JAMES 2 - Hakcipta - Biatah Bidayuh

Pinyibakan pasar Napŭ Daya

¹ Bara dingan ku, nimun daya adi sabah di Tuhan Jesus Kristus adi Tuhan bragah, angān dŭh siŭn mien daya nanyam ka raŭn gayŭn ngara.

² Nyamtadar-i ndi naan daya kaya pakai sisin mas ka nēn piraka grua mandŭg ka yŭn ngan tikuruk, ka ndi naan daya sirata nēn jukat piraka mandŭg gŭh.

³ Kambŭi angān stabi dŭ di sianŭ adi grua piraka-i ka nang di ayŭh, “Guru kamati ka sambu,” pak nang di sianŭ adi sirata, “Mijog dijeh, puan kah guru digiti di tana sindŭk kaja ku,”

⁴ rati-i angān mbŭh mien daya di dupan adŭp ngan ngga atin adi arap.

⁵ Ingat nŭh, angān adi aku rindu! Tapa mbŭh mien daya sirata di ong ati da jadi kaya darŭm pinyabah. Ngara re dapu pinyipritah Tapa nimun adi-I ko bijanji an nggen di ngara adi rindu di Ayŭh.

⁶ Pak angān ngamun daya adi sirata. Asi meh ngara adi kinanyuh angān ka taban angān ngga bisara? Daya kaya!

⁷ Ngara inŭh adi ngamun adŭn adi kana anŭ adi mbŭh dog nggen di angān.

⁸ Angān ndai pingandai kana kambŭi angān sita ukum-adat pinyipritah Tapa adi dog nuris darŭm Surat-kudus, “Rindu dingan ngan nimun angān rindu adŭp ngan.”

⁹ Pak kambŭi angān ndai di daya nanyam ayong-i, angān mbŭh bidosa, ka Ukum-adat nunggu angān mun nunggu daya adi miranggar ukum-adat.

¹⁰ Asi asi adi miranggar ndi Pinyipesan, mbŭh miranggar sopŭrŭg-i.

¹¹ Amai Ayŭh adi nang, “Dŭhnyah tanggah,” Ayŭh gŭh adi nang, “Dŭhnyah siŭ daya.” Sunggu mating bait kani angān tanggah, angān mbŭh miranggar ukum-adat kambŭi angān siŭ daya.

¹² Minyu ka ndai kraja nimun daya adi re dog bisara pakai ukum-adat adi re pirupas ata.

¹³ Amai Tapa dŭh re kiren masi kan Ayŭh nggen bisara di daya adi bŭn masi; pak daya adi masi dŭh re dog ukum Tapa.

Pinyabah ngga Pingandai

¹⁴ Bara dingan ku, ani kana-i kambŭi daya nang adŭp-i biyŭn pinyabah, pak mating pingandai-i ngga kiren ayŭh sawŭ biyŭn pinyabah? Bisa kah pinyabah anŭ nyiramat ayŭh?

¹⁵ Nyamtadar-i, jurud dari puan kah jurud dayung ngan biguna di piraka buang dŭh biyŭn sukup pinguman.

¹⁶ Ani kana-i kambŭi angān nang di ngara, “Tapa nyiberkat angān! Kasŭk jipo paras ngan ka man ndŭg bisoh!” kambŭi angān dŭh ndai ani ani ngga turung?

¹⁷ Simŭnŭ gŭh ngga pinyabah: kambŭi sadi-i dŭh ngga pingandai, taŭn-i kabŭs.

¹⁸ Pak agi daya re nang, “Ndi naan daya biyŭn pinyabah, adi bŭkŭn biyŭn pingandai.” Pinyinam ku sakati, “Kiren di aku munki daya bisa biyŭn pinyabah kambŭi mating pingandai. Ngga pingandai ku aku re kiren di angān pinyabah ku.”

¹⁹ Sabah mu kah Tapa agi ndi adŭ? Bara umot sabah gŭh buang kimŭtŭr taru.

²⁰ Angān budo! Angān an dog kidaan kah nang pinyabah mating pingandai dŭh-i biguna?

²¹ Simuki meh babuk ta Abraham dapŭd bamai ngga Tapa? Ayŭh dapŭd bamai ngga Tapa so pingandai-i, kan ayŭh jugan anak-i Isaac di tunduh mija-sambah.

²² Dŭh kah angān kiris? Pinyabah-i ngga pingandai-i agi brinyam; pinyabah-i jadi sukup kana da pingandai-i.

²³ Ka pinganang Surat-kudus mbŭh jadi bitŭtŭk adi nang, “Abraham sabah di Tapa, ka sabab pinyabah-i Tapa mbŭh ngitong ayŭh tŭnggŭn.” Ka Abraham meh mbŭh dog kadŭn bidingan ngga Tapa.

²⁴ Ka angān puan meh garang nang daya dapŭd bamai ngga Tapa so pingandai-i, dŭh so pinyabah-i adŭ.

²⁵ Simŭnŭ gŭh ngga Rahab adi dayung sundar. Ayŭh mbŭh bamai ngga Tapa so pingandai-i, darŭm-i kambat pinyiong pinyiong Israel ka turung ngara bu kadŭg aran bŭkŭn.

²⁶ Jadi meh, nimun pŭrŭng kabŭs dŭh biyŭn simangi, simŭnŭ gŭh pinyabah kabŭs dŭh biyŭn pingandai.