ISAIAH 7 - Hakcipta - Biatah Bidayuh

Pinganang yŭn Raja Ahaz

¹ Kan Raja Ahaz, adi anak Jotham ka sukuh Uzziah, mritah Judah, perang agi timbur. Rezin, adi raja Syria, ngga Pekah adi anak Remaliah, adi raja Israel, nyerang Jerusalem, pak dŭh tungang sirapas kupo anŭ.

² Kan pinganang agi ndŭg kajit raja Judah nang bara tibaran soldadu Syria mbŭh agi darŭm tarun tana Israel, ayŭh ngga sopŭrŭg daya-i jadi raru taru ndŭg ka kimŭtŭr mun tŭngŭn kayuh bigugoh dog poh sabak.

³ TUHAN nang di Isaiah, “Tambit anak mu Shear Jashub, ngga di dapŭd Raja Ahaz. Kuu re dapŭd ayŭh di aran adi yŭn tukang banang nyiraja, di tŭbŭn aran-piin adi so piin aman so pagong di sijo.

⁴ Kidaan di ayŭh bada sidia adŭp-i, dŭhnyah taru puan kah bipito. Baji Raja Rezin, ngga daya Syria, ngga Raja Pekah dŭh bisā dŭ so asuh adi ruah so duwŭh apŭg uwang.

⁵ Syria ngga daya Israel ngga raja-i bipekat.

⁶ Ngara re suba nyerang Judah ka pitaru daya-i bada mŭrŭt parad ngara, ka komŭnŭ re piguru anak Tabeel bada jadi raja.

⁷ “Pak Aku, adi TUHAN, kidaan nang kayuh ati dŭh re jadi.

⁸ Mani? Sabab Syria dŭh bake dŭ so Damascus adi sindŭ kupo-i, ka Damascus dŭh bake dŭ so Raja Rezin. Jeja ka Israel, darŭm nŭm puru rimŭh sawa adi re, ayŭh re rubuh ndŭg ka dŭh dapŭd pari jadi ndi bangsa.

⁹ Israel dŭh bake dŭ so Samaria, adi sindŭ kupo-i, ka Samaria dŭh bake dŭ so Raja Pekah. “Kambŭi pinyabah mu di Aku dŭh tan, kuu dŭh re tan tui.”

Tandā Immanuel

¹⁰ TUHAN pait dinge pinganang ka Ahaz:

¹¹ “Mite TUHAN adi Tapa mu nggen di kuu tandā. Anŭ bisa so rasan ong daya adi mbŭh kabŭs puan kah jeh so rangit adi bigatung.”

¹² Ahaz nam, “Aku dŭh re mite tandā. Aku abah suba TUHAN.”

¹³ Jadi Isaiah nang, “Dingah, madin, bara sesang Raja David. Mbŭh raru arap angān suba pinyitŭtŭd manusia, ka angān an suba pinyitŭtŭd Tapa gŭh?

¹⁴ Adŭp TUHAN re nggen tandā di kuu: ndi naan dayung adi mara adi bite re biranak ndi anak dari ka re kadŭn ayŭh ‘Immanuel.’

¹⁵ Kan ayŭh mbŭh sukup baga ka bisa ndai pikir adŭp-i, ayŭh re nok sisuh ka man ju banyis.

¹⁶ Pak diŭ so tipuh anŭ mandŭg, tarun tana duwŭh naan raja anŭ adi pitaru kuu re jadi tarun pajam.

¹⁷ “TUHAN re taban ka tunduh mu, ka tunduh daya mu, ka barang naan darŭm rawang mu, tipuh pinyusah adi sipŭ dŭ so tadŭ tadŭ pinyusah adi mbŭh jadi so jaman pritah Israel birakang ngga Judah. Ayŭh re taban raja Assyria.

¹⁸ “Kan tipuh anŭ mbŭh mandŭg, TUHAN re nyimboh nggen tandā di bara daya Egypt bada mandŭg mun dudu tura so anjak Yang Nile adi siabo jo, ka daya Assyria so tarun tana ngara mun dudu banyis.

¹⁹ Ngara re mupuh dau ngga tāng batuh, ka re mupuh barang tŭngŭn reja ka barang tarun tana kupai.

²⁰ “Kan tipuh anŭ mbŭh mandŭg, TUHAN re ngupah tukang kapŭg ubok so pah mandi Yang Euphrates, anŭ inŭh raja-empaya Assyria! Ayŭh re gumbak gagap mu, samŭn ubok di ubak mu ka di pŭrŭng mu.

²¹ “Kan tipuh anŭ mbŭh mandŭg, sunggu tukang teya tungang nyiramat ndi adŭ anak sapi ka duwŭh kambing,

²² ngara re nggen rabis bagŭ sisuh so adi raan-i. Sawŭ, sinadan ngara adi nisŭ anŭ adi babŭ agi di tarun tana anŭ re nok sisuh ka man ju banyis.

²³ “Kan tipuh anŭ mbŭh mandŭg, teya anggor adi kana, ngga barang tŭngŭn anggor adi brega siribu kiping pirak, re birasu ngga bakah pireja ngga tŭngŭn reja.

²⁴ Daya re di ngasū kamanŭ taban bawŭh ka reja-panah. Sawŭ, ndi tarun tarun tana rais anŭ re birasu ngga tŭngŭn reja ka bakah pireja.

²⁵ Sopŭrŭg sandah di yŭn pimuruh agi timbu re birasu ngga tŭngŭn reja ndŭg ka daya dŭh raan di kamanŭ. Anŭ re jadi tarun yŭn sapi ngga biri man uduh.”