ISAIAH 44 - Hakcipta - Biatah Bidayuh

TUHAN Sadi adŭ Tapa

¹ TUHAN nang, “Dingah, Israel, adi urun Ku, daya adi Aku mien, sesang Jacob.

² Aku ati TUHAN adi napa kuu; so andu mu dog biranak, Aku mbŭh turung kuu. Dŭhnyah taru; kuu inŭh urun Ku, daya adi Aku mbŭh mien adi Aku rindu.

³ “Aku re nggen piin di tana adi badŭh ka bada anak anak sungi aman di tarun adi badŭh. Aku re ren roh Ku di anak anak mu ka berkat Ku di tunduh bara sesang mu.

⁴ Ngara re timbu mun kupai di tana adi bisa, mun tŭngŭn poplar di bŭngŭn sungi adi aman piin-i.

⁵ “Ndi ngga ndi, daya re nang, ‘Aku tung TUHAN.’ Ngara re mandŭg ka bigaur ngga daya Israel. Barang naan ngara re na tandā TUHAN di tangan ngara ka kadŭn adŭp ngara bara daya Tapa.”

⁶ TUHAN, adi mritah ka grindung Israel, TUHAN Bisa-pŭrŭg, nang: “Aku inŭh adi sibungas, adi sikasŭn, adi sadi adŭp Ku Tapa; mating tapa adi bŭkŭn adŭ-i Aku.

⁷ Dapŭd kah daya bŭkŭn ndai kayuh adi Aku mbŭh ndai? Asi dapŭd ninjau sopŭrŭg kayuh adi re jadi so tibirik-i ndŭg sikasŭn tipuh?

⁸ Dŭhnyah taru, angān adi daya Ku! Angān puan so ndun jah ndŭg madin Aku mbŭh ninjau sopŭrŭg kayuh adi re jadi, ka angān inŭh urun Ku. Agi kah tapa bŭkŭn? Agi kah tapa, adi bayuh Aku puan, adi bikuasa?”

Adat Nyambah Tibudo dog Nyara

⁹ Sopŭrŭg ngara adi nyambah tibudo inŭh dŭh biguna, ka tapa tapa adi ngara muji inŭh au-tarun. Ngara adi nyambah tapa tapa anŭ inŭh karak ka dŭh mirati tarun; ngara re dog pimangŭh.

¹⁰ Dŭh inŭh kana ndai gayŭn so basi ka nyambah-i mun tapa!

¹¹ Barang naan adi nyambah-i re dog pimangŭh. Daya adi ndai tibudo inŭh manusia saja. Bada ngara mandŭg situra jawin ngga Aku — ngara re taru ka re mangŭh.

¹² Tukang basi mbit ndi kiping basi ka nyiraja-i pakai apui. Tangan-i bake pawing pabā, ka maba basi anŭ bada pigayŭn. Buang-i nyiraja, ayŭh sibŭrŭk, badŭh asŭng, ka kawŭk.

¹³ Tukang kayuh ngŭkŭd apŭg kayuh. Ayŭh mutik gayŭn dieh, mŭŭt-i ngga pingakas-i bada mun gayŭn manusia adi ramus, ka rasu pijog-i di ramin-i.

¹⁴ Ayŭh bisa tabŭng tŭngŭn sedar an-i pakai, bait mien tŭngŭn oak puan kah tŭngŭn sipres so tuān. Ayŭh bisa gŭh purun tŭngŭn laurel ka kajŭn ujen ngga bada tŭngŭn anŭ timbu.

¹⁵ Daya pakai kada apŭg tŭngŭn kayuh ndu uwang ka kada-i ngga ndai tibudo. Kada-i ngga ndai apui ngga nyinduh ka ngga ndai ruti. Adi bŭkŭn ayŭh pakai ngga ndai tapa adi-i nyambah.

¹⁶ Kada kayuh anŭ ayŭh pakai ngga ndai apui; ayŭh manggang dagin, man-i, ka bisoh. Ayŭh nyinduh ka nang, “Kana raru, paras bada-i! Apui anŭ ruai ramus-i!”

¹⁷ Apŭg adi bŭkŭn ayŭh pakai ngga ndai tibudo, ka komŭnŭ ayŭh mutu ubak ka nyambah-i. Ayŭh bidua ka nang, “Kuu inŭh tapa ku; nyiramat aku!”

¹⁸ Daya adi mun anŭ mbŭh raru budo re puan kayuh adi ndai-i. Ngara mŭdŭm ka tŭŭp pikir-i di kayuh adi sawŭ.

¹⁹ Daya adi ndai tibudo dŭh adŭ biyŭn atin ka pikir ngga nang, “Kada kayuh anŭ aku mbŭh badang. Aku ndai ruti ka manggang dagin ka man-i. Tadŭh apŭg kayuh anŭ aku pakai ngga ndai tibudo. Tingga meh aku nyambah apŭg kayuh!”

²⁰ Pingandai anŭ mbŭh keya ka man apŭk. Pikir kira-i adi budo mbŭh kinanyap ayŭh ndŭg ka dŭh dapŭd dog turung tia. Ayŭh dŭh re ngaku nang tibudo adi ayŭh digŭng ngga tangan-i anŭ dŭh tapa.

TUHAN, adi Pinapa ngga Pinyikudip

²¹ TUHAN nang, “Israel, ingat ati; ingat adŭp ngan inŭh urun Ku. Aku napa angān bada jadi urun Ku, ka Aku dŭh re kambŭt angān.

²² Aku mbŭh taran dosa ngan keya ka abun. Pari ka Aku; Aku inŭh adi nyiramat angān.”

²³ Nyirais amai gaŭn, angān rangit! Nyirais, tarun yŭn adi tŭrŭp darŭm tana! Nyirais amai gaŭn, darŭd, ka barang tŭngŭn kayuh di tuān! TUHAN mbŭh kiren bās-I darŭm-I nyiramat daya-I Israel.

²⁴ “Aku ati TUHAN, adi pinyikudip ngan; Aku inŭh adi napa angān. Aku ati TUHAN, adi Pinapa sopŭrŭg kayuh. Aku sadi adi mamad rangit; di tika Aku napa ong, mating daya turung Aku.

²⁵ Aku nyibudo bara daya adi pandai kidaan nasip ka ngarut pininjau bara adi puan pasar bitang. Pinganang daya bijak Aku matah ka kiren pinyibijak ngara budo.

²⁶ Pak kan urun Ku ninjau, kan Aku pait pinyisung bada pinandŭng atur kraja Ku, Aku bada atur kraja ngga pininjau anŭ jadi bitŭtŭk. Aku kidaan di Jerusalem nang daya re pari rŭŭ diginŭ, ka kupo kupo Judah re pari dog pijog. Kupo kupo anŭ re makat so tugung rakang tibawang.

²⁷ Ngga ndi bang piminyu Aku mritah rawŭt bada badŭh.

²⁸ Aku nang di Cyrus, ‘Kuu inŭh adi re mritah yŭn Ku; kuu re ndai kayuh adi Aku raan kuu ndai: kuu re nggen ukum bada Jerusalem dog pari pijog ka na pinagap-rasan Ramin TUHAN.’ ”