JEREMIAH 3 - Hakcipta - Biatah Bidayuh

Israel Dŭh Tŭtŭd

¹ TUHAN nang, “Kambŭi daya taran sawŭn-i, ka ayŭh bu ka jadi sawŭn daya bŭkŭn, daya anŭ dŭh siŭn tambit ayŭh pari, amai pingandai anŭ re nyembar ndi tarun tana rais anŭ. Pak, Israel, kuu muko biyŭn bagŭ ambai, ka madin kuu raan pari ka Aku!

² Tingga tibung tibung sandah. Agi kah tarun adi yŭn mu mating nyundar? Kuu kajŭn ambai mu di bŭngŭn aran, nimun daya Arab tuman dangah-i di tarun tana-pajam. Kuu mbŭh nyembar tarun tana ngga pingandai nyundar mu.

³ Anŭ meh sabab andu dŭh ujen, ka ujen di tipuh bunga dŭh mandŭg. Kuu tanŭ ka mbŭh mun dayung sundar; dŭh biyŭn mangŭh.

⁴ “Ka madin kuu nang di Aku, ‘Kaam Sama ku, ka Kaam rindu aku so aku dog biranak.

⁵ Kaam dŭh re ari baji, Kaam dŭh re adu adu baji di aku.’ Israel, anŭ inŭh kayuh adi kuu nang, pak kuu mbŭh ndai sopŭrŭg pingandai arap anŭ.”

Israel ngga Judah dŭh siŭn dŭh Marik Pimudip Ngara pari ka Tapa

⁶ Di jaman pinyipritah Raja Josiah, TUHAN nang di aku, “Agi kuu kiris kayuh adi Israel, dayung adi dŭh tŭtŭd anŭ, mbŭh ndai? Ayŭh mbŭh bu tagan Aku, ka di barang sandah ka di ribo barang tŭngŭn kayuh barŭm ayŭh nyundar.

⁷ Aku pikir ripas ayŭh mbŭh ndai sopŭrŭg anŭ, ayŭh raan pari ka Aku. Pak ayŭh dŭh pari, ka Judah adi jurud-i adi dŭh tŭtŭd anŭ kiris sopŭrŭg pingandai-i anŭ.

⁸ Judah gŭh kiris Aku taran Israel ka pibu ayŭh sabab ayŭh mbŭh tagan Aku ka mbŭh jadi dayung sundar. Pak Judah, jurud Israel adi dŭh tŭtŭd, dŭh taru. Ayŭh gŭh jadi dayung sundar

⁹ ka manŭn dŭh mangŭh. Ayŭh nyembar tarun tana, ka ayŭh mbŭh tanggah nyambah batuh ngga tŭngŭn kayuh.

¹⁰ Ka ripas sopŭrŭg anŭ, Judah, adi jurud Israel adi dŭh tŭtŭd anŭ, kaŭs-i nadar pari ka Aku pak dŭh ngga atin batur-i. Aku, adi TUHAN, mbŭh minyu.”

¹¹ Komŭnŭ TUHAN kidaan di aku nang, sunggu Israel bu tagan adŭp-I, Israel mbŭh kiren adŭp-i kana dŭ so Judah adi dŭh tŭtŭd.

¹² Ayŭh bada aku di ka nang di Israel, “Israel adi dŭh tŭtŭd, pari ka Aku. Aku an apun ka dŭh re baji; Aku dŭh re adu adu baji di kuu.

¹³ Ngaku adŭ adŭp mu mbŭh sarah ka mbŭh nyakar TUHAN, adi Tapa mu. Ngaku nang di ribo barang tŭngŭn kayuh barŭm kuu mbŭh nggen pinyirindu mu di tapa tapa bŭkŭn ka kuu agi dŭh tunda pesan Ku. Aku, adi TUHAN, mbŭh minyu.

¹⁴ “Daya adi dŭh tŭtŭd, pari meh; angān tung jaku. Aku re tambit angān ndi naan so barang kupo ka duwŭh naan so barang manak, ka Aku re taban angān pari ka Sandah Zion.

¹⁵ Aku re nggen di angān pinguru pinguru adi nundok di Aku, ka ngara re nyiruton angān ngga pinyibijak ka pinyimirati.

¹⁶ Komŭnŭ kan angān mbŭh raru bagŭ di tarun tana anŭ, daya re dŭh tia minyu pasar Pati Simanya Ku. Ngara re dŭh tia pikir pasar-i bait ingat-i; ngara re dŭh gŭh biguna dieh, dŭh gŭh ngara re ndai adi bauh.

¹⁷ Kan tika anŭ mandŭg, Jerusalem re dog kadŭn ‘Takta TUHAN’, ka sopŭrŭg bangsa re tikuruk diginŭ nyambah Aku. Ngara re dŭh tia ndai kayuh adi atin tangek ngga atin arap ngara bada ngara ndai.

¹⁸ Israel re jadi ndi ngga Judah, ka samah ngara re mandŭg so rais adi yŭn ngara dog taran ka pari ka tarun tana adi Aku mbŭh nggen di tayung-babuk ngara ndu bisaka.”

Daya Tapa Nyambah Tibudo

¹⁹ TUHAN nang, “Israel, Aku raan trima kuu jadi anak Ku ka nggen di kuu tana adi pimunos asŭng, tana adi siabo ramus di ndi ong ong. Aku raan kuu bagan Aku Sama, ka dŭhnyah tia nyipunok Aku.

²⁰ Pak keya ka sawŭn adi dŭh tŭtŭd, kuu dŭh tŭtŭd di Aku. Aku, adi TUHAN, mbŭh minyu.”

²¹ Agi sirŭŭn dog dingah di tibung tibung sandah, anŭ inŭh sirŭŭn daya Israel sien mite turung, sabab ngara mbŭh udip darŭm dosa ka mbŭh kambŭt TUHAN adi Tapa ngara.

²² Pari, sopŭrŭg ngan adi mbŭh bu tagan TUHAN; Ayŭh re pibua angān ka bada angān tŭtŭd. Angān nang, “Sawŭ, kieh pari ka TUHAN, sabab Ayŭh inŭh Tapa ami.

²³ Sambah adat karŭm ami di tibung tibung sandah inŭh au-tarun. Pinurung yŭn Israel kaŭs-i mandŭg so TUHAN adi Tapa ami.

²⁴ Pak nyambah Baal, tapa adi taban mangŭh, mating nyiramat dāng kudip ami, anak anak dari ami ngga anak anak dayung ami; anŭ inŭh sopŭrŭg adi tayung-babuk ami mbŭh dapŭd so turang udas ngara so jaman jah.

²⁵ Kieh patut guring darŭm mangŭh ka bada mangŭh ami nutu kieh. Kieh ngga tayung-babuk ami mbŭh ari bidosa rawan TUHAN adi Tapa ami; kieh bŭn tunda pinyipesan-I.”