ISAIAH 8 - Hakcipta - Biatah Bidayuh

Anak Isaiah Jadi Tandā yŭn Bangsa Anŭ

¹ TUHAN nang di aku, “Tambit ndi batuh yŭn nuris ka nuris dieh ngga turis adi baga; ‘Rikas Sirapas, Rikas Mirupak’.

² Tambit duwŭh naan daya adi bisa dog sabah, imam Uriah ngga Zechariah anak Jeberechiah, bada jadi saksi.”

³ Dŭh tui ripas anŭ sawŭn ku bite. Kan anak ami mbŭh dog biranak, TUHAN nang di aku, “Kadŭn ayŭh ‘Rikas-Sirapas-Rikas-Mirupak’.

⁴ Diŭ so anak anŭ mbŭh pandai nang ‘Sindŭ’ ka ‘Sama’, sopŭrŭg pinyikaya Damascus ngga sopŭrŭg kayuh sirapas Samaria re dog taban Raja Assyria ngga bu.”

Raja-Empaya Assyria Mandŭg

⁵ TUHAN minyu ngga aku dinge.

⁶ Ayŭh nang, “Sabab bara daya ati abah di piin adi sitanah aman di sungi Shiloah, ka kimŭtŭr di sirung jawin Raja Rezin ngga Raja Pekah,

⁷ Aku, adi TUHAN, re taban raja-empaya Assyria ngga sopŭrŭg bara soldadu-i nyerang Judah. Ngara re mun piin uba Yang Euphrates, ngapuh sopŭrŭg tabing-i.

⁸ Ngara re nyarab Judah mun uba; bigatung kŭd kawin ka ngapuh barang masam kayuh.” Tapa agi ngga ata! Urad-I adi tiburai grindung tarun tana.

⁹ Tikuruk darŭm taru, angān bangsa bangsa! Dingah, angān parad adi jo. Sidia adŭp ngan yŭn biperang, pak bada adŭp ngan taru! Sawŭ, sidia meh, pak bada adŭp ngan taru!

¹⁰ Ndai pusar ngan, pak-i dŭh re marui. Minyu ngga situngang tungang ngan, pak-i re dŭh biguna, sabab Tapa agi ngga kieh.

TUHAN Bakan Nabi Anŭ

¹¹ Ngga kuasa bās-I TUHAN bakan aku bada dŭh tunda aran adi dog kadŭg bangsa anŭ. Ayŭh nang,

¹² “Dŭhnyah bipekat ngga ngara, ka dŭhnyah taru kayuh adi ngara taru.

¹³ Ingat Aku, adi TUHAN Bisa-pŭrŭg, inŭh kudus; Aku adi angān patut taru.

¹⁴ Sabab Aku raru kudus Aku mbŭh keya ka batuh adi daya sikak; Aku keya ka jarat adi re nakap daya pritah Judah ngga daya pritah Israel samŭn daya Jerusalem.

¹⁵ Bagŭ re sikak; ngara re rabu ka dog pirandŭk. Ngara re rakat darŭm jarat.”

Pinyibakan Bada Dŭh Bisiken ngga Daya adi Mbŭh Kabŭs

¹⁶ Angān, adi bara pinunda ku, an jaga ka kingat pinganang adi Tapa mbŭh nggen di aku.

¹⁷ TUHAN mbŭh sukan adŭp-I so daya-I, pak aku sabah di Ayŭh ka na pingarap ku di Ayŭh.

¹⁸ Ta aku ngga anak anak adi TUHAN mbŭh nggen di aku. TUHAN Bisa-pŭrŭg, ngga takta-I di Sandah Zion, mbŭh pait ata nimun pinganang adi udip di daya Israel.

¹⁹ Pak daya re bada angān mite pinganang so daya adi pandai kidaan nasip ngga daya adi pandai minyu ngga simangi daya adi mbŭh kabŭs, adi prikiak ka prigŭnŭm adŭp-i. Ngara re nang, “Mŭnŭ mŭnŭ gibabŭ gŭh daya patut mite pinganang so roh roh ka bisiken ngga daya adi mbŭh kabŭs yŭn utung daya adi babŭ udip.”

²⁰ Angān dŭh siŭn dŭh nam ngara, “Dingah kayuh adi TUHAN ngajar di angān! Dŭhnyah dingah pinganang daya adi minyu ngga simangi daya adi mbŭh kabŭs. Kayuh adi ngara kidaan di angān dŭh dapŭd pijo pinyusah.”

Tika Pinyusah

²¹ Daya re bigandon di ndi tarun tana, susah buang sibŭrŭk. Darŭm sibŭrŭk ngga baji ngara re mangu raja ngara samŭn Tapa ngara. Sunggu ngara nyigura ka rangit

²² puan kah tingga tana, ngara dŭh kiris ani ani adŭ-i pinyusah ngga pinyikarŭm; pinyikarŭm adi sipŭ adi ngara dog takan bada mŭrŭt.