ISAIAH 35 - Hakcipta - Biatah Bidayuh

Aran Pinyikudus

¹ Tarun tana-sumat re gaŭn, ka bunga re mirarak di tarun tana-pajam.

² Tarun tana-pajam re biragu ka nyirais amai gaŭn; ayŭh re sangŭn mun Darŭd Lebanon ka damŭn mun tana ŭmŭh di Carmel ngga Sharon. Barang naan re kiris sangŭn TUHAN, kiris bās ngga kuasa-I.

³ Nggen pinyibake di tangan adi mbŭh kawŭk ka di karŭb adi kimŭtŭr amai ramah.

⁴ Kidaan di barang naan daya adi pinakut, “Nyiriang simangi ngan ka dŭhnyah taru! Tapa mandŭg di nyiramat angān, mandŭg di ngukum pinganyu ngan.”

⁵ Daya karak re dapŭd kiris, ka daya bangam re dapŭd dingah.

⁶ Daya bajang re mirupat ka bitanda, ka ngara adi dŭh pandai minyu re nyirais ngga gaŭn. Anak anak sungi re aman di tarun tana-pajam;

⁷ sumat adi paras re jadi pagong piin, ka tana badŭh re brisi ngga rubang rubang piin. Di yŭn kasong tarun ko yŭn rŭŭ, uduh padak ngga kayuh reed re timbu,

⁸ Re agi aran raya diginŭ, dog kadŭn “Aran Pinyikudus”. Mating daya bidosa re an panu kadŭg aran anŭ; mating daya budo re kinanyap daya adi panu kadŭg-i.

⁹ Singah re mating diginŭ; mating dāng mangah re mutas aran anŭ. Ngara adi TUHAN mbŭh nyiramat re panu mari kadŭg aran anŭ.

¹⁰ Ngara re ndŭg Jerusalem ngga sanang asŭng, biragu buang nyirais amai gaŭn. Ngara re sanang ndŭg situi tui, adu adu dŭh susah ka jera.