JEREMIAH 17 - Hakcipta - Biatah Bidayuh

Dosa ngga Ukum yŭn Judah

¹ TUHAN nang, “Daya Judah, dosa ngan mbŭh dog nuris ngga pen basi. Dosa ngan dog mŭŭt di atin ngan ngga pen itan ka dog mŭŭt di sikuh sikuh mija-sambah.

² Daya ngan nyambah di mija-sambah ka di tandā pinatŭng adi dog pijog yŭn tapa Asherah ngapid barang tŭngŭn kayuh barŭm, di tibung sandah

³ ka di tunduh darŭd darŭd di sapa tarun tana rais. Aku re bada pinganyu ngan taban ngga bu pinyikaya ngan ngga buat-rata ngan sabab sopŭrŭg dosa adi angān mbŭh ndai di ndi tarun tana rais.

⁴ Angān an dŭh an pasan tana adi Aku mbŭh nggen di angān, ka Aku re bada angān bituan di pinganyu ngan di tarun tana adi angān dŭh puan, sabab baji Ku mbŭh mun apui, ka-i bijagu adu adu.”

Dudu Pinganang

⁵ TUHAN nang, “Aku re nunggu ngara adi bu tagan Aku ka sabah di manusia, di pinyibake daya adi bisa kabŭs.

⁶ Ngara keya ka randa di tarun tana-sumat, adi udip di tarun tana-pajam adi badŭh, di tana pide di yŭn mating kayuh timbu. Daya adi mun anŭ bŭn kinyam kayuh adi kana.

⁷ “Pak Aku re nyiberkat ngara adi na pinyabah ngara di Aku.

⁸ Ngara mbŭh keya ka tŭngŭn tŭngŭn kayuh adi timbu sindŭk anak sungi ka uat-i prijireu ndŭg piin. dŭh-i taru tipuh paras, sabab dawŭn-i adu adu barŭm; dŭh-i bipito kan andu dŭh ujen; ka-i marar buān.

⁹ “Asi dapŭd mirati atin manusia? Mating kayuh bŭkŭn re rabis bidikok mun atin manusia; atin anŭ mbŭh sera andam-i.

¹⁰ Aku, adi TUHAN, kāp pikir manusia ka suba atin manusia. Aku nggen di barang naan daya nanyam ka gaya pimudip-i, nanyam ka kayuh adi-i ndai.”

¹¹ Daya adi dapŭd duit so aran adi dŭh batur inŭh keya ka manuk mupus turoh adi dŭh adŭp-i ruwan. Kan umbur-i mbŭh piaŭn pinyikaya-i re miyap ka pinŭbŭn-i ayŭh anŭ daya budo.

¹² Ramin TUHAN ta inŭh keya ka takta adi bibragah, mijog di tunduh darŭd adi bigatung so sibungas-i.

¹³ TUHAN, Kaam inŭh pingarap Israel; sopŭrŭg adi tagan Kaam re dog pimangŭh. Ngara re miyap mun dŭn dŭn daya adi dog nuris di runas, sabab ngara mbŭh tagan Kaam, adi TUHAN, adi atak piin adi nggen udip.

Jeremiah Mite Turung so TUHAN

¹⁴ TUHAN, pibua aku ka aku re batur batur bua; nyiramat aku ka aku re sukup siramat. Kaam inŭh adi aku muji!

¹⁵ Daya nang di aku, “Diki meh tatang TUHAN adi an-I bada nyatŭk ata? Tandah Ayŭh piradus-i madin!”

¹⁶ Pak, TUHAN, aku bŭn ngasu Kaam taban pinyirusag ka ngara; Aku dŭh mite tika pinyusah yŭn ngara. TUHAN, Kaam puan kayuh anŭ; Kaam puan kayuh adi aku nang.

¹⁷ Dŭhnyah jadi kayuh adi pitaru aku; Kaam inŭh tarun yŭn adi siramat yŭn ku kan pinyusah mandŭg.

¹⁸ Pimangŭh daya adi kisiis aku, pak tandah aku, TUHAN. Bada ngara taru, pak dŭhnyah pitaru aku. Taban pinyirusag ka ngara ka pirandŭk ngara.

Sita Andu Sabbath

¹⁹ TUHAN nang di aku, “Jeremiah, panu di piagah pinganang Ku di Tiban Rayat, adi so raja raja Judah ruah mŭrŭt kupo; komŭnŭ di ka sopŭrŭg tiban Jerusalem adi bŭkŭn.

²⁰ Kidaan di raja raja ngga sopŭrŭg daya Judah ngga barang naan adi rŭŭ di Jerusalem ka adi mŭrŭt tiban tiban anŭ, bada dingah kayuh adi Aku nang.

²¹ Kidaan di ngara, kambŭi ngara siŭt asŭng ngara, ngara dŭh siŭn kabis kayuh di andu Sabbath; ngara dŭh siŭn taban tadŭ tadŭ kayuh adi bat mŭrŭt tiban tiban Jerusalem

²² bait taban tadŭ tadŭ kayuh ngga ruah so ramin ngara di andu Sabbath. Ngara dŭh siŭn nyiraja di andu Sabbath; ngara dŭh siŭn dŭh sita-i bada jadi andu adi kudus, nimun adi muko Aku pesan di tayung-babuk ngara.

²³ Tayung-babuk ngara abah dingah Aku bait mbit piduri. Ngara baking ka abah dingah Aku bait birajar so Aku.

²⁴ “Kidaan di ngara nang ngara dŭh siŭn dŭh tunda sopŭrŭg pesan Ku. Ngara dŭh siŭn kabis tadŭ tadŭ kayuh mŭrŭt ruah tiban tiban-bās kupo di andu Sabbath. Ngara dŭh siŭn dŭh sita andu Sabbath bada-i jadi andu adi kudus buang dŭh siŭn ndai tadŭ tadŭ kraja di andu anŭ.

²⁵ Komŭnŭ raja raja ngara ngga bara pinguasa ngara re mŭrŭt tiban tiban Jerusalem ka biyŭn kuasa raja mun anŭ adi ko David biyŭn. Samah ngga daya Judah ka daya Jerusalem, ngara re nambang krita krita kuda ka nunggang kuda, ka kupo Jerusalem re ari puno ngga dudu daya.

²⁶ Daya re mandŭg so kupo kupo Judah ka so anak anak kupo maning Jerusalem; ngara re mandŭg so utung tarun tana Benjamin, so sigŭn sigŭn sandah, so tarun tana-darŭd, ka so siratan Judah. Ngara re taban ka Ramin TUHAN sadis sadis badang ngga sadis sadis adi bŭkŭn, sadis ruwang kayuh ngga kimanyan, samŭn pinganggen trima kaseh.

²⁷ Pak ngara dŭh siŭn dŭh nundok di Aku ka sita andu Sabbath bada jadi andu adi kudus. Ngara dŭh siŭn kabis tadŭ tadŭ kayuh mŭrŭt ruah tiban tiban-bās Jerusalem di andu anŭ, amai kambŭi ngara ndai simŭnŭ, Aku re badang tiban tiban Jerusalem. Apui re man istana di Jerusalem, ka mating daya re tungang mura-i.”