JEREMIAH 2 - Hakcipta - Biatah Bidayuh

Tapa Kingat Israel

¹ TUHAN bada aku

² piagah pinganang ati di barang naan daya di Jerusalem. “Aku ingat munki masam tŭtŭd kuu di tika kuu gibabŭ sŭ, munki masam kuu rindu Aku di tika kuu bauh ko sawan; kuu tunda Aku mutas tarun tana-pajam, mutas tana adi bŭn dog ngŭmŭh.

³ Israel, kuu dog dapu Aku sadi; kuu inŭh rata kudus Ku. Aku pait udip sangsara ngga pinyirusag di barang naan adi bada kuu kinaman. Aku, adi TUHAN, mbŭh minyu.”

Dosa Tayung-babuk Israel

⁴ Dingah pinganang TUHAN, angān bara sesang Jacob, angān adi tibaran-asar Israel.

⁵ TUHAN nang: “Ani anŭ adi yŭn tayung-babuk ngan nyarah Aku? Ani bada ngara bu tagan Aku? Ngara nyambah tibudo adi dŭh biguna ndŭg ka adŭp ngara jadi dŭh biguna.

⁶ Ngara dŭh piduri Aku, sunggu Aku pirupas ngara so Egypt ka taban ngara mutas tarun tana-pajam: tana sumat ngga sandah sumat, tarun adi badŭh buang rapā yŭn kayuh adi arap adi mating daya rŭŭ dieh ka mating daya raan mutas.

⁷ Aku taban ngara ka tarun tana adi damŭn, isa ngara dapŭd pingatŭm adi kana ngga masam masam kayuh adi kana so dieh. Pak ngara pirusak tana Ku; ngara nyembar rais adi Aku nggen di ngara.

⁸ Bara imam mating siken, ‘Diki TUHAN?’ Bara imam Ku dŭh puan Aku. Bara pimritah birawan matah Aku; bara nabi minyu ngga dŭn Baal ka nyambah tibudo adi dŭh biguna.

TUHAN rawan Bara Daya-I

⁹ “Ngapŭi Aku re taban angān ngga bisara ka nyarah angān. Aku re nyarah gŭh bara sesang ngan.

¹⁰ Panu ka barat di ka purau Cyprus, ka pait daya ka timor bada di ka purau Kedar. Angān re kiris mating kayuh mun ati ko jadi dawŭ-i.

¹¹ Bŭn bangsa bŭkŭn nyambi tapa-i, sunggu tapa ngara dŭh sawŭ. Pak daya Ku mbŭh nyambi Aku, Tapa adi ko nggen stabi di ngara, ngga tapa adi dŭh dapŭd ndai ani ani yŭn ngara.

¹² Ngapŭi Aku nggen ukum di rangit bada bigugoh sabab taru, sabab nginga ka gŭgŭh,

¹³ amai daya Ku mbŭh ndai duwŭh dosa: ngara mbŭh tagan Aku, atak piin bisig, ka ngara mbŭh kareh pagong, pagong adi siret ka adi dŭh adŭ dapŭd nyikŭn piin.

Pinŭbŭn yŭn Israel adi Dŭh Tŭtŭd

¹⁴ “Israel dŭh urun; ayŭh dŭh dog biranak jadi urun. Mani meh garang pinganyu-i an pirinda ayŭh?

¹⁵ Ngara ngŭr ayŭh keya ka singah; ngara mbŭh bada tarun tana-i jadi tarun tana-pajam, ka kupo kupo-i jadi tibawang, ka bŭn dog tudu.

¹⁶ Sawŭ, ngara so Memphis ngga Tahpanhes mbŭh mape tikurok-i.

¹⁷ Israel, kuu bada kayuh ati nyatŭk adŭp mu! Kuu tagan Aku, adi TUHAN Tapa mu, darŭm Aku kayak nyiruton kuu.

¹⁸ Ani re mu dapŭd kambŭi kuu pari ka Egypt an nok piin so Yang Nile? Ani re mu dapŭd kambŭi kuu pari ka Assyria an nok piin so Yang Euphrates?

¹⁹ Arap adŭp mu re ngukum kuu, ka urah mu adi tagan Aku re nunggu kuu. Kuu re puan munki masam sipŭ buang arap-i kuu tagan Aku, adi TUHAN Tapa mu, buang kuu mbŭh dŭh tia tŭtŭd di Aku. Aku, adi TUHAN Raja adi Bisa-pŭrŭg, mbŭh minyu.”

Israel Abah Nyambah TUHAN

²⁰ TUHAN Raja nang, “Israel, jah-i kuu tirawan kuasa Ku; kuu abah nundok di Aku bait nyambah Aku. Di tunduh barang sandah ka di ribo barang tŭngŭn kayuh barŭm kuu nyambah tapa tapa pimuah.

²¹ Aku purun kuu keya ka purun tŭngŭn anggor adi kana so ruwang adi siabo kana. Pak tingga ani pinyadi mu! Kuu mbŭh keya ka tŭngŭn anggor adi madam ka adi dŭh biguna.

²² Sunggu kuu bandar bandar ngu adŭp mu ngga sabun adi bake, Aku re babŭ kiris tameg sarah mu.

²³ Simuki kuu re nang adŭp mu mating nyembar adŭp mu, nang adŭp mu bŭn nyambah Baal? Tingga pingandai mu di rubān; kuu mbŭh bidosa diginŭ. Kuu mbŭh keya ka dayung onta adi mbŭh mingaras, bikaduh kamati kamanŭ,

²⁴ ka radus di ka tarun tana-pajam. Kan-i mbŭh mingaras, asi re dapŭd muak ayŭh? pak dari adi raan ayŭh dŭhsah pijera adŭp-i bandar bandar jiroh; amai darŭm buran-i anŭ dayung onta ari agi dog dapŭd.

²⁵ Israel, dŭhnyah pijera kaja mu, dŭhnyah bada gungong mu badŭh tadak tapa bŭkŭn. Pak kuu nang, ‘Dŭh! aku dŭh bisa pari. Aku mbŭh rindu tapa tapa bŭkŭn ka aku re tudu ngara.’ ”

Israel Patut dog Ukum

²⁶ TUHAN nang, “Nimun pinaku dog pimangŭh kan-i dog nakap, simŭnŭ inŭh sopŭrŭg ngan daya Israel samŭn raja raja ngan ngga bara pinurung ngan, imam imam ngga bara nabi ngan.

²⁷ Sopŭrŭg ngan re dog pimangŭh; angān adi nang tŭngŭn kayuh inŭh sama ngan ka batuh inŭh sindŭ ngan. Kayuh ati re jadi sabab angān bu tagan Aku darŭm angān patut marik pimudip ngan pari ka Aku. Pak kan angān dog pinyusah, angān bagan Aku bada mandŭg di nyiramat angān.

²⁸ “Diki tapa tapa anŭ adi ko angān ndai yŭn adŭp ngan? Kan angān dog pinyusah, bada ngara nyiramat angān, kambŭi ngara dapŭd? Judah, kuu biyŭn raru bagŭ tapa kiang dudu kupo mu.

²⁹ Ani anŭ adi yŭn mu mingungut? Mani kuu nyakar Aku?

³⁰ Aku ngukum kuu, pak mating guna-i; kuu abah dingah ajar Ku. Keya ka singah, kuu mbŭh siŭ nabi nabi mu.

³¹ Daya Israel, dingah kayuh adi Aku nang. Mbŭh kah Aku mun tarun tana-pajam di kuu, mun tarun tana adi karŭm buang rapā yŭn masam masam pinyusah? Mani, meh, kuu nang adŭp mu raan ndai kayuh nanyam raan asŭng adŭp mu, ka dŭh re pari ka Aku?

³² Mbŭh kah dayung bujang kambŭt pimakai mas-i, bait pingaten dayung kambŭt piraka adi nēn-i di tika sawan? Pak daya Ku mbŭh kambŭt Aku, ka mbŭh kambŭt Aku rabis tui so tungang dog kira.

³³ Kuu manŭn puan munki piripong ambai mu. Dayung adi siabo arap dapŭd gŭh birajar so kuu.

³⁴ Piraka mu bitameg ngga deya daya sirata ka deya daya adi dŭh biyŭn sarah, dŭh ngga deya pinaku adi dog nakap, “Pak sunggu-i mun anŭ,

³⁵ kuu nang, ‘Aku dŭh sarah; tatu TUHAN dŭh re adu adu baji di aku.’ Pak Aku, adi TUHAN, re ngukum kuu sabab kuu dŭh ngaku adŭp mu bidosa.

³⁶ Kuu pirabu adŭp mu darŭm kuu tunda tapa tapa bangsa bŭkŭn. Kuu re asa bada Egypt, nimun Assyria ko piasa kuu.

³⁷ Kuu re bu so Egypt, buang ubak mu mutu amai mangŭh. Aku, adi TUHAN, mbŭh tirawan ngara adi kuu sabah; kuu dŭh re dapŭd ani ani so ngara.”