ISAIAH 26 - Hakcipta - Biatah Bidayuh

Tapa re Nggen Pimanang di Daya-I

¹ Andu-i re mandŭg adi ngga daya re nang ragu ati di tarun tana Judah: Kupo ta tagap! Adŭp Tapa kingat sindung-i!

² Kuka tiban tiban-bās kupo ka bada bangsa adi tŭtŭd mŭrŭt, daya-i adi ndai kayuh adi batur.

³ Kaam, TUHAN, nggen damai adi sawŭ di ngara adi tŭtŭd ka adi na pinyabah di Kaam.

⁴ Sabah di TUHAN adu adu; Ayŭh re ari grindung ata.

⁵ Ayŭh mbŭh pirapat ngara adi sambuh; Ayŭh nyirubuh kupo adi tagap adi yŭn ngara rŭŭ, ka bada sindung-i asur jadi dabu.

⁶ Ngara adi dog kinanyuh panu ka bidigang dieh madin.

⁷ Aran adi daya adi kana kadŭg inŭh tŭnggŭn; sabab Kaam, TUHAN, adi nŭnggŭn-i yŭn ngara.

⁸ Kieh tunda pinyiraan Mai ka na pingarap ami di Kaam; Kaam sadi adŭ adi kieh rindu.

⁹ Singarŭm aku jiroh Kaam ngga siabo atin ku; kan Kaam nggen bisara di tunduh ong samŭn daya-i, ngara re puan ani anŭ pinyitŭnggŭn.

¹⁰ Sunggu Kaam mandis ngga daya adi ginaka, ngara bŭn birajar ndai kayuh adi batur. Digiti di tarun tana daya tŭnggŭn bait kani, daya babŭ gŭh ndai sarah; ngara abah ngaku bās Mai.

¹¹ Pinganyu Mai dŭh puan Kaam re ngukum ngara. TUHAN, pimangŭh ngara ka bada ngara sangsara; bada ngara sangsara ngga ukum adi Kaam mbŭh sidia yŭn ngara. Kiren di ngara munki masam Kaam rindu daya Mai.

¹² Kaam re bada kieh mujur, TUHAN; sopŭrŭg kayuh adi kieh dapŭd jadi so pingandai Mai.

¹³ TUHAN adi Tapa ami, kieh mbŭh dog mritah daya bŭkŭn, pak Kaam sadi adŭ adi TUHAN ami.

¹⁴ Madin ngara mbŭh kabŭs ka dŭh re pari udip; mindo ngara dŭh re makat, amai Kaam mbŭh ngukum ngara ka pirabur ngara. Mating daya ingat ngara tia.

¹⁵ TUHAN, Kaam mbŭh bada daya bangsa ami bitambah, nambah tarun tana ami bada bayah di barang yŭn, ka anŭ mbŭh bada Kaam dog kibās.

¹⁶ Kaam ngukum daya Mai, TUHAN, ka darŭm susah ngara bidua ka Kaam.

¹⁷ Kaam, TUHAN, mbŭh bada kieh sien, keya ka dayung adi re biranak sien naman sarang-i.

¹⁸ Kieh bite, ka kieh naman sarang-i, pak mating ani ani dog ruwan ami. Kieh mating dapŭd pimanang yŭn ong; kieh dŭh gŭh nambah daya adi rŭŭ dieh.

¹⁹ Daya Mai adi mbŭh kabŭs re pari udip dinge! Tadang ngara re makat udip dinge. Sopŭrŭg ngara adi bŭŭs darŭm kubur re burah ka biragu ngga gaŭn. Nimun kirib sipot-abun adi misa tana, simŭnŭ gŭh TUHAN re pakat ngara adi mbŭh tui kabŭs.

Bisara ngga Pinyipari

²⁰ Mŭrŭt arŭn ngan, daya Ku, ka tŭŭp tiban ngan. Sukan adŭp ngan dawŭ-i ndŭg ka Tapa ko baji.

²¹ TUHAN inŭh mandŭg so yŭn pinyirŭŭ-I di shorga di ngukum daya di ong amai dosa ngara. Pinyiŭ adi dog ndai di ong darŭm bisukan re dog pinandŭng, ka tana dŭh re tia sukan ngara adi dog siŭ.