ISAIAH 27 - Hakcipta - Biatah Bidayuh

¹ Di andu anŭ TUHAN re pakai pedang-I adi bikuasa ngga adi bisā ngga ngukum Leviathan, jippŭh anŭ adi mikiror, adi bikaring, ka siŭ dāng-bās anŭ. adi rŭŭ di rawŭt.

² Di andu anŭ TUHAN re minyu pasar teya anggor-I,

³ “Aku ari sita teya anggor anŭ ka namuh-i ngga piin. Aku jaga-i sandu singarŭm isa daya dŭh pirusak-i.

⁴ Aku dŭh tia baji di teya anggor anŭ. Kambŭi agi tŭngŭn reja ngga bakah pireja dieh, Aku bisa kubo badang-i.

⁵ Pak kambŭi pinganyu daya Ku raan pinyigrindung so Aku, isa-i ngara bidamai ngga Aku. Sawŭ, isa-i ngara bidamai ngga Aku.”

⁶ Di tipuh adi re mandŭg, daya Israel, adi sesang Jacob, re piruat mun tŭngŭn kayuh, ka ngara re bisera ka musu. Ong re puno ngga buwa adi-i piruah.

⁷ Daya Israel bŭn bandar dog ukum TUHAN mun bara pinganyu ngara dog ukum; dŭh gŭh ngara bagŭ kabŭs mun pinganyu ngara.

⁸ Gaya TUHAN ngukum daya-I inŭh, Ayŭh taran ngara ka rais daya bŭkŭn. Ayŭh taban ngara ngga bu pakai sabak adi ganas so timor.

⁹ Pak dosa Israel re dog apun adŭ-i kan batuh mija-sambah daya adat karŭm mbŭh dog pirandŭk ndŭg ka asur mun dabu binyuh, ka mating tia mija-sambah kimanyan, bait tandā tandā pinatŭng tapa Asherah dŭm.

¹⁰ Kupo adi bikuta mbŭh rusag; mbŭh dog tagan mun tarun tana-pajam adi mating ani ani dieh. Ayŭh mbŭh jadi tarun tana kupai yŭn sapi, di yŭn-i rŭŭ ka man kupai.

¹¹ Daan daan tŭngŭn kayuh mbŭh rayu ka pata, ka bara dayung sun-i ndu uwang. Sabab daya dŭh mirati ani ani, Tapa adi Pinapa ngara dŭh re masi bait apun ngara.

¹² Di andu anŭ, so Euphrates ndŭg baat Egypt, TUHAN re nguruk daya-I ndi ngga ndi, mun daya nyidŭrŭ gandom so aping.

¹³ Kan andu anŭ mbŭh mandŭg, trompet re dog mambak ngga bagan sopŭrŭg daya Israel adi dog taran ka Assyria ngga Egypt. Ngara re mandŭg ka nyambah TUHAN di Jerusalem, di sandah kudus-I.