JEREMIAH 12 - Hakcipta - Biatah Bidayuh

Jeremiah Mingungut di TUHAN

¹ “TUHAN, kambŭi aku minyu pasar har ku ngga Kaam, Kaam taŭn marar batur. Pak aku dŭh siŭn dŭh siken Kaam pasar har pinyitŭnggŭn. Mani daya ginaka mujur darŭm pimudip-i? Mani daya adi dŭh tŭnggŭn atin-i manang?

² Kaam purun ngara, ka ngara piruat; ngara timbu ka buān. Ngara ari minyu kana pasar Kaam, pak ngara dŭh sawŭ piduri pasar Kaam.

³ Pak, TUHAN, Kaam puan aku; Kaam kiris pingandai ku, ka munki masam aku rindu Kaam. Tarik ngara adi arap anŭ ngga bu mun biri adi re dog siŭ; nguan ngara ndŭg tika adi ngga ngara dog ninong.

⁴ Ndŭg sinde tarun tana ami badŭh, ka kupai di barang tarun tana barŭm rayu? Dāng ngga manuk kabŭs sabab pingandai ginaka daya ami, daya adi nang, ‘Tapa dŭh kiris pingandai ta.’ ”

⁵ TUHAN nang, “Jeremiah, kambŭi kuu kawŭk birumba ngga manusia, simuki kuu re birumba ngga kuda? Kambŭi kuu dŭh tan di sapa tarun tana rais, munki meh kuu darŭm tuān adi ngapid Yang Jordan?

⁶ Ndŭg ka bara madis mu, bara adi darŭm rawang mu, mbŭh tirawan kuu; ngara sua ngga daya adi nyerang kuu. Dŭhnyah sabah ngara, sunggu pinganang ngara mandis.”

TUHAN Susah sabab Daya-I

⁷ TUHAN nang, “Aku mbŭh tagan Israel; Aku mbŭh tirawan bangsa adi Aku mbŭh mien. Aku mbŭh nggen daya adi Aku rindu ka darŭm tangan pinganyu ngara.

⁸ Daya adi Aku mbŭh mien rawan Aku; mun singah di darŭm tarun ngara mbŭh ngŭr Aku, ngapŭi Aku tiru di ngara.

⁹ Daya adi Aku mien mbŭh keya ka manuk dog nyerang beuh so barang parad. Bagan dāng dāng tarun bada mandŭg sua man ngara!

¹⁰ Bagŭ pimritah daya tami mbŭh pirusak teya anggor Ku; ngara mbŭh bidigang di tana ŭmŭh Ku; ngara mbŭh bada tarun tana Ku adi ramus jadi tarun tana-sumat.

¹¹ Ngara mbŭh bada-i jadi tarun tana-pajam; ka-i matung di sirung jawin Ku. Ndi tarun tana mbŭh jadi tarun tana-sumat, ka mating daya mbit piduri.

¹² Di ndi tarun tana-pajam darŭd daya mbŭh mandŭg di pirinda. Aku mbŭh pait perang bada pirusak ndi tarun tana; mating daya dapŭd udip darŭm damai.

¹³ Daya Ku purun gandom, pak ngatŭm uduh; ngara bandar nyiraja, pak dŭh dapŭd utung. Sabab bisā baji Ku pimuruh ngara dŭh timbu.”

Janji TUHAN di Bangsa Bangsa maning Israel

¹⁴ TUHAN nang, “Aku agi kayuh an Ku nang di bangsa bangsa adi maning Israel adi mbŭh pirusak tarun tana adi Aku mbŭh nggen di daya Ku Israel. Aku re kadi bangsa bangsa adi ginaka anŭ so rais rais ngara mun dimbut anak kayuh-udip, ka Aku re nyiramat Judah so tangan ngara.

¹⁵ Pak ripas Aku mbŭh kadi ngara, Aku re masi di ngara; Aku re taban barang bangsa pari ka tarun tana rais adŭp-i.

¹⁶ Kambŭi ngga siabo atin, ngara raan trima adat daya Ku ka bipayu nang, ‘Siragi TUHAN udip’ — nimun ngara ko dawŭ-i ngajar daya Ku bipayu ngga dŭn Baal — ngara gŭh re jadi ndi so bara daya Ku ka re mujur udip.

¹⁷ Pak kambŭi tadŭ tadŭ bangsa dŭh an nundok di Aku, Aku re dimbut-i ka pirabur-i. Aku, adi TUHAN, mbŭh minyu.”