ISAIAH 29 - Hakcipta - Biatah Bidayuh

Pinŭbŭn Jerusalem

¹ Mbŭh payah inŭh Jerusalem, adi mija-sambah Tapa! Mbŭh payah inŭh kupo adi yŭn David bibari! Kaŭs-i dŭm ndi puan kah duwŭh sawa adŭ samŭn gawai gawai-i ka pinyirami-i,

² ka komŭnŭ Tapa re taban pinyirusag bada nyatŭk kupo anŭ adi dog kadŭn “Mija-sambah Tapa”. Re agi muās ngga sien adi bana, ka ndi kupo kupo anŭ re keya ka mija-sambah adi puno ngga deya.

³ Tapa re nyerang kupo anŭ, kirurung ka nyikapung-i.

⁴ Jerusalem re keya ka mindo adi bandar bandar suba an minyu so darŭm tana, sak sirŭŭn adi sigayas ruah so dabu.

⁵ Jerusalem, sopŭrŭg daya saruh adi nyerang kuu re dog poh mun dabu, ka bara tibaran soldadu ngara re mikabur bu mun siriyang. Ka gŭgŭh ngga dŭh dog rada

⁶ TUHAN Bisa-pŭrŭg re nyiramat kuu ngga dudū ka kijat ka ngga tana bigugoh. Ayŭh re pait sabak ribut adi bangat ngga jireb apui;

⁷ komŭnŭ sopŭrŭg bara tibaran soldadu bangsa bangsa adi nyerang kupo mija-sambah Tapa, sopŭrŭg sinyata ngga pingakas ngara re miyap keya ka darŭm pŭmŭh; mun kayuh adi dog nyipŭmŭh singarŭm.

⁸ Sopŭrŭg bangsa adi tikuruk re nyerang Jerusalem re jadi keya ka daya sikirau adi nyipŭmŭh adŭp-i man ka burah sibŭrŭk, puan kah keya ka daya badŭh asŭng adi nyipŭmŭh adŭp-i nok ka burah ngga gungong babŭ badŭh.

Dŭh Piduri Pinyibakan

⁹ Jadi budo adŭ nŭh! Jadi karak adŭ nŭh! Jadi mabuk adŭ nŭh pak dŭh sabab wain! Tibabeu adŭ nŭh pak dŭh sabab arak!

¹⁰ TUHAN mbŭh bada kuu nundu, mbŭh re an bŭŭs rŭrŭ. Bara nabi patut jadi batŭh yŭn bara daya, pak Tapa mbŭh nutu batŭh ngara.

¹¹ Rati sopŭrŭg kayuh adi dog kiris keya ka darŭm pŭmŭh re dog sukan so kuu; anŭ re keya ka surat-barun adi mbŭh dog matis. Kambŭi kuu taban-i ka yŭn daya adi pandai basa ka bada ayŭh basa-i yŭn mu, ayŭh re nang ayŭh dŭh dapŭd sabab-i dog matis.

¹² Kambŭi kuu nggen di daya adi dŭh pandai basa ka bada ayŭh basa-i yŭn mu, ayŭh re nang adŭp-i dŭh pandai.

¹³ TUHAN nang, “Ngara ati nang adŭp-i nyambah aku, pak pinganang ngara au-tarun, ka atin ngara di tarun bŭkŭn. Adat ngara kaŭs-i atur ngga pingandai adat adŭ, adi ngara ingat.

¹⁴ Jadi Aku re bada ngara gŭgŭh ngga pukong adi dŭh ngara rada pak pari pari dog ngara. Ngara adi bijak re jadi daya budo, ka sopŭrŭg pinyipitar ngara re dŭh biyŭn guna.”

Pingarap yŭn Tipuh adi Re

¹⁵ Payah inŭh ngara adi suba sukan atur pikir-kira ngara so TUHAN! Ngara ndai atur kraja pingandai ngara darŭm bisukan ka pikir daya mating kiris ngara bait dŭh puan kayuh adi ngara ndai.

¹⁶ Ngara mutar marik sopŭrŭg kayuh. Aki ndi adi siabo biguna, tukang priok puan kah tana-riyat? Bisa kah kayuh adi dog ndai nang di daya adi ndai-i, “Kuu mating ndai aku”? puan kah “Kuu dŭh puan kayuh ndai mu”?

¹⁷ Sak adi nang daya, dŭm dŭh tui tuān re jadi tarun tana teya, ka tarun tana teya re pari jadi tuān.

¹⁸ Kan andu anŭ mbŭh mandŭg, daya bangam re dapŭd dingah daya basa surat, ka daya karak, adi mbŭh tian-ti udip darŭm karŭm, re dapŭd kiris tarun.

¹⁹ Daya sirata ngga daya adi dog pimangŭh re pari dapŭd udip sanang so TUHAN, Tapa kudus Israel.

²⁰ Anŭ re jadi pimungan ngara adi kinanyuh daya ka adi tiru di Tapa. Barang naan daya bidosa re dog pirabur.

²¹ Tapa re pirabur ngara adi nyarah daya, ngara adi bitan daya adi sarah so dog ukum, samŭn daya adi nggen taksi kadong ngga bada pinyitŭnggŭn dŭh dog pimanu yŭn daya adi jujur.

²² Jadi madin TUHAN, adi Tapa Israel, adi nyiramat Abraham so dog pinyusah, nang, “Daya Ku, angān dŭh re dog pimangŭh tia, ka jawin ngan re dŭh tia pusat amai mangŭh.

²³ Kan angān kiris anak anak adi Aku nggen di angān, angān re ngaku Aku ati Tapa Israel, Tapa adi kudus. Angān re stabi di Aku ngga atin taru.

²⁴ Daya budo re birajar mirati, ka ngara adi ari bibatah re suka dog ngajar.”