JAMES 4 - Hakcipta - Biatah Bidayuh

Bidingan ngga Ong

¹ So ki puun tibirik kaii ngga karit timbur di dupan ngan? Ayŭh timbur so pinyiripong di pinyanang ong, adi adu adu birawan darŭm angān.

² Angān raan kayuh, pak angān dŭh tungang biyŭn-i, jadi angān mbŭh biyŭn atin an siŭ; angān raru ripong di kayuh, pak angān dŭh tungang dapŭd-i, jadi angān bikaii ka raan biperang. Angān dŭh biyŭn kayuh adi angān raan sabab angān dŭh mite so Tapa.

³ Angān mite, pak dŭh trima-i, sirati-i pinŭtŭn ngan agi arap; angān mite kayuh yŭn pimunos adŭp ngan sadi.

⁴ Angān daya adi dŭh tŭtŭd di Tapa! Dŭh kah angān puan nang bidingan ngga ong sirati-i jadi pinganyu Tapa? Kambŭi angān raan bidingan ngga ong, angān mbŭh bada adŭp ngan jadi pinganyu Tapa.

⁵ Dŭhnyah nang pinganang Surat-kudus dŭh sawŭ adi nang, “Roh adi Tapa mbŭh na darŭm ata agi puno ngga pinyiraan adi bisā.”

⁶ Pak pinyirasi-mandis adi Tapa nggen agi rabis bās. Sak adi nang Surat-kudus, “Tapa dŭh raan daya adi sambuh, pak nggen pinyirasi-mandis di ngara adi pirapat adŭp-i.”

⁷ Ngapŭi meh, nundok di Tapa ka rawan Siarap isa-i bu so angān.

⁸ Mandŭg nyindŭk Tapa, ka Ayŭh re mandŭg nyindŭk angān. Ngu tangan ngan, angān daya bidosa! Pibisig atin ngan, angān daya pingadong!

⁹ Jadi susah meh angān, sien, ka muās; nukar tawŭh ngan da jadi sien, gaŭn ngan da jadi atin susah!

¹⁰ Pirapat adŭp ngan di sirung jawin Tuhan, ka Ayŭh re katuh angān.

Pinyibakan isa daya dŭh Nyarah Dingan-I

¹¹ Bara dingan ku, dŭhnyah angān ngamun dingan ngan. Kambŭi angān ngamun puan kah nyarah dingan ngan, angān ngamun ka nyarah Ukum-adat. Kambŭi angān nyarah Ukum-adat, rati-i angān mbŭh dŭh tia sita Ukum-adat, pak mbŭh nyarah-i.

¹² Tapa sadi adŭ adi nggen ukum-adat, Ayŭh adi sadi-I arang. Ayŭh sadi adŭ adi bisa nyiramat ka pirabur. Asi meh kuu, nak re an minyu pasar arap kana daya?

Pinyibakan isa daya dŭh Minyu Sambuh

¹³ Madin dingah pinganang ku ati, angān adi nang, “Andu ati puan kah sipagi kieh re matak ka ndi kupo, di yŭn ami re rŭŭ sitŭkŭd ndi sawa, bidagang ngga jiroh bagŭ duit.”

¹⁴ Angān dŭh re puan munki pimudip ngan sipagi! Angān mbŭh keya ka asuh, adi tatŭng nyitiro ka komŭnŭ mating.

¹⁵ Angān patut nang sakati: “Kambŭi Tuhan raan, kieh re udip ka ndai ati bait ajeh.”

¹⁶ Pak madin angān gambung, ka minyu sambuh; sopŭrŭg piminyu sambuh taŭn-i sarah.

¹⁷ Jadi meh, kambŭi ata dŭh ndai kayuh kana adi ata puan ata patut ndai, ata taŭn mbŭh bidosa.