JEREMIAH 25 - Hakcipta - Biatah Bidayuh

Pinganyu so Utara

¹ Di sawa adi pat Jehoiakim, anak Josiah, jadi raja di Judah, aku trima pinganang so TUHAN pasar sopŭrŭg daya Judah. (Anŭ inŭh darŭm sibungas sawa Nebuchadnezzar jadi raja Babylonia.)

² Aku nang di sopŭrŭg daya Judah ngga daya Jerusalem,

³ “Sitŭkŭd duwŭh puru-taruh sawa, so sawa adi simŭng taruh Josiah anak Amon jadi raja Judah ndŭg andu ati, TUHAN mbŭh minyu ngga aku, ka aku bŭn dŭh kidaan di angān kayuh adi-I nang. Pak angān dŭh mbit piduri.

⁴ Angān abah dingah bait mbit piduri, pŭn ka TUHAN marar pait ka angān urun urun-I adi bara nabi.

⁵ Ngara bada angān dŭh tia udip ginaka ka dŭh tia ndai pingandai arap, isa angān dapŭd adu adu rŭŭ di tarun tana adi TUHAN mbŭh nggen di angān ngga di tayung-babuk ngan ndu tana bisaka.

⁶ Ngara bada angān dŭh tia nyambah ka bituan di tapa tapa bŭkŭn ka dŭh tia kinuas TUHAN ngga pingandai ngan adi nyambah tibudo adi adŭp angān ndai. Kambŭi angān tunda pinganang TUHAN, tatu Ayŭh dŭh ngukum angān.

⁷ Pak adŭp TUHAN nang, angān inŭh adi abah tunda pinganang-I. Angān tanŭ ka mbŭh kinuas Ayŭh ngga pingandai ngan adi nyambah tibudo ka mbŭh bada ukum-I nyatŭk adŭp ngan.

⁸ “Ngapŭi meh, sabab angān dŭh dingah pinganang-I, TUHAN Bisa-pŭrŭg nang,

⁹ ‘Aku re bagan sopŭrŭg daya di utara samŭn urun Ku, Raja Nebuchadnezzar so Babylonia. Aku re bada ngara rawan Judah ngga sopŭrŭg adi rŭŭ dieh samŭn bangsa bangsa adi rŭŭ maning-i. Aku re pirabur bangsa ati samŭn ngara adi maning-i ka tandah-i adu adu jadi tibawang. Anŭ re kayuh adi sipŭ ka adi gŭgŭh daya kiris. Aku, adi TUHAN, mbŭh minyu.

¹⁰ Aku re bada pajam sirais pawŭn ngga gaŭn ngara samŭn jawŭn rami gawai banan sawan ngara. Ngara re dŭh biyŭn inyo yŭn pritah ngara, ka re mating gandom.

¹¹ Ndi tarun tana rais ati re jadi tibawang ka re jadi kayuh adi sipŭ ka adi gŭgŭh daya kiris, ka bangsa bangsa adi maning-i re bituan di raja Babylonia sitŭkŭd ju puru sawa.

¹² Ripas anŭ Aku re ngukum Babylonia ngga raja-i amai dosa ngara. Aku re pirabur rais anŭ ka bada-i jadi tibawang adu adu.

¹³ Aku re ngukum Babylonia pakai sopŭrŭg pinyirusag adi Aku nang an bada nyatŭk bangsa bangsa kan Aku minyu so baba Jeremiah, anŭ inŭh pinyirusag adi dog nuris darŭm surat ati.

¹⁴ Aku re maras daya Babylonia yŭn kayuh adi ngara mbŭh ndai, ka bagŭ bangsa ngga raja raja adi bās re bada ngara jadi urun.’ ”

Ukum Tapa yŭn Bangsa Bangsa

¹⁵ TUHAN, adi Tapa Israel, nang di aku, “Ta saker wain adi brisi ngga baji Ku. Taban-i ka bangsa bangsa adi Aku bada kuu tudu, ka bada ngara nok-i.

¹⁶ Kan ngara nok so saker ati, ngara re tibabeu ka re mun daya gira sabab perang adi Aku bada mandŭg ka ngara.”

¹⁷ Jadi Aku tambit saker anŭ so tangan TUHAN, nggen-i di sopŭrŭg bangsa adi TUHAN bada aku tudu, ka bada ngara nok so dieh.

¹⁸ Jerusalem ngga sopŭrŭg kupo kupo Judah, samah ngga raja raja ka bara pinguru ngara, dog bada nok so dieh, isa ngara jadi keya ka tarun tana-pajam, kayuh adi sipŭ ka adi gŭgŭh daya kiris, ka isa daya pakai dŭn ngara ndu pangu, nimun adi mbŭh ngara ndai ndŭg andu ati.

^19-26 Ati inŭh susud dŭn ngara adi bŭkŭn adi patut nok so saker anŭ: raja Egypt, bara pinurung-i ngga bara pinguru-i; sopŭrŭg daya Egypt ngga sopŭrŭg daya tami adi rŭŭ di Egypt; sopŭrŭg raja di tarun tana Uz; sopŭrŭg raja Philistine di kupo Ashkelon, kupo Gaza, kupo Ekron, ka bara daya adi babŭ udip di Ashdod; sopŭrŭg daya Edom, daya Moab, ngga daya Ammon; sopŭrŭg raja di Tyre ngga di Sidon; sopŭrŭg raja di purau purau Mediterranean; kupo Dedan, kupo Tema, ngga kupo Buz; sopŭrŭg daya adi bada ubok ngara purok; sopŭrŭg raja di Arabia; sopŭrŭg raja tibaran tibaran-asar di tarun tana-pajam; sopŭrŭg di Zimri, di Elam, ka di Media; sopŭrŭg raja di utara, adi jo ngga adi sindŭk, ndi ngga ndi ngara. Barang bangsa di tunduh tana ong patut nok so saker anŭ. Sikasŭn-i adŭp raja Babylonia re nok so dieh.

²⁷ Komŭnŭ TUHAN nang di aku, “Kidaan di sopŭrŭg daya anŭ nang Aku, adi TUHAN Bisa-pŭrŭg, adi Tapa Israel, pesan ngara bada nok ndŭg ka ngara mbŭh mabuk ka nguta, ndŭg ka ngara rabu ka dŭh dapŭd makat, sabab perang adi Aku pait ka ngara.

²⁸ Ka kambŭi ngara abah tambit saker anŭ so tangan mu ka dŭh nok-i, kidaan di ngara nang TUHAN Bisa-pŭrŭg mbŭh nang ngara babŭ gŭh re nok so saker anŭ.

²⁹ Aku re piguru pinyirusag anŭ di kupo adŭp Ku. Ngara pikir ngara re dŭh dog ukum kah? Ngara manŭn re dog ukum, amai Aku re pait perang ka sopŭrŭg bangsa di ong. Aku, adi TUHAN Bisa-pŭrŭg, mbŭh minyu.

³⁰ “Kuu, Jeremiah, dŭh siŭn dŭh piagah sopŭrŭg kayuh adi Aku mbŭh nang. Kuu dŭh siŭn dŭh kidaan di ngara nang, ‘TUHAN re ngŭr so shorga ka bidudū so rangit adi siabo bigatung. Ayŭh re ngŭr bara daya-I; Ayŭh re nyirais keya ka daya ngindik-mŭ buwa anggor. Barang naan daya di ong re dingah Ayŭh,

³¹ Bana jawŭn sirŭŭn-I re dog dingah ndŭg bŭngŭn bŭngŭn ong. TUHAN mbŭh nyarah bangsa bangsa. Ayŭh re taban bangsa bangsa ngga bisara ka daya ginaka re dog nggen ukum kabŭs. TUHAN mbŭh minyu.’ ”

³² TUHAN Bisa-pŭrŭg nang pinyirusag re nyatŭk bangsa bangsa ndi ngga ndi, ka pinyirusag bās anŭ keya ka sabak ribut mbŭh sidia adŭp-i jeh di bŭngŭn ong.

³³ Di andu anŭ tadang ngara adi TUHAN mbŭh siŭ re mingare di ong so tŭbŭn ndi ndŭg tŭbŭn andi. Mating daya re ngurid ngara, ka ngara re dŭh dog tambit ka dog kubur. Ngara re prigure di tunduh tana mun tugung tamŭh.

³⁴ Sien angān, bara pinguru, angān bara pingingat daya Ku, sien bana! Ngurid ka gurai marik adŭp ngan di tana. Tika re mandŭg adi ngga ngan dog siŭ, ka angān re dog natad mun dari biri.

³⁵ Angān re dŭh dapŭd pirupas adŭp ngan.

^36-37 Angān nyidaing buang sien darŭm susah sabab TUHAN darŭm baji-I mbŭh pirabur bangsa ngan, ka rais ngan adi darŭm damai Ayŭh nyirubuh.

³⁸ TUHAN mbŭh tagan daya-I mun singah tagan rubang-i. Pinyisipŭ perang ngga baji TUHAN mbŭh bada rais ati marui jadi tarun tana-pajam.