ISAIAH 48 - Hakcipta - Biatah Bidayuh

Tapa inŭh TUHAN yŭn Tipuh adi Re

¹ Dingah ati, daya Israel, angān adi sesang Judah: Angān bipayu pakai adŭn TUHAN ka nang adŭp ngan nyambah Tapa Israel — pak angān dŭh sawŭ di pinganang ngan anŭ.

² Pak angān ngga atin sambuh nang adŭp ngan daya kupo adi kudus ka angān bisangan di Tapa Israel, adi dog kadŭn TUHAN Bisa-pŭrŭg.

³ TUHAN nang di Israel, “Ndun jah Aku ninjau kayuh adi re jadi; ka gŭgŭh Aku bada-i jadi.

⁴ Aku puan angān taŭn baking, bagŭg mun basi ka riyat mun timaga.

⁵ Ngapŭi Aku ndun jah muko ninjau munki tipuh ngan adi re, kidaan kayuh adi re jadi diŭ so tipuh-i, isa angān dŭh nang tibudo tibudo ngan adi bada-i jadi.

⁶ “Sopŭrŭg kayuh adi Aku muko diŭ kidaan mbŭh jadi madin; angān an ngaku nang pininjau Ku batur. Madin Aku re kidaan di angān kayuh kayuh adi bauh, rusia rusia adi Aku dŭh pinandŭng dawŭ-i.

⁷ Muran-i madin Aku bada-i jadi, gi-bŭn kayuh mun anŭ jadi dawŭ-i. Kambŭi agi, tatu angān re nang adŭp ngan mbŭh puan pasar-i.

⁸ Aku puan angān dŭh bisa dog sabah; angān dog puan nimun daya adi raan birawan. Ngapŭi angān bŭn dingah pasar kayuh anŭ, ka ndi bang pinganang pasar-i mating gŭh ndŭg kajit ngan.

⁹ “Aku bitan baji Ku, isa daya muji adŭn Ku; Aku bitan baji Ku, isa angān dŭh binasa.

¹⁰ Aku mbŭh suba angān ngga apui sangsara, mun pirak dog suba ngga apui. Pak Aku mbŭh dapŭd angān dŭh biguna.

¹¹ Kayuh adi Aku ndai inŭh yŭn kana adŭp Ku — Aku dŭh re bada adŭn Ku dŭh dog stabi bait bada tadŭ daya sua dapu bragah Ku adi patut tung jaku sadi.”

Cyrus, Pinguru adi TUHAN mien

¹² TUHAN nang, “Dingah Aku, Israel, daya adi Aku mbŭh bagan! Aku ati Tapa, adi sibungas, adi sikasŭn, ka adi sadi adŭ Tapa!

¹³ Tangan Ku ndai pimŭnŭs ong ka mamad rangit. Kan Aku bagan ong ngga rangit, soduwŭh-i rasu mandŭg.

¹⁴ “Tikuruk ka dingah, sopŭrŭg ngan! Mating so tapa tapa anŭ dapŭd ninjau nang daya adi Aku mbŭh mien re nyerang Babylon; ayŭh re ndai kayuh adi Aku raan ayŭh ndai.

¹⁵ Aku inŭh adi minyu ka bagan ayŭh; Aku nguru ayŭh ka bada ayŭh mujur.

¹⁶ “Mandŭg ka Aku madin ka dingah kayuh adi Aku nang. So sibungas-i Aku mbŭh minyu ngga tarang, ka mbŭh ari bada pinganang Ku jadi bitŭtŭk.” (Madin TUHAN Raja mbŭh nggen di aku kuasa-I ka pait aku.)

Atur Pinyiraan Tapa yŭn Daya-I

¹⁷ Tapa kudus Israel, TUHAN adi nyiramat angān, nang: Aku ati TUHAN adi Tapa ngan, adi raan ngajar angān yŭn kana adŭp ngan ka nyiruton angān di aran adi patut angān kadŭg.

¹⁸ “Nyamtadar kambŭi angān dingah pesan Ku, tatu angān adu adu trima berkat keya ka sungi adi bŭn badŭh! Pimanang ari tudu angān keya ka girumbang adi maad ka tabing.

¹⁹ Sesang ngan re raru bagŭ mun sirah sumat, ka Aku manŭn dŭh re tandah ngara dog pirabur.”

²⁰ Ruah so Babylon, pirupas adŭp ngan! Piagah agah anŭ ngga sirais gaŭn; bada-i dog dingah di barang yŭn: “TUHAN mbŭh nyiramat urun-I Israel!”

²¹ Kan TUHAN nguru daya-I mutas tarun tana-pajam adi paras, ngara dŭh badŭh asŭng. Ayŭh bada piin ruah so batuh yŭn ngara; Ayŭh mutah batuh, ka piin ruah so dieh.

²² “Daya bidosa dŭh re siramat,” nang TUHAN.