JAMES 3 - Hakcipta - Biatah Bidayuh

Jura Manusia

¹ Bara dingan ku, dŭh sopŭrŭg ngan patut jadi gurū. Angān puan, ata adi jadi gurū taŭn re dog tingga arap kana ta rabis so daya bŭkŭn.

² Sopŭrŭg ta siraru ndai sarah. Pak kambŭi daya bŭn ndai sarah darŭm piminyu-i, ayŭh anŭ mbŭh sukup kana ka mbŭh tungang jaga adŭp-i samŭn ndi pŭrŭng ganan-i.

³ Ata na kekang di baba kuda isa-i an tunda pinyiraan ta. Ngga kekang ata tungang bada-i di ka tadŭ yŭn ata raan.

⁴ Suba kira kapar, munki masam baga-i dog taban sabak ribut adi daras, bisa gŭh dog nguit ngga kumudi adi raru siit, ka di ka barang yŭn nanyam pinyiraan daya adi tukang kumudi.

⁵ Simŭnŭ gŭh ngga jura ta, sunggu-i siit, pak bisa nyambuh adŭp-i pasar kayuh adi bās. Suba kira munki masam bayah-i tuān pak tungang sau da ndi anak jireb apui!

⁶ Ka jura agi keya ka apui. Darŭm ata, jura agi keya ka ong adi dog nguasa kayuh arap ka mbŭh taban arap-i ka ndi pŭrŭng ganan ta. Jura inŭh badang pimudip ta ngga apui so neraka.

⁷ Manusia tungang primon ka mbŭh primon barang masam dāng, mun dāng tarun ka manuk, dāng adi bigawang ka iken.

⁸ Pak mating daya tungang primon jura manusia. Jura mbŭh raru arap, dŭh tungang dog jaga, ka mbŭh puno ngga rasun adi bisā.

⁹ Ata pakai-i ngga nggen trima kaseh di Tuhan ngga Sama ta, ka pakai-i gŭh ngga mangu daya, adi dog napa darŭm gayŭn Tapa.

¹⁰ Pinganang puji ngga pangu ruah so ndi baba. Bara dingan ku, kayuh ati dŭh-i patut!

¹¹ Mating atak piin piruah piin sidi ngga piin pa'it so ndi rubang.

¹² Tŭngŭn ara, bara dingan ku, dŭh bisa buān buwa kanā; tŭngŭn anggor dŭh bisa buān buwa ara; dŭh gŭh atak piin pide bisa piruah piin sidi.

Pinyibijak so Sambu

¹³ Agi kah di dupan ngan daya adi bijak buang mirati? Ayŭh an kiren-i ngga aran pimudip-i adi kana, ka ngga kraja pingandai-i adi kana adi dog ndai ngga atin tŭkŭn ka ngga pinyibijak.

¹⁴ Pak kambŭi di darŭm atin ngan angān sina, baji, ka sibut, dŭhnyah meh bidosa rawan agah adi sawŭ so Tapa ngga piminyu sambuh pasar pinyibijak ngan.

¹⁵ Pinyibijak adi mun anŭ dŭh-i mandŭg so shorga, pak timbur di ong, so tibiat manusia adi bidosa ngga so umot adi arap.

¹⁶ Di yŭn agi atin sina ngga atin sibut, diginŭ gŭh agi pito ngga barang masam arap.

¹⁷ Pak pinyibijak adi so sambu, inŭh bisig, pinyidamai, duduh, ka pinyijerā; ayŭh puno ngga pinyirasi ka pijadi pingandai kana; dŭh-i napŭ daya, dŭh-i nyibudo daya.

¹⁸ Ka pinyikana inŭh buwa pingatŭm so bine damai adi dog purun daya adi pinyidamai.