JEREMIAH 18 - Hakcipta - Biatah Bidayuh

Jeremiah di Ramin Tukang Priok

¹ TUHAN nang di aku,

² “Panu di ka ramin tukang priok, di yŭn Aku re nggen di kuu pinganang Ku.”

³ Jadi aku di kamanŭ ka kiris tukang priok anŭ aŭn ndai priok.

⁴ Kan priok adi-i ndai dŭh sukup kana, ayŭh ndai-i bada jadi kayuh bŭkŭn.

⁵ Komŭnŭ TUHAN nang di aku,

⁶ “Dŭh kah Aku biyŭn hak di tunduh ngan daya Israel mun tukang priok anŭ ngga tana riyat-i? Angān darŭm tangan Ku nimun tana-riyat darŭm tangan tukang priok.

⁷ Kambŭi di ndi tika Aku nang Aku re dimbut, nyirubuh, bait pirabur bangsa puan kah pritah,

⁸ pak ko anŭ bangsa anŭ marik pimudip-i dŭh tia ndai arap, Aku dŭh re ndai kayuh adi Aku nang adŭp Ku re ndai.

⁹ Simŭnŭ gŭh, kambŭi Aku nang adŭp Ku re purun bait pijog ndi bangsa puan kah pritah,

¹⁰ pak ko anŭ bangsa anŭ dŭh dingah pinganang Ku buang ndai arap, Aku dŭh re ndai kayuh adi Aku nang adŭp Ku re ndai.

¹¹ Madin, kidaan di daya Judah ka di daya Jerusalem nang Aku mbŭh bisatur an rawan ngara ka mbŭh re sidia an ngukum ngara. Kidaan di ngara bada dŭh tia udip bidosa, ka ngubah aran pimudip ngara samŭn kayuh kayuh adi ngara ndai.

¹² Ngara re nam, ‘Re ngga mani? Kieh re babŭ baking ka arap mun adi mbŭh.’ ”

Daya Israel Tirawan TUHAN

¹³ TUHAN nang, “Siken barang bangsa agi kah kayuh mun anŭ ari jadi dawŭ-i. Daya Israel mbŭh ndai kayuh adi sipŭ!

¹⁴ Mbŭh kah salju miyap so darŭd batuh Lebanon? Mbŭh kah anak anak sungi-i adi madud anŭ badŭh?

¹⁵ Pak daya Ku kambŭt Aku; ngara badang kimanyan ka tibudo. Ngara mbŭh sikak sikakong di aran adi ngara mien, ngara dŭh tia kadŭg aran adi amba; ngara panu di aran adi bayuh dog pirata.

¹⁶ Ngara mbŭh bada tarun tana ati jadi kayuh adi pitaru, jadi kayuh adi dog ngamun adu adu. Sopŭrŭg adi murah re gŭgŭh bada kayuh adi ngara kiris; ngara re kuting ubak ngara amai inga inga.

¹⁷ Aku re bada daya Ku papar sasah di sirung jawin pinganyu ngara, mun dabu tana dog poh sabak so timor. Aku re nyipunok ngara; Aku dŭh re turung ngara kan pinyirusag mandŭg.”

Pekat rawan Jeremiah

¹⁸ Komŭnŭ daya nang, “Ja ata bipekat rawan Jeremiah! Re ari agi imam adi an ngajar ata, daya bijak adi an pitayan ata, ka bara nabi adi an piagah pinganang so Tapa. Ja ata nyarah ayŭh, ka dŭh tia dingah kayuh adi nang-i.”

¹⁹ Jadi aku bidua, “TUHAN, dingah kayuh adi aku nang ka nyiringa kayuh adi pinganyu ku nang pasar aku.

²⁰ Patut kah pinyikana dog maras ngga kayuh adi arap? Ngara mbŭh kareh rubang isa aku rabu ka darŭm-i. Ingat munki aku mandŭg ka Kaam ka minyu ngarun ngara, isa Kaam dŭh ngukum ngara darŭm baji Mai.

²¹ Pak madin, TUHAN, tandah anak anak ngara kabŭs sikirau; tandah ngara dog siŭ darŭm perang. Tandah bara dayung ngara dŭh biyŭn banŭh ngga anak, amai mbŭh abo kabŭs. Tandah bara dari ngara kabŭs mandam ka dari adi mara dog siŭ darŭm perang.

²² Pait pirupak bada nyirŭgŭh pirinda ramin arŭn ngara; ka ngara re nyirais darŭm taru. Ngara mbŭh kareh rubang isa aku rabu ka darŭm-i ka mbŭh tŭŭn jarat ngga kudog aku.

²³ Pak, TUHAN, Kaam puan sopŭrŭg pekat ngara, an siŭ aku. Dŭhnyah apun arap ngara bait apun dosa ngara. Tandah ngara arah ka ngukum ngara darŭm Kaam baji.”