ISAIAH 59 - Hakcipta - Biatah Bidayuh

Nabi Nyara dosa Daya Bagŭ

¹ Dŭhnyah pikir TUHAN raru ramah re nyiramat angān puan kah raru bangam re dingah angān bagan mite turung!

² Sabab dosa ngan Ayŭh dŭh dingah angān. Dosa ngan inŭh adi nyibarai angān kan angān suba an nyambah Ayŭh.

³ Angān mbŭh sarah amai angān kadong, ganas, ka siŭ daya.

⁴ Angān di ka yŭn bisara, pak angān dŭh pimanu pinyitŭnggŭn. Angān kadong yŭn manang bisara. Angān bisatur yŭn an kandam daya bŭkŭn.

^5-6 Pekat arap adi angān ndai inŭh bisā mun turoh jippŭh adi bisā. Mape ndi turoh ka jippŭh ruah! Pak pekat ngan anŭ dŭh biguna keya ka piraka adi dog ndai so sarin taka!

⁷ Angān ari bisatur yŭn kayuh adi arap, ka angān dŭh re nyikite ndai-i. Angān dŭh re ngāng siŭ daya adi dŭh sarah. Digiti diginŭ angān panu, angān pirusak ka nyirubuh,

⁸ ka mating daya siramat di yŭn angān agi. Sopŭrŭg pingandai ngan dŭh patut. Angān panu kadŭg aran adi bidikok, ka mating daya adi panu kadŭg aran anŭ re siramat.

Daya Bagŭ Ngaku Dosa

⁹ Bara daya anŭ nang, “Madin ata puan mani Tapa dŭh nyiramat ata so daya adi kinanyuh ata. Ata harap sekar jawa ngga ta panu, pak karŭm adŭ agi,

¹⁰ ka ata kāp tarun mun daya karak. Ata sikak sikakong ngga yun kumbeng, mun di tika karŭm, keya ka ata mbŭh darŭm ong daya adi mbŭh kabŭs.

¹¹ Ata mbŭh taru buang susah. Ata gruwŭn Tapa nyiramat ata so udip adi dog kinanyuh ka so kayuh adi sarah, pak mating ani ani jadi.

¹² “TUHAN, sarah ami di Kaam mbŭh raru bagŭ. Dosa ami mbŭh nyarah kieh. Kieh rada sopŭrŭg-i.

¹³ Kieh mbŭh rawan Kaam, tirawan Kaam, ka abah tunda Kaam. Kieh mbŭh kinanyuh daya bŭkŭn ka nyipunok Kaam. Pikir-kira ami sarah; pinganang ami pinganang kadong.

¹⁴ Pinyitŭnggŭn mbŭh dog pibu, ka pinyibatur dŭh dapŭd mandŭg. Pinyawŭ mbŭh dŭh biguna di pakan kupo, ka pinyijujur mating yŭn-i diginŭ.

¹⁵ Mbŭh mating daya adi jujur, ka daya adi pijo adŭp-i so pingandai arap mbŭh adŭp-i dog nyatŭk pingandai arap daya.” TUHAN mbŭh kiris sopŭrŭg-i, ka asŭng-I dŭh munos kiris pinyitŭnggŭn dŭh dog pimanu.

TUHAN Sidia an Nyiramat Daya-I

¹⁶ Ayŭh mbŭh payah kiris daya mating turung daya adi dog kinanyuh. Jadi Ayŭh re pakai kuasa adŭp-I ngga nyiramat ngara ka ngga dapŭd pimanang.

¹⁷ Ayŭh re pakai pinyitŭnggŭn ndu jipo basi ka kuasa nyiramat ndu tupi basi. Ayŭh re kibarui adŭp-I ngga pinyiraan an bada kayuh batur, ka ngukum ka ngatur diki adi sarah.

¹⁸ Ayŭh re ngukum bara pinganyu-I nanyam ka pingandai ngara, samŭn ngara adi rŭŭ di tarun tana adi jo.

¹⁹ So timor ndŭg barat barang naan daya re taru di Ayŭh ka di kuasa bās-I. Ayŭh re mandŭg keya ka piin sungi adi daras aman, keya ka sabak adi daras.

²⁰ TUHAN nang di daya-I, “Aku re mandŭg ka Jerusalem di ngibān ka nyiramat sopŭrŭg ngan adi mbŭh marik pimudip ngan bu so dosa.

²¹ Aku ndai simanya ngga angān: Aku mbŭh nggen di angān kuasa Ku ngga Ajar Ku adi re jadi jangān ndŭg situi tui, ka so madin angān re tunda pinganang Ku ka ngajar anak anak ngan ka sesang sesang ngan bada tunda pinganang Ku ndŭg situi tui.”