JEREMIAH 28 - Hakcipta - Biatah Bidayuh

Jeremiah ngga Nabi Hananiah

¹ Di sawa anŭ gŭh, buran adi rimŭh darŭm sawa adi pat Zedekiah jadi raja, Hananiah anak Azzur, ndi naan nabi so kupo Gibeon, minyu ngga aku di Ramin TUHAN. Di sirung jawin bara imam ngga bara daya ayŭh kidaan di aku

² nang TUHAN Bisa-pŭrŭg, adi Tapa Israel, mbŭh nang: “Aku mbŭh mata kuasa raja Babylonia.

³ Darŭm tipuh duwŭh sawa Aku re taban pari ka tarun yŭn ati sopŭrŭg rata Ramin Ku adi Raja Nebuchadnezzar mbŭh taban ngga bu ka Babylonia.

⁴ Aku re taban pari gŭh raja Judah, Jehoiachin anak Jehoiakim, samŭn sopŭrŭg daya Judah adi dog taban bu ka Babylonia. Sawŭ, Aku re mata kuasa raja Babylonia. Aku, adi TUHAN, mbŭh minyu.”

⁵ Komŭnŭ di sirung jawin bara imam ngga sopŭrŭg daya adi mijog darŭm Ramin TUHAN, aku nang di Hananiah:

⁶ “Kana raru! Aku harap TUHAN sawŭ re ndai simŭnŭ! Aku manŭn harap Ayŭh re bada pinganang-binabi mu jadi bitŭtŭk ka re taban ngga pari so Babylonia sopŭrŭg rata Ramin TUHAN ngga sopŭrŭg daya adi dog taban ngga bu jadi daya-takap.

⁷ Pak dingah kayuh adi aku nang di kuu ka di bara daya.

⁸ Bara nabi muko minyu jah, diŭ so jaman ku ngga jaman mu, ninjau nang perang, udip sikirau, ka andam re mandŭg ka bagŭ bangsa ngga pritah adi bikuasa.

⁹ Pak nabi adi ninjau udip damai bisa dog trima sawŭ nabi adi dog pait TUHAN kambŭi kayuh adi-i ninjau jadi bitŭtŭk.”

¹⁰ Komŭnŭ Hananiah tambit parang-punggo bajak so punggo ku, mata-i bada randŭk,

¹¹ ka nang di sirung jawin sopŭrŭg daya: “TUHAN mbŭh nang simuti inŭh Ayŭh re mata parang-punggo adi Raja Nebuchadnezzar mbŭh na di punggo sopŭrŭg bangsa; ka Ayŭh re ndai simŭnŭ darŭm tipuh duwŭh sawa.” Komŭnŭ aku bu.

¹² Mua tian-i ripas anŭ TUHAN bada aku

¹³ di ka yŭn Hananiah ka nang sakati: “TUHAN mbŭh nang, kuu dapŭd mata parang-punggo bajak adi dog ndai so kayuh, pak Ayŭh re gati-i ngga parang-punggo adi dog ndai so basi.

¹⁴ TUHAN Bisa-pŭrŭg, adi Tapa Israel, mbŭh nang Ayŭh re na parang-punggo adi dog ndai so basi di tunduh sopŭrŭg bangsa ati, ka ngara re bituan di Raja Nebuchadnezzar so Babylonia. TUHAN mbŭh nang Ayŭh re bada, ndŭg ka dāng dāng, bituan di Nebuchadnezzar.”

¹⁵ Jadi aku nang sakanŭ di Hananiah, ka aku nang gŭh, “Dingah, Hananiah! TUHAN mating pait kuu, ka kuu bada bara daya ati sabah pinganang kadong.

¹⁶ Ngapŭi adŭp TUHAN nang adŭp-I re bada kuu miyap. Diŭ so sawa ati ripuan kuu re kabŭs sabab kuu bada bara daya ati rawan TUHAN.”

¹⁷ Ka Hananiah kabŭs darŭm buran adi ju sawa anŭ.