JEREMIAH 22 - Hakcipta - Biatah Bidayuh

Pinganang Jeremiah yŭn Rawang Raja di Judah

^1-2 TUHAN bada aku di ka istana raja di Judah, adi sesang David, ka diginŭ kidaan di raja, bara pinurung-i, ka bara daya Jerusalem bada dingah kayuh adi TUHAN nang:

³ “Aku, adi TUHAN, pesan angān bada ndai kayuh adi tŭnggŭn ka batur. Grindung daya adi dog nipu so sianŭ adi nipu ayŭh. Dŭhnyah ida ida bait kinanyuh daya tami, anak tumang, bait dayung uban; ka dŭhnyah siŭ daya adi dŭh sarah di tarun yŭn adi kudus ati.

⁴ Kambŭi angān sawŭ ndai nanyam adi pesan Ku, bara sesang David re adu adu jadi raja. Ka ngara, samah ngga bara pinurung ka rayat ngara, re babŭ ruah mŭrŭt tiban tiban istana ati pakai krita kuda bait nunggang kuda.

⁵ Pak kambŭi angān dŭh tunda pesan Ku, Aku bipayu di angān nang istana ati re rubuh. Aku, adi TUHAN, mbŭh minyu.

⁶ “Di aku, istana raja di Judah inŭh ramus mun tarun tana Gilead ngga Darŭd Darŭd Lebanon; pak Aku re bada-i jadi tarun tana matung di yŭn daya mating rŭŭ dieh.

⁷ Aku pait daya bada pirabur-i. Ngara re taban kapak ka nyirubuh uros uros sedar-i anŭ adi ramus ka taran-i ka darŭm apui.

⁸ “Ripas anŭ bagŭ daya tami re murah ka siken dingan-i mani Aku, adi TUHAN, mbŭh ndai simŭnŭ di tunduh kupo bās anŭ.

⁹ Komŭnŭ ngara re nam nang anŭ mbŭh sabab angān mbŭh tagan simanya ngan ngga Aku, adi Tapa ngan, ka mbŭh nyambah ka bituan di tapa tapa bŭkŭn.”

Pinganang Jeremiah pasar Joahaz

¹⁰ Daya Judah, dŭhnyah muās Raja Josiah; dŭhnyah ngurid pinyikabŭs-i. Pak muās Joahaz, adi anak-i; ngara taban ayŭh ngga bu, ka dŭh re pari, re dŭh tia kiris tarun tana adi yŭn-i dog biranak.

¹¹ Pinganang TUHAN pasar Joahaz anak Josiah, adi gati sama-i jadi raja Judah, “Ayŭh mbŭh bu so ti, ka dŭh re pari.

¹² Ayŭh re kabŭs di rais adi ka ngara taban ayŭh, ka ayŭh re dŭh tia kiris tarun tana ati.”

Pinganang Jeremiah pasar Jehoiakim

¹³ Mbŭh payah inŭh daya adi pijog ramin-i ngga aran adi dŭh batur ka bada-i bayah ngga atin adi bidikok; adi bada dingan-i adi samah bangsa nyiraja braŭn ngga dŭh dog nggen gaji-i.

¹⁴ Mbŭh payah inŭh sianŭ adi nang “Aku re pijog istana yŭn adŭp ku ngga birit birit adi bayah di takah sambu.” Jadi ayŭh na pinjan pinjan di ramin-i nurap sindung darŭm-i ngga kayuh sedar ka chat-i bireh.

¹⁵ Bisa kah anŭ bada kuu jadi raja adi rabis kana kambŭi kuu pijog ramin ngga kayuh sedar, grua so tung daya bŭkŭn? Sama mu udip sanang. Ayŭh ari kana ngga daya ka bŭn marad ngga asi asi, ka ayŭh mujur darŭm sopŭrŭg pingandai-i.

¹⁶ Ayŭh ngatur har daya sirata ngga pinyitŭnggŭn, ka sopŭrŭg kayuh tirase di ayŭh. Anŭ inŭh rati-i puan TUHAN.

¹⁷ Pak kuu kaŭs kuu jiroh utung yŭn adŭp mu; kuu siŭ daya adi dŭh sarah ka ngga ganas kinanyuh rayat mu. TUHAN mbŭh minyu.

¹⁸ Ngapŭi meh, TUHAN minyu pasar Jehoiakim anak Josiah, adi raja Judah, “Mating daya re ngurid pinyikabŭs-i ka nang, ‘Adoh hoh, jerā ku, adoh hoh!’ Mating daya re muās ayŭh ka nang, ‘Tadah, Tuan ku!’

¹⁹ Mun pinyikubur kaldi ayŭh dog tarik ngga bu ka dog taran di sapa tiban Jerusalem.”

Pinganang Jeremiah pasar Nasip Jerusalem

²⁰ Daya Jerusalem, di ka Lebanon ka nyirais, di ka tarun tana Bashan ka sien; bagan so darŭd darŭd Moab, sabab sopŭrŭg pambit ngan mbŭh dog ngarah.

²¹ TUHAN minyu ngga angān di tipuh angān mujur ka kaya, pak angān abah dingah. Simŭnŭ inŭh angān sitŭkŭd udip ngan; angān abah nundok di TUHAN.

²² Bara pinguru ngan re dog poh sabak, bara pambit ngan dog taban ngga bu jadi daya-takap darŭm perang, kupo ngan dog ngamun ka dog kinarap sabab sopŭrŭg pingandai arap ngan.

²³ Angān rŭŭ darŭm damai amai dog kirurung uros uros sedar Lebanon; pak tadah gŭh angān kan andam nyatŭk angān, andam nyam sarang andam dayung re biranak.

Tapa Ngukum Jehoiachin

²⁴ TUHAN nang di Raja Jehoiachin adi anak Jehoiakim so Judah, “Siragi Aku ati Tapa adi udip, sunggu kambŭi-i kuu sisin patis di trinju tauh Ku, Aku re tarik kadi kuu

²⁵ ka nggen kuu di daya adi kuu taru, daya adi raan siŭ kuu. Aku re nggen kuu ka Raja Nebuchadnezzar so Babylonia samŭn di bara soldadu-i.

²⁶ Aku re taran kuu ngga sindŭ mu ka rais tami. Angān duwŭh re di ka rais adi dŭh yŭn ngan dog biranak, ka angān duwŭh re kabŭs diginŭ.

²⁷ Kuu re raru jabŭng raan tingga rais ati dinge, pak kuu re dŭh pari.”

²⁸ Aku nang, “Agi kah Raja Jehoiachin jadi keya ka tipayan adi pape adi dog taran ka mating daya raan-i? Anŭ kah sabab ayŭh ngga bara anak-i dog taran ka rais tami, rais adi dŭh ngara puan?”

²⁹ O tarun tana rais ku, tana ku! Dingah kayuh adi TUHAN nang:

³⁰ “Daya anŭ inŭh dog nunggu ka dog natu anak anak-i re mating, jadi daya adi re bŭn mujur. Ayŭh re dŭh biyŭn sesang adi re mritah di Judah nimun bara daya adi gati David. Aku, adi TUHAN, mbŭh minyu.”