ISAIAH 46 - Hakcipta - Biatah Bidayuh

¹ “Ati inŭh pimungan tapa tapa Babylon! Bel ngga Nebo ko dawŭ-i dog nyambah, pak madin dog na di tunduh kaldi, jadi pinyirabis adi bat yŭn dāng adi mbŭh kawŭk.

² Tibudo dŭh dapŭd nyiramat adŭp-i; dog sirapas ka dog taban ngga bu. Simŭnŭ inŭh pimungan tapa tapa Babylon!

³ “Dingah Aku, sesang Jacob, sopŭrŭg daya Ku adi siramat. Aku mbŭh nyiran angān so angān dog biranak.

⁴ Aku ati Tapa ngan ka Aku re nyiran angān ndŭg ka angān mbŭh minyamba ka ubok ngan mbŭh buda. Aku napa angān ka re kingat angān; Aku re turung angān ka nyiramat angān.

⁵ “Asi re angān ngga danding Aku?” nang TUHAN. “Agi kah adi bŭkŭn adi mun Aku?

⁶ Daya kuka kambut duit ngara ka piruah mas; ngara nimbang pirak pakai dasin. Ngara ngupah tukang mas bada ndai tibudo; komŭnŭ ngara sidikang ka nyambah-i!

⁷ Ngara tunduk ka tawid tibudo anŭ; ngara pijog-i di yŭn adi dog nitah yŭn-i, diginŭ-i mijog ka dŭh dapŭd trigen so nŭ. Kambŭi daya bidua ka tibudo anŭ, tibudo anŭ dŭh dapŭd nam bait nyiramat daya anŭ so pinyirusag.

⁸ “Ingat kayuh ati, angān daya bidosa; Pikir kayuh adi Aku mbŭh ndai.

⁹ Ingat kayuh adi mbŭh jadi ndun jah; ngaku meh Aku sadi adŭ adi Tapa ka mating adi bŭkŭn mun Aku.

¹⁰ So sibungas-i jah Aku ninjau pinŭbŭn kayuh; ndun jah Aku muko diŭ kidaan kayuh adi re jadi. Aku nang atur kraja Ku dŭh re dŭh jadi, ka Aku re pijadi sopŭrŭg kayuh adi nang Ku Aku re ndai.

¹¹ Aku bagan ndi naan daya bada mandŭg so timor; ayŭh re nyambar mun beuh ka pijadi kayuh adi Aku muko ngatur. Aku mbŭh minyu, ka-i dŭh re dŭh dog ndai.

¹² “Dingah Aku, angān daya adi baking adi pikir pimanang gibabŭ jo.

¹³ Aku taban andu pimanang bada sindŭk — dŭh-i gibabŭ jo. Pimanang Ku dŭh re dog pirambat. Aku re nyiramat Jerusalem ka taban stabi ka Israel diginŭ.”