ISAIAH 33 - Hakcipta - Biatah Bidayuh

Dua Mite Turung

¹ Mbŭh payah inŭh pinganyu ta! Ngara mirupak ka jua daya, pŭn ka mating daya mirupak bait jua ngara. Pak tika ngara mirupak ka jua daya re mating tia, ka adŭp ngara inŭh adi re dog mirupak ka dog jua.

² TUHAN, masi di kieh. Kieh mbŭh na pingarap ami di Kaam. Grindung kieh barang andu ka pirupas kieh so pinyusah.

³ Kan Kaam turung kieh biperang, bangsa bangsa bikaduh bu.

⁴ Kayuh adi ngara dapu dog sirabut ka jadi kayuh sirapas.

⁵ TUHAN inŭh raru bās! Ayŭh nguasa sopŭrŭg kayuh. Ayŭh re ngisi Jerusalem ngga pinyitŭnggŭn ka pinŭnggŭn

⁶ ka nggen damai di daya-I. Ayŭh ari grindung daya-I ka nggen pinyibijak ngga pinyipuan di ngara. Rata bās ngara inŭh udip stabi buang taru di TUHAN.

⁷ Daya adi birani, bagan mite turung. Pingarun pingarun adi suba ngatur damai sien darŭm susah.

⁸ Daya mating panu di aran raya, amai taru. Pekat-damai ngga pekat-janji mbŭh dog miranggar ka dŭh dog sita. Mating daya dog stabi tia.

⁹ Tarun tana dŭh dog sita ka mating daya dieh. Tuān Lebanon mbŭh rayu, rubān Sharon adi damŭn mbŭh mun tarun tana-pajam, ka di Bashan ngga di Darŭd Carmel dawŭn dawŭn kayuh mbŭh ruruh so tŭngŭn-i.

TUHAN Bakan Pinganyu-I

¹⁰ TUHAN nang di bangsa bangsa, “Madin Aku re makat. Aku re kiren di angān bās kuasa Ku.

¹¹ Angān ndai pusar adi dŭh biguna ka barang masam kayuh adi angān ndai inŭh au-tarun. Roh Ku inŭh keya ka apui adi re pirusag angān.

¹² Angān re riris mun batuh dog badang bada jadi binyuh, mun tŭngŭn reja dog badang bada jadi apŭk.

¹³ Isa barang naan daya adi sindŭk ngga adi jo dingah kayuh adi Aku mbŭh ndai, mirati ka ngaku kuasa Ku.”

¹⁴ Daya Zion adi bidosa mbŭh kimŭtŭr amai taru. Ngara nang, “Ukum Tapa inŭh keya ka apui adi adu adu sakŭt. Asi so ata re siramat so apui adi mun anŭ?”

¹⁵ Angān re siramat kambŭi angān nang ka ndai kayuh adi batur. Dŭhnyah pakai kuasa ngan ngga nipu daya sirata bait trima suap. Dŭhnyah mŭrŭt pekat daya adi bisatur an siŭ daya puan kah ndai tadŭ masam pingandai adi arap.

¹⁶ Simŭnŭ angān re siramat; angān re dog grindung keya ka darŭm kuta adi tagap. Angān re biyŭn pinguman ka piin nok.

Tipuh Bragah adi Re

¹⁷ Ka dinge, angān re kiris ndi naan raja adi mritah darŭm sangŭn di rais adi bayah biratau ka barang parad-i.

¹⁸ Dawŭ-i angān taru daya adi tukang sun suke ngga bara pinyiong, pak madin kayuh anŭ batur-i kayuh adi darŭm pikir ngan adŭ.

¹⁹ Angān re dŭh tia kiris daya tami adi sambuh adi minyu ngga piminyu adi dŭh angān mirati.

²⁰ Tingga Zion, kupo di yŭn ata sita gawai adat. Tingga Jerusalem! Tarun yŭn adi re siramat yŭn nŭŭh rŭŭ! Anŭ re keya ka bari adi bŭn dog sigen, pagu-i bŭn dog dimbut ka taris-i bŭn patŭd.

²¹ TUHAN re kiren bragah-I di ata. Ata re rŭŭ di bŭngŭn anak anak sungi ngga sungi adi bayah, pak-i re dŭh dog mŭrŭt kapar pinganyu.

^22-23 Sopŭrŭg pingakas di kapar anŭ dŭh biguna; rayar-i dŭh dapŭd dog murai! Ata re sirapas sopŭrŭg pinyikaya bara tibaran soldadu pinganyu, ka kiang-i re raru bagŭ ndŭg ka daya bajang re sua dapŭd utung. Adŭp TUHAN re jadi raja ta; Ayŭh re mritah ata ka grindung ata.

²⁴ Mating daya adi udip di tarun tana ta re nang adŭp-i mandam, ka sopŭrŭg dosa re dog apun.