JEREMIAH 16 - Hakcipta - Biatah Bidayuh

Pinyiraan TUHAN yŭn Jeremiah

¹ TUHAN minyu ngga aku dinge,

² “Dŭhnyah sawan bait mira di tarun yŭn adi mun ati.

³ Aku re kidaan di kuu kayuh adi re jadi di anak anak daya adi dog biranak digiti samŭn pimas pimas ngara.

⁴ Ngara re kabŭs bada andam adi bisā, ka mating daya re tukang ngurid ngara bait kubur ngara. Tadang ngara re prigure mun tamŭh di tunduh tana. Ngara re dog siŭ darŭm perang bait kabŭs sikirau, ka tadang ngara re jadi pinguman yŭn manuk ngga dāng dāng tarun.

⁵ “Kuu dŭh siŭn mŭrŭt ramin daya adi aŭn ngurid. Dŭhnyah susah pikir tadŭ tadŭ daya. Aku re dŭh tia nyiberkat daya Ku ngga damai bait kiren pinyirindu ngga masi Ku di ngara.

⁶ Adi kaya ngga adi sirata re kabŭs di tarun tana ati, pak mating daya adi re tukang kubur bait ngurid ngara. Mating daya adi re nidi adŭp-i bait nundo ubak-i ngga kiren adŭp-i susah.

⁷ Mating daya re man bait nok ngga nyaduh daya adi dog nyatŭk susah pinyikabŭs. Mating daya adi re tukang kiren masi, bait-i yŭn daya adi kabŭs sama-i puan kah adi kabŭs sindŭ-i.

⁸ “Dŭhnyah mŭrŭt ramin di yŭn daya agi bigawai. Dŭhnyah guru man nok ayō ngara.

⁹ Dingah kayuh adi Aku, TUHAN Bisa-pŭrŭg, adi Tapa Israel, nang. Aku re pirŭŭ jawŭn gaŭn ngga pawŭn ngga jawŭn rami gawai banan sawan. Daya adi udip di jaman ati re kiris kayuh anŭ jadi.

¹⁰ “Kan kuu kidaan di ngara sopŭrŭg kayuh ati, ngara re siken di kuu mani Aku mbŭh natu an ngukum ngara ngga karas. Ngara re siken ani sarah ngara ka ani dosa adi mbŭh ngara ndai rawan TUHAN adi Tapa ngara.

¹¹ Kidaan di ngara nang TUHAN mbŭh nang, ‘Tayung-babuk ngan bu so Aku ka nyambah ka bituan di tapa tapa bŭkŭn. Ngara tagan Aku ka abah tunda ajar Ku.

¹² Ka angān mbŭh ndai kayuh adi rabis arap so adi mbŭh tayung-babuk ngan ndai. Sopŭrŭg ngan baking buang arap, ka angān abah dingah pinganang Ku.

¹³ Ngapŭi meh, Aku re taran angān so tarun tana ati di ka tarun tana adi angān bait tayung-babuk ngan bŭn puan. Ka diginŭ angān re bituan di tapa tapa bŭkŭn sandu ngga singarŭm, ka Aku dŭh re masi di angān.’ ”

Daya Tapa Pari ka Rais adŭp-I

¹⁴ TUHAN nang, “Tika-i re mandŭg adi ngga daya re dŭh tia bipayu pakai adŭn Ku, Tapa adi udip, adi taban daya Israel ruah so tarun tana Egypt.

¹⁵ Pak, ngara re bipayu pakai adŭn Ku, Tapa adi udip, adi taban daya Israel ruah so tarun tana di utara ka so sopŭrŭg rais adi bŭkŭn adi yŭn Aku bada ngara papar sasah. Aku re taban ngara ngga pari ka rais adŭp ngara, ka tarun tana adi Aku nggen di tayung-babuk ngara. Aku, adi TUHAN, mbŭh minyu.”

Ukum adi Re Mandŭg

¹⁶ TUHAN nang, “Aku bagan bada mandŭg bagŭ pinakap iken bada nakap bara daya ati. Komŭnŭ Aku re bagan bada mandŭg bara pingasū bada ngasū ngara di barang darŭd ngga sandah ka darŭm tāng di darŭd batuh.

¹⁷ Aku kiris sopŭrŭg kayuh adi ngara ndai. Mating kayuh dŭh Aku kiris; dosa ngara dŭh dapŭd dog sukan so batŭh Ku.

¹⁸ Aku re bada ngara tanggong dosa ngga udip ginaka ngara duwŭh rupet, sabab ngara mbŭh nyembar tarun tana Ku ngga tibudo adi dŭh udip, mun tadang, ka mbŭh ngisi-i ngga tapa tapa kadong.”

Dua Jeremiah yŭn Pinyibake darŭm TUHAN

¹⁹ TUHAN, Kaam inŭh adi grindung aku ka adi nggen pinyibake di aku. Kaam turung aku di tika susah. Bangsa bangsa re mandŭg ka Kaam so bŭngŭn ong ka nang, “Tayung-babuk ami dŭh biyŭn ani ani adŭ-i tapa kadong, tibudo adi dŭh biguna.

²⁰ Dapŭd kah daya ndai tapa adŭp-i? Manŭn dŭh! Anŭ adi ngara ndai manŭn dŭh tapa adi sawŭ.”

²¹ “Ngapŭi meh,” nang TUHAN, “Ndi sidah yŭn adu adu Aku re bada bangsa bangsa puan kuasa Ku ngga pinyibake Ku; ngara re puan nang Aku ati TUHAN.”