ISAIAH 50 - Hakcipta - Biatah Bidayuh

¹ TUHAN nang, “Angān pikir Aku pibu daya Ku mun daya taran sawŭn-i? Diki meh garang surat sare anŭ? Angān pikir Aku jua angān mun daya jua anak anak-i bada jadi urun? Dŭh, angān bu jadi daya-takap sabab dosa ngan; angān dog taran sabab sarah adŭp ngan.

² “Mani daya Ku abah kambat Aku kan Aku mandŭg tudu ngara an nyiramat ngara? Mani ngara abah nam kan Aku bagan? Aku ati ramah kah, ka dŭh dapŭd nyiramat ngara? Aku bisa nyibadŭh rawŭt ngga ndi bang piminyu ka marik sungi sungi bada jadi tarun tana-sumat, isa iken iken adi darŭm-i kabŭs dŭh biyŭn piin.

³ Aku bisa bada rangit karŭm, bada-i mun adi ngurid daya kabŭs.”

Urun TUHAN Dingah Pinganang

⁴ TUHAN Raja mbŭh ngajar aku kayuh adi re ku nang, isa aku bisa nyibake ngara adi mbŭh rarah. Barang isan Ayŭh bada aku graŭh an dingah kayuh adi Ayŭh ngajar di aku.

⁵ TUHAN mbŭh nggen di aku pinyimirati, ka aku dŭh birawan bait nyipunok Ayŭh.

⁶ Aku nggen punok ku di ngara adi mukong aku. Aku nggen paŭp ku kan ngara ngamun aku, kan ngara nyirugut gagap ku ka nyiruja jawin ku.

⁷ Pak pinganang ngamun so ngara dŭh bada aku kinaman sabab TUHAN Raja agi turung aku. Aku mbŭh nagap atin ku ka nyijŭn adŭ. Aku puan nang adŭp ku dŭh re dog pimangŭh,

⁸ amai Tapa agi ngga aku, ka Ayŭh re kiren nang aku dŭh sarah. Asi meh re birani nyarah aku? Ja ata samah di ka yŭn bisara! Isa ayŭh nyarah aku!

⁹ Adŭp TUHAN Raja adi re nyibandar aku; asi meh re dapŭd nang aku sarah? Sopŭrŭg daya adi nyarah aku miyap; ngara manyap mun banang adi dog man gŭgŭt.

¹⁰ Sopŭrŭg ngan adi stabi di TUHAN adi dingah pinganang urun-I, aran adi angān kadŭg kadŭ-i karŭm patŭ', pak sabah di TUHAN, bisangan di Tapa ngan.

¹¹ Sopŭrŭg ngan adi bipekat an pirusak daya re rusak bada pekat adŭp ngan. Adŭp TUHAN re bada-i jadi simŭnŭ; angān re sangsara bada nasip adi arap.