ISAIAH 9 - Hakcipta - Biatah Bidayuh

¹ Mating aran ngara re pirupas adŭp ngara so tika pinyusah anŭ. Tarun tana tibaran-asar Zebulun ngga Naphtali muko dawŭ-i dog ngamun, pak jŭ tarun tana anŭ re dog stabi, so Mediterranean ka timor nuju tarun tana di pah mandi Jordan, jeh ndŭg Galilee, di yŭn daya tami rŭŭ.

Raja adi Re

² Daya adi panu darŭm karŭm mbŭh kiris jawa adi bās. Ngara udip di tarun tana singangi, pak madin jawa nyekar ngara.

³ Kaam mbŭh nggen di ngara pinyigaŭn adi bās, TUHAN; Kaam mbŭh bada ngara sanang. Ngara pawŭn angan kayuh adi Kaam mbŭh ndai, mun daya pawŭn kan ngara mbŭh ngatŭm gandom ngara puan kah kan ngara kutung pinyikaya adi ngara mbŭh sirapas.

⁴ Kaam mbŭh mata kuasa ngara adi kinanyuh ka piurun daya Mai. Kaam mbŭh pirupas ngara nimun Kaam nyiramat daya Mai so daya Midian ndun jah.

⁵ Kasut bara tibaran soldadu adi nyerang samŭn piraka adi bitameg bada deya re dog man apui.

⁶ Anak-sŭ dog biranak yŭn ta! Anak dari dog nggen di ata! Ka Ayŭh re jadi pimritah ta. Ayŭh re dog kadŭn, “Tukang-pitayan adi Kana”, “Tapa adi Bikuasa”, “Sama adi tan adu adu”, “Raja Damai”.

⁷ Kuasa raja-I re masang bitambah; pritah-I re ari darŭm damai. Ayŭh re mritah nimun sesang Raja David, sangan kuasa-I di kayuh adi batur ka tŭnggŭn, so madin ndŭg sikasŭn tipuh. TUHAN adi Bisa-pŭrŭg mbŭh natu an ndai sopŭrŭg ati.

TUHAN re Ngukum Israel

⁸ TUHAN mbŭh nggen ukum di tunduh pritah Israel, di tunduh bara sesang Jacob.

⁹ Sopŭrŭg daya Israel, anŭ inŭh barang naan adi udip di kupo Samaria, re puan nang Ayŭh mbŭh ndai kayuh ati. Madin ngara sambuh ka gambung. Ngara nang,

¹⁰ “Ramin adi dog ndai ngga batā mbŭh rubuh, pak ata re gati-i ngga ramin adi dog ndai ngga batuh. Parang kayuh sycomore mbŭh dog kapŭg, pak ata re gati-i ngga kayuh sedar adi siabo kana.”

¹¹ TUHAN mbŭh kiruyok pinganyu ngara bada nyerang ngara.

¹² Syria di parad tura ka timor ngga Philistia di parad tura ka barat mbŭh kanga baba ngara an man Israel. Pak sunggu mŭnŭ, baji TUHAN dŭh re ko; Ayŭh babŭ pakat tangan-I re ngukum.

¹³ Daya Israel babŭ dŭh marik pimudip ngara pari ka Tapa; sunggu TUHAN Bisa-pŭrŭg mbŭh ngukum ngara, ngara gibayuh pari ka Ayŭh.

¹⁴ Darŭm ndi andu TUHAN re ngukum bara pinguru Israel samŭn bara daya-i; Ayŭh re kapŭg ngara, ubak ngga koi.

¹⁵ Bara nyamba ngga bara adi dog stabi inŭh ubak, ka koi inŭh bara nabi adi nggen ajar kadong!

¹⁶ Daya adi nguru ngara kinanyap ngara ka bada ngara riruk.

¹⁷ Ngapŭi TUHAN dŭh re bada tadŭ tadŭ so daya adi mara rupas, ka Ayŭh dŭh re masi di tadŭ tadŭ dayung uban ngga anak tumang, sabab sopŭrŭg daya inŭh daya adi dŭh stabi di Tapa buang ginaka, ka barang masam kayuh adi ngara nang inŭh arap. Pak sunggu mŭnŭ, baji TUHAN dŭh re ko, ka babŭ pakat tangan-I re ngukum.

¹⁸ Pimudip ginaka daya bijagu mun apui adi man tŭngŭn reja ngga uduh pedang. Apui anŭ bijagu mun apui tuān adi bijambung asuh-i.

¹⁹ Sabab TUHAN adi Bisa-pŭrŭg baji, ukum-I bijagu mun apui adi minyawit di ndi tarun tana ka man daya, ndŭg ka adi bijurud man jurud adŭp-i.

²⁰ Di barang yŭn darŭm rais, daya naku ka man barang mun rapuh pinguman adi ngara dapŭd, pak tain ngara dŭh pandai bisoh. Ngara man anak adŭp ngara ani!

²¹ Daya Manasseh ngga daya Ephraim nyerang adŭp dupan adŭp-i, ka samah nyerang Judah. Pak sunggu mŭnŭ, baji TUHAN dŭh re ko; Ayŭh babŭ pakat tangan-I re ngukum.