daya Israel inŭh ati: Aku re na ukum-adat Ku darŭm asŭng ngara ka nuris-i darŭm atin ngara. Aku re jadi Tapa ngara, ka ngara re jadi daya Ku.

³⁴ Mating so ngara re sah ngajar dingan ngara adi samah bangsa bada puan TUHAN, sabab sopŭrŭg re puan Aku, so adi siabo sŭ ndŭg ka adi siabo bās. Aku re apun dosa ngara ka re dŭh tia ingat sarah ngara. Aku, adi TUHAN, mbŭh minyu.”

³⁵ TUHAN nggen jawa di batŭh andu bada nyekar sandu, di buran ka bitang bada nyekar singarŭm. Ayŭh kiruyok rawŭt ka bada girumbang-i magā; adŭn-I inŭh TUHAN Bisa-pŭrŭg.

³⁶ Ayŭh bijanji nang siragi atur atur anŭ babŭ, Israel re babŭ ndi bangsa.

³⁷ Kambŭi rangit dapŭd dog ngŭkŭd ka pimŭnŭs ong dog puan, nganŭ adŭ meh Ayŭh re tirawan daya Israel sabab sopŭrŭg pingandai ngara. TUHAN, mbŭh minyu.

³⁸ “Tika-i re mandŭg,” nang TUHAN, “kan ndi tarun tarun Jerusalem pari dog pijog jadi kupo Ku, so Tawā Hananel Barat ndŭg Tiban Sikuh.

³⁹ So nŭ di barat, ambu jiri baat re radus ndŭg sandah Gareb ka biruit ka Goah.

⁴⁰ Ndi tarun tarun rubān anŭ, di yŭn tadang daya dog kubur ka sapok dog taran, ka sopŭrŭg ŭmŭh di sambu sungi Kidron jeh ndŭg Tiban Kuda ndŭg timor, re dog nitah yŭn Ku. Kupo anŭ re dŭh tia dog pirusak bait dog pirabur.”