ISAIAH 45 - Hakcipta - Biatah Bidayuh

TUHAN Tijuan Cyrus

¹ TUHAN mbŭh mien Cyrus bada jadi raja! Ayŭh mbŭh tijuan ayŭh bada ngarah bangsa bangsa; Ayŭh pait ayŭh bada pirukos kuasa so raja raja; TUHAN re kuka tiban tiban-bās kupo yŭn-i. Di Cyrus TUHAN nang,

² “Adŭp Ku re sidia aran mu, pirata darŭd ngga sandah. Aku re nyirubuh tiban timaga kupo ka mata parang basi-i.

³ Aku re nggen di kuu pinyikaya so tarun adi karŭm ka adi bisukan; komŭnŭ kuu re puan nang Aku ati TUHAN, nang Tapa Israel mbŭh bagan kuu ngga dŭn mu.

⁴ Aku tijuan kuu bada turung urun Ku Israel, daya adi Aku mbŭh mien. Aku mbŭh nggen stabi di kuu, sunggu kuu dŭh puan Aku.

⁵ “Aku ati TUHAN; mating tapa bŭkŭn. Aku re nggen di kuu pinyibake adi kuu biguna, sunggu kuu dŭh puan Aku.

⁶ Aku ndai simŭnŭ isa barang naan daya so timor ndŭg barat puan nang Aku ati TUHAN ka mating tapa bŭkŭn.

⁷ Aku napa jawa ngga karŭm; Aku taban berkat ngga pinyirusag. Aku, adi TUHAN, ndai sopŭrŭg anŭ.

⁸ Aku re pait pimanang so rangit mun ujen rabu so rangit; ong re tikuka an kambat-i ka re mirarak ngga udip sanang ka pinyitŭnggŭn. Aku, adi TUHAN, re bada kayuh ati jadi.”

TUHAN adi Napa Sopŭrŭg Kayuh ngga Dundan Nyamba

⁹ Birani kah priok tana-riyat bikarit ngga daya adi ndai-i, priok adi brimun ngga sopŭrŭg priok adi bŭkŭn? Bisa kah tana-riyat siken daya adi ndai priok, “Ani ndai mu?” Bisa kah priok mingungut nang daya adi ndai-i dŭh pandai?

¹⁰ Birani kah daya siken pimas-i, “Mani aku dog biranak mun ati?”

¹¹ TUHAN, adi Tapa kudus Israel, adi ngatur jaman adi re, nang: “Kuu dŭh biyŭn hak siken Aku pasar bara anak Ku bait kidaan di Aku kayuh adi patut Aku ndai!

¹² Aku ati adi ndai ong, ka napa rayat manusia bada rŭŭ dieh. Ngga kuasa Ku Aku mamad rangit; Aku nguasa batŭh andu, buran, ka bitang bitang.

¹³ Adŭp Ku mbŭh kiruyok atin Cyrus bada ayŭh makat bada pijadi pinŭtŭn kraja Ku ka bada kayuh batur. Aku re bada tŭnggŭn sopŭrŭg aran adi-i kadŭg. Ayŭh re pari pijog kupo Ku, Jerusalem, ka pirupas daya Ku adi dog nakap, dŭh ngga bibayar bait dog nyuap.” TUHAN Bisa-pŭrŭg mbŭh minyu.

¹⁴ TUHAN nang di Israel, “Pinyikaya Egypt ngga Ethiopia re jadi jamu, ka bara daya Seba adi bigatung re jadi urun mu; ngara re tunda kuu buang dog muak ngga parik basi. Ngara re mutu ubak ka kuu ka ngaku, ‘Tapa agi ngga kuu — Ayŭh sadi adŭ Tapa.

¹⁵ Tapa Israel, adi nyiramat daya-I inŭh Tapa adi sukan adŭp-I.

¹⁶ Sopŭrŭg daya adi ndai tibudo re dog pimangŭh ka dog ngamun.

¹⁷ Pak Israel dog nyiramat TUHAN, ka pimanang-i tan adu adu; daya-I re dŭh dog pimangŭh.’ ”

¹⁸ TUHAN napa rangit — Ayŭh inŭh sianŭ adi Tapa! Ayŭh adi ndai ka pijadi ong — Ayŭh bada-i tagap ka tan tui. Ayŭh dŭh bada-i jadi tarun yŭn adi mating ani ani dieh, pak bada-i jadi tarun yŭn manusia rŭŭ, ka mating tapa adi bŭkŭn.

¹⁹ Aku bŭn minyu darŭm bisukan bait sukan pinŭtŭn kraja Ku. Aku dŭh bada daya Israel jiroh Aku ngga dŭh biyŭn rati. Aku ati TUHAN, ka Aku minyu kayuh adi sawŭ; Aku bada dog puan kayuh adi batur.”

TUHAN Ong ngga Tibudo Babylon

²⁰ TUHAN nang, “Mandŭg tikuruk, daya bangsa bangsa, sopŭrŭg adi babŭ udip ripas empaya anŭ rubuh; mandŭg yŭn dog suba! Daya adi baris ngga tibudo ngara adi dog ndai so kayuh adi bidua ka tapa adi dŭh dapŭd nyiramat ngara — ngara dŭh puan ani ani!

²¹ Mandŭg ka taban har ngan ka yŭn bisara; bada ngara adi nyibandar angān bisiken ngga dingan-i. Asi ko ndun jah ninjau kayuh adi re jadi? Dŭh kah anŭ adŭp Ku, adi TUHAN, Tapa adi nyiramat daya-I? Mating tapa adi bŭkŭn.

²² “Marik pimudip ngan pari ka Aku madin, angān daya di ndi ong ong, isa angān dog nyiramat! Ripas so Aku, mating adi bŭkŭn.

²³ Janji Ku agi sawŭ, ka-i re dŭh dog ngubah. Aku bipayu pakai asi adŭp Ku ati: Barang naan re mandŭg ka sidikang di sirung jawin Ku ka mutu ubak raan nundok di Aku.

²⁴ “Ngara re nang kaŭs-i so Aku adŭ pimanang ngga pinyibake bisa dog dapŭd; pak sopŭrŭg adi tiru di Aku re mangŭh.

²⁵ Aku, adi TUHAN, re nyiramat sopŭrŭg sesang Jacob, ka ngara re muji Aku.