ISAIAH 41 - Hakcipta - Biatah Bidayuh

Tapa Ngatat Israel

¹ Tapa nang, “Pajam ka dingah Aku, angān rais adi jo! Sidia adŭp ngan yŭn minyu har ngan di yŭn bisara; angān re biyŭn pluang ngga minyu. Ja ata mandŭg tikuruk ka natu asi adi batur.

² “Asi anŭ adi taban pinyerang so timor, ka bada ayŭh marar manang di barang yŭn-i nyerang? Asi bada ayŭh manang ngarah raja raja ka bangsa bangsa? Pedang-i japa ngara mun japa dabu. Reja panah-i mesak ngara mun siriyang dog poh sabak.

³ Ayŭh tadak ngara ka masang ngga dŭh mani mani, raru raju ndŭg ka kaja-i dŭh dog tana!

⁴ Asi anŭ adi bada-i jadi simŭnŭ? Asi adi natu pimanu dundan nyamba? Aku, adi TUHAN, mbŭh agi diginŭ di sibungas-i, ka Aku, adi TUHAN, re agi diginŭ di pinŭbŭn-i.

⁵ “Daya di rais rais adi jo mbŭh kiris kayuh adi Aku mbŭh ndai; ngara taru ka kimŭtŭr amai tikaran. Jadi sopŭrŭg ngara mandŭg tikuruk.

⁶ Sopŭrŭg daya turung ka ngatat dingan-i.

⁷ Tukang kayuh nang di tukang mas, ‘Pandai kuu!’ Daya adi tukang mupu pijarŭh tibudo ngatat sianŭ adi tukang masak-i ngga pasak. Ngara nang, ‘Pijar-i kana’ — ka ngara nagap tibudo anŭ ngga pasak.

⁸ “Pak angān, Israel adi urun Ku, Angān inŭh daya adi Aku mbŭh mien, adi bara sesang Abraham, jerā Ku.

⁹ Aku taban angān so bŭngŭn ong; Aku bagan angān so sikuh tarun adi raru jo ka nang di angān, ‘Angān inŭh bara urun Ku.’ Aku dŭh tirawan angān, pak mien angān.

¹⁰ Dŭhnyah taru — Aku agi ngga angān! Aku ati Tapa ngan — dŭhnyah bada ani ani pitaru angān! Aku re bada angān bake ka turung angān; Aku re grindung angān ka nyiramat angān.

¹¹ “Ngara adi tiru di angān re mangŭh amai mbŭh dog ngarah. Ngara adi rawan angān re kabŭs

¹² ka re miyap so ong.

¹³ Aku ati TUHAN adi Tapa ngan. Aku nyibake angān ka nang, ‘Dŭhnyah taru; Aku re turung angān.’ ”

¹⁴ TUHAN nang, “Sawŭ angān sŭ buang ramah, Israel, dŭhnyah taru; Aku re turung angān. Aku, adi Tapa kudus Israel, Aku inŭh adi nyiramat angān.

¹⁵ Aku re bada angān jadi keya ka papan adi yŭn ngiik, agi jipŭh-i adi bauh ka reja. Angān re ngiik darŭd ka pirubuh-i; sandah re asur jadi dabu.

¹⁶ Angān re napan sopŭrŭg-i. ka sabak re taban-i ngga bu, ka-i re mingare bada sabak ribut. Komŭnŭ angān re gaŭn amai Aku ati Tapa ngan; angān re muji Aku, Tapa kudus Israel.

¹⁷ “Kan daya Ku adi sirata jiroh piin, kan gungong ngara badŭh an nok, ka, Aku, adi TUHAN, re nam dua ngara; Aku, adi Tapa Israel, re dŭh tagan ngara.

¹⁸ Aku re bada sungi sungi aman di sandah adi matung ka piin so rubang rubang piin aman di dau. Aku re bada tarun tana-sumat marui jadi pagong pagong piin ka tarun tana badŭh jadi rubang rubang piin adi so piin aman.

¹⁹ Aku re bada tŭngŭn tŭngŭn sedar timbu di tarun tana-sumat, samŭn tŭngŭn acacia, tŭngŭn kemunting, ka tŭngŭn kanā. Tuān re timbu di tarun tana-matung, tuān tŭngŭn pain, junipa, ka sipres.

²⁰ Daya re kiris ati ka puan nang Aku, adi TUHAN, adi napa-i. Ngara re mandŭg ka mirati nang Tapa kudus Israel adi napa-i.”

TUHAN Natang Tapa-kadong

²¹ TUHAN, adi raja Israel, mbŭh nang sakati: “Angān tapa tapa bangsa, kiren meh har ngan. Minyu meh nyibandar har ngan!

²² Mandŭg kamati ka ninjau kayuh adi re jadi, isa ata puan-i kan-i tambus. Kidaan di yŭn bisara kayuh adi muko jadi, ka kidaan di kieh rati-i.

²³ Kidaan di kieh ani re jadi jŭ — ka kieh re puan nang angān sawŭ tapa! Ndai kayuh kana puan kah taban pinyirusag; bada kieh taru ka inga inga!

²⁴ Angān ngga sopŭrŭg pingandai ngan inŭh au-tarun; ngara adi nyambah angān inŭh sipŭ darŭm pimudip-i!

²⁵ “Aku mbŭh mien ndi naan daya so timor; Aku re taban ayŭh ngga nyerang so tura ka utara. Ayŭh re bidigang di bara pimritah mun bidigang di tawang, mun tukang priok bidigang di tana-riyat.

²⁶ Asi so angān ninjau nang kayuh ati re jadi, isa kieh dapŭd nang angān batur? Mating so angān nang ani ani pasar kayuh ati; mating daya dingah angān nang ani ani!

²⁷ Aku, adi TUHAN, inŭh adi diŭ kidaan kayuh anŭ di Zion; Aku pait pinyisung ka Jerusalem ka nang, ‘Daya ngan mandŭg! Ngara mbŭh mari!’

²⁸ Kan Aku tingga bara tapa anŭ, ngara dŭh nang ani ani; ndi naan mating gŭh adi dapŭd nam pinyiken Ku.

²⁹ Sopŭrŭg tapa anŭ dŭh biguna; mating kayuh dapŭd ngara ndai; bara tibudo anŭ ramah ka dŭh biyŭn kuasa.”