ISAIAH 63 - Hakcipta - Biatah Bidayuh

TUHAN Manang Ngarah Bangsa Bangsa

¹ “Asi anŭ mandŭg so kupo Bozrah di Edom? Asi anŭ nēn piraka bireh ka panu ngga kuasa ka pinyibake?” “TUHAN inŭh anŭ, bikuasa ngga-I nyiramat, mandŭg di piagah pimanang-I”

² “Mani piraka-I raru bireh, mun piraka daya adi mu-ngindik buwa anggor, ndai wain?”

³ TUHAN nam, “Aku mbŭh digang bangsa bangsa mun ngindik wain, ka mating daya turung Aku. Aku bidigang di ngara ngga baji Ku, ka deya ngara mbŭh bada piraka Ku bitameg.

⁴ Tika adi ngga nyiramat daya Ku mbŭh mandŭg; anŭ mbŭh tika adi ngga ngukum pinganyu ngara.

⁵ Aku nginga kan Aku kimat ka kiris daya mating turung Aku. Pak baji Ku bada Aku bake, ka Aku manang ngga kuasa adŭp Ku sadi.

⁶ Darŭm baji Ku Aku bidigang di tunduh sopŭrŭg bangsa ka bada ngara asur. Aku basen deya ngara di tana.”

Pinyikana TUHAN yŭn Israel

⁷ Aku re kidaan pasar pinyirindu TUHAN; Aku muji Ayŭh amai sopŭrŭg kayuh adi mbŭh-I ndai yŭn ta. Ayŭh mbŭh bandar nyiberkat daya Israel sabab masi-I ngga pinyirindu-I adi dŭh bisa birubah.

⁸ TUHAN nang, “Ngara inŭh daya Ku; ngara dŭh re nipu Aku.” Ngapŭi Ayŭh nyiramat ngara

⁹ so sopŭrŭg sangsara ngara. Dŭh-i malaikat, pak adŭp TUHAN adi nyiramat ngara. Ngga pinyirindu ka masi Ayŭh nyiramat ngara. So dawŭ-i Ayŭh ari kingat ngara,

¹⁰ pak ngara rawan Ayŭh ka bada roh kudus-I susah. Ngapŭi TUHAN jadi pinganyu ngara ka rawan ngara.

¹¹ Pak komŭnŭ ngara ingat kayuh adi mbŭh jadi jah, jaman Moses, adi urun TUHAN, ka ngara siken, “Diki TUHAN madin, adi ko nguru bara pinguru daya-I mutas rawŭt ngga siramat? Diki TUHAN, adi nggen roh-I ka Moses?

^12-13 Diki TUHAN, adi ndai pingandai bās so Moses, mire piin rawŭt nyinuwŭh ka nguru daya-I mutas piin tŭrŭp, ngga dapŭd adŭn adi adu adu timagah yŭn adŭp-I?” Dog nguru TUHAN, ngara panu mun kuda tarun dŭh sikak dŭh sikakong.

¹⁴ Mun sapi sapi dog nguru ka rubān adi damŭn, simŭnŭ gŭh TUHAN nggen rŭŭ-paya di daya-I. Ayŭh nguru daya-I ka dapŭd stabi yŭn adŭn-I.

Dua Mite Masi ngga Turung

¹⁵ TUHAN, tingga kieh so shorga, di yŭn Kaam rŭŭ darŭm pinyikudus ngga bragah Mai. Mbŭh dŭh kah Kaam mbit piduri pasar kieh? Diki kuasa Mai? Diki pinyirindu ngga masi Mai? Kaam nyipunok kieh kah?

¹⁶ Kaam inŭh sama ami. Tayung-babuk ami Abraham ngga Jacob dŭh ngaku kieh; pak Kaam, TUHAN, inŭh sama ami, adi ari nyiramat kieh.

¹⁷ Mani Kaam tandah kieh manyap so aran Mai? Mani Kaam bada kieh raru baking ndŭg ka bu so Kaam? Pari ka kieh, yŭn kana ngara adi bituan di Kaam, yŭn kana daya adi ari tung jamai.

¹⁸ Kieh, daya Mai adi kudus, ko dog pibu bara pinganyu ami nyitiro dawŭ-i: ngara bidigang di yŭn pinyirŭŭ Mai.

¹⁹ Kaam ndai di tunduh kieh mun-i Kaam ati bŭn jadi pimritah ami, ka kieh ati mun adi bŭn jadi daya Mai.