ISAIAH 5 - Hakcipta - Biatah Bidayuh

Ragu pasar Teya Anggor

¹ Dingah darŭm aku nang ragu ati, ragu jerā ku ngga teya anggor-i: Jerā biyŭn teya anggor di sandah adi raru damŭn.

² Ayŭh nyakor tana ka pibisig-i so dudu batuh; ayŭh purun anggor adi siabo kana. Ayŭh pijog sirangga ngga jaga-i, kareh rubang yŭn ngindik-mŭ buwa anggor. Ayŭh kajŭn buwa-i masak, pak barang pŭrŭng buwa-i masŭm.

³ Jadi madin jerā ku nang, “Angān daya adi rŭŭ di Jerusalem ngga Judah, tingga arap kana ku ka arap kana teya anggor ku.

⁴ Agi kah kayuh adi aku kambŭt ndai yŭn teya anggor ku? Ka mani meh teya anggor ku buān buwa adi masŭm ka dŭh buwa anggor adi kana adi aku kajŭn?

⁵ “Ati inŭh kayuh adi aku re ndai di teya anggor ku; aku re kadi buwang adi maning-i, nyirubuh sindung adi grindung-i, ka tandah dāng tarun man-i ka bidigang dieh.

⁶ Aku re tandah-i birasu ngga uduh. Aku dŭh re mŭpŭd tugu-i bait nyakor tana-i, pak re tandah bakah ngga reja bada ngarut nambun-i. Aku gŭh re kijaman abun bada ujen rabu dieh.”

⁷ Israel inŭh teya anggor TUHAN Bisa-pŭrŭg; daya Judah inŭh tŭngŭn-i adi-I purun. Ayŭh harap ngara ndai kayuh adi kana, pak ngara siŭ daya. Ayŭh harap ngara ndai kayuh adi batur, pak sirŭŭn daya adi ngara kisiis dog dingah mite pinyitŭnggŭn.

Pingandai Arap adi Manusia Ndai

⁸ Mbŭh payah inŭh angān! Angān miris bagŭ ramin ngga tana ngga nambah anŭ adi angān mbŭh biyŭn. Dŭm dŭh tui re mating tarun yŭn daya bŭkŭn, ka angān sadi adŭ rŭŭ di tarun tana anŭ.

⁹ Aku mbŭh dingah TUHAN adi Bisa-pŭrŭg nang, “Sopŭrŭg ramin ati adi bayah ka ramus re rubuh.

¹⁰ Tŭngŭn tŭngŭn anggor adi udip di simŭng hektar tana re piruah kaŭs-i mai lita wain. Siratus mai puru lita bine re piruah kaŭs-i simŭng mai lita gandom.”

¹¹ Mbŭh payah inŭh angān! Angān makat awar isan isan ka piguru nok, ka angān birunok ndŭg rambat ngarŭm.

¹² Di gawai ngan angān biyŭn kachapi, tamburin ngga tirari, ka simŭnŭ gŭh wain. Pak angān dŭh mirati pingandai TUHAN,

¹³ ngapŭi meh angān re dog taban ngga bu jadi daya-takap. Bara pinguru ngan re sikirau ndŭg ka kabŭs, ka rayat re kabŭs amai badŭh asŭng.

¹⁴ Baba ong daya adi mbŭh kabŭs mbŭh baga tikanga an tŭrŭn daya bās di Jerusalem ngga bara daya saja adi gaŭn pawŭn.

¹⁵ Barang naan daya re dog pimangŭh, ka sopŭrŭg adi miruap sambuh re dog pirapat.

¹⁶ Pak TUHAN adi Bisa-pŭrŭg kiren bās-I so ka pingandai-I adi batur, ka Ayŭh pinandŭng pinyikudus-I darŭm Ayŭh nggen bisara di daya-I.

¹⁷ Di yŭn kupo rubuh anak biri re man kupai ka anak kambing re dapŭd kupai barŭm.

¹⁸ Mbŭh payah inŭh angān! Angān dŭh re dapŭd pirupas adŭp ngan so dosa ngan.

¹⁹ Angān nang, “Tandah TUHAN rikas ndai kayuh adi Ayŭh nang adŭp-I re ndai, isa ata dapŭd kiris-i. Tandah Tapa kudus Israel ndai anŭ adi Ayŭh mbŭh ngatur an ndai; ja tingga ani anŭ di pikir-I.”

²⁰ Mbŭh payah inŭh angān! Kayuh adi arap, angān nang kana; kayuh adi kana, angān nang arap. Angān marik karŭm bada jadi jawa ka jawa angān marik bada jadi karŭm. Kayuh adi pa'it, angān bada sidi; ka kayuh adi sidi, angān bada pa'it.

²¹ Mbŭh payah inŭh angān! Angān pikir adŭp ngan bijak ka pandai.

²² Mbŭh payah inŭh angān! Angān birani buang adi numbor ndi darŭm angān gaur wain bait nok adi bisa!

²³ Pak ngga suap adi sŭ, angān mbŭh pirupas daya adi sarah, ka angān bitan pinyitŭnggŭn dog pimanu yŭn daya adi dŭh sarah.

²⁴ Jadi madin, nimun siriyang ngga kupai adi badŭh sanang dog badang di apui, uat ngan re madam ka rarak ngan re pisŭk ka ruruh, sabab angān mbŭh tirawan kayuh adi TUHAN Bisa-pŭrŭg adi Tapa kudus Israel, mbŭh ngajar di ata.

²⁵ TUHAN baji di daya-I ka mbŭh pakat tangan-I re ngukum ngara. Darŭd re bigugoh, ka tadang ngara adi kabŭs re dog tingge di aran raya mun sapok. Pak sunggu mŭnŭ, baji TUHAN dŭh re ko, ka re babŭ pakat tangan-I re ngukum daya-I.

²⁶ TUHAN nggen tandā ngga bagan ndi bangsa adi jo. Ayŭh nyimboh bagan ngara so bŭngŭn ong bada mandŭg, ka ngara mandŭg ngga sirikas-i!

²⁷ Mating so ngara bisa kawŭk; mating so ngara bisa sikak. Ngara bŭn nundu puan kah bŭŭs. Ngara ari sidia yŭn re biperang.

²⁸ Reja-panah ngara reja, ka bawŭh ngara sidia re nimbak. Tinjug kuda ngara riang mun batuh rŭrŭp, ka kaja krita kuda ngara bipusing mun sabak biriyung.

²⁹ Bara soldadu ngāb mun singah adi mbŭh dapŭd dangah-i ka taban-i ka tarun yŭn adi mating daya bisa sirapas-i so adŭp-i.

³⁰ Kan andu anŭ mandŭg, ngara re ngāb bana sak jawŭn girumbang di rawŭt, darŭm ngara nyerang Israel. Tingga meh, ndi rais rais anŭ dog marut karŭm ngga pinyusah! Jawa dog tŭrŭn karŭm!