JEREMIAH 26 - Hakcipta - Biatah Bidayuh

Jeremiah Dog Bisara

¹ Dŭh tui kan Jehoiakim anak Josiah mbŭh jadi raja Judah,

² TUHAN nang di aku, “Mijog di badag Ramin TUHAN ka piagah sopŭrŭg kayuh adi Aku mbŭh pesan bada kuu nang di daya adi mandŭg so kupo kupo Judah di nyambah diginŭ. Dŭh bada ndi buwa pinganang anŭ kurang.

³ Kadŭ daya anŭ raan dingah ka pasan aran pimudip ngara. Kambŭi ngara sawŭ pasan, Aku re nukar gŭh pikir Ku pasar pinyirusag adi Aku mbŭh ngatur bada nyatŭk ngara amai sopŭrŭg pingandai ginaka ngara.”

⁴ TUHAN bada aku kidaan di ngara, “Aku, adi TUHAN, mbŭh nang angān dŭh siŭn dŭh nundok di Aku ka tunda ajar adi Aku mbŭh nggen di angān,

⁵ ka mbit piduri di pinganang bara urun Ku, adi bara nabi, adi Aku marar pait ka angān. Angān bŭn tunda kayuh adi ngara nang.

⁶ Kambŭi angān babŭ abah dingah pinganang, Aku re ndai di Ramin Ku ati kayuh adi Aku mbŭh ndai di Shiloh, ka sopŭrŭg bangsa di ong re pakai dŭn kupo ati ndu pangu.”

⁷ Bara imam, bara nabi, ngga sopŭrŭg daya dingah aku nang kayuh anŭ di Ramin TUHAN,

⁸ ka kan aku muko nang sopŭrŭg adi TUHAN mbŭh pesan bada aku nang, ngara nakap aku ka nyirais, “Kuu patut dog siŭ!

⁹ Mani kuu nang ngga adŭn TUHAN nang Ramin TUHAN ati re jadi mun Shiloh ka kupo ati re dog pirabur ka mating daya re rŭŭ dieh?” Komŭnŭ daya bagŭ tikuruk maning aku.

¹⁰ Kan bara pinguru Judah dingah kayuh adi mbŭh jadi, ngara ngga sirikas ruah so istana di ka Ramin TUHAN ka guru di Tiban Bauh.

¹¹ Komŭnŭ bara imam ngga bara nabi nang di bara pinguru ka di bara daya bagŭ, “Daya ati patut dog nggen ukum kabŭs sabab ayŭh mbŭh minyu rawan kupo ta. Angān dingah ayŭh ngga kajit adŭp ngan.”

¹² Komŭnŭ aku nang, “TUHAN pait aku bada piagah sopŭrŭg kayuh adi angān dingah aku nang pasar Ramin TUHAN ati ka pasar kupo ati.

¹³ Angān dŭh siŭn dŭh ngubah aran pimudip ngan samŭn kayuh adi angān ndai, ka dŭh siŭn dŭh nundok di Tapa ngan. Kambŭi angān ndai simŭnŭ, Ayŭh re nukar pikir-I pasar pinyirusag adi Ayŭh nang re bada nyatŭk angān.

¹⁴ Ka aku ati, Aku darŭm kuasa ngan! Ndai di aku ani ani adi angān pikir tŭnggŭn ka batur.

¹⁵ Pak ingat ati: kambŭi angān siŭ aku, angān ngga bara daya adi rŭŭ darŭm kupo ati re bidosa amai siŭ daya adi dŭh sarah, sabab TUHAN inŭh adi pait aku bada nggen di angān pinyibakan anŭ.”

¹⁶ Komŭnŭ bara pinguru anŭ ngga bara daya nang di bara imam ngga di bara nabi, “Daya ati minyu ngga ata ngga adŭn TUHAN adi Tapa ta; ayŭh patut dog nggen ukum kabŭs.”

¹⁷ Ko anŭ, agi ndi naan so bara nyamba bangsa mijog ka nang di bara daya adi tikuruk diginŭ,

¹⁸ “Di andu Hezekiah jadi raja Judah, nabi Micah so Moresheth kidaan di sopŭrŭg daya nang TUHAN Bisa-pŭrŭg mbŭh nang, ‘Zion re dog majak mun ŭmŭh, Jerusalem re jadi tugung rakang tibawang, ka sandah Ramin TUHAN re jadi tuān.’

¹⁹ Raja Hezekiah ngga bara daya Judah dŭh siŭ Micah. Hezekiah tanŭ ka stabi di TUHAN ka suba mite masi so Ayŭh. Ka TUHAN nukar pikir-I pasar pinyirusag adi Ayŭh nang adŭp-I an bada nyatŭk ngara. Ka madin ata gŭh mbŭh sindŭk re an bada pinyirusag bās nyatŭk adŭp ta.”

²⁰ (Agi ndi naan adi bŭkŭn, Uriah anak Shemaiah so Kiriath Jearim, adi ko minyu ngga adŭn TUHAN rawan kupo ati ka bangsa ati sak Jeremiah.

²¹ Kan Raja Jehoiakim ngga bara soldadu ka bara pinurung-i dingah kayuh adi Uriah nang, raja suba an bada ayŭh dog siŭ. Pak Uriah agi dingah; ka ayŭh ngga taru rasu bu ka Egypt.

²² Pak Raja Jehoiakim pait Elnathan anak Achbor ngga kada daya so Egypt bada di nakap Uriah.

²³ Ngara taban ayŭh pari ka Jehoiakim, adi siŭ ayŭh, ka tadang-i ngara taran di kubur-ratus.)

²⁴ Pak sabab aku dog turung Ahikam anak Shaphan, aku dŭh dog nyerah ka tangan daya bagŭ anŭ yŭn dog siŭ.