ISAIAH 2 - Hakcipta - Biatah Bidayuh

Damai adi Tan Adu Adu

¹ Ati inŭh pinganang adi Tapa nggen di Isaiah anak Amoz pasar Judah ngga Jerusalem:

² Di tipuh adi re mandŭg sandah di yŭn Ramin TUHAN mijog re jadi adi siabo bigatung, bigatung so sopŭrŭg sandah. Bagŭ bangsa re birumbek kamanŭ,

³ ka daya bangsa bangsa anŭ re nang, “Ja ata maad sandah TUHAN, di tudu Ramin Tapa Israel. Ayŭh re ngajar ata kayuh adi Ayŭh raan ata ndai; ata re panu aran adi Ayŭh mbŭh mien. Amai ajar TUHAN mandŭg so Jerusalem; so Zion Ayŭh minyu di bara daya-I.”

⁴ Ayŭh re nggen bisara di bangsa bangsa bās. Ngara re maba pedang bada jadi sinda bajak, jarok bada jadi sinda adi ngga mŭpŭd tugu pimuruh. Bangsa bangsa re dŭh tia matak biperang, dŭh tia sidia yŭn bisaad.

⁵ Madin, sesang Jacob, ja ata udip darŭm jawa adi TUHAN nggen di ata!

Daya adi Sambuh re dog Pirabur

⁶ O Tapa, Kaam mbŭh tagan daya Mai, adi bara sesang Jacob! Tarun tana ati puno ngga kraja pinanung so timor ngga Philistia. Daya tunda adat daya tami.

⁷ Tarun tana ngara puno ngga pirak ka mas, ka buat-rata ngara dŭh pandai abo. Kuda ngara raru bagŭ ka krita kuda ngara dŭh tungang dog ngitong.

⁸ Tarun tana ngara puno ngga tibudo, ka ngara nyambah kayuh adi dog ndai so tangan adŭp ngara.

⁹ Barang naan re dog ngamun ka dog pimangŭh. Dŭhnyah apun ngara, TUHAN!

¹⁰ Ngara re bisukan darŭm tāng di darŭd darŭd batuh, puan kah kareh rubang di tana yŭn mangān baji TUHAN ka bisukan so kuasa ngga bragah-I!

¹¹ Andu-i re mandŭg adi ngga uap-sambuh manusia re mungan ka udip mirawa manusia dog pirabur. Komŭnŭ TUHAN sadi adi re dog katuh.

¹² Di andu anŭ TUHAN Bisa-pŭrŭg re pirapat barang naan daya di bikuasa, barang naan adi gambung ngga adi miruap.

¹³ Ayŭh re pirabur tŭngŭn sedar Lebanon adi bigatung ngga sopŭrŭg tŭngŭn oak di tarun tana Bashan.

¹⁴ Ayŭh re pirata darŭd ngga sandah adi bigatung,

¹⁵ sopŭrŭg tawā adi bigatung, samŭn sindung sopŭrŭg kuta.

¹⁶ Ndŭg ka kapar adi siabo baga ngga adi siabo ramus re-I bada timŭtŭm.

^17-18 Uap-sambuh manusia re mungan, ka udip mirawa manusia re dog pirabur. Tibudo re rarap, ka TUHAN sadi adi re dog katuh di andu anŭ.

¹⁹ Daya re bisukan darŭm tāng di darŭd darŭd batuh, puan kah kareh rubang di tana yŭn mangān baji TUHAN ka bisukan so kuasa ngga bragah-I, kan Ayŭh mandŭg di ngugoh ong.

²⁰ Kan andu anŭ mandŭg, ngara re taran tibudo adi ngara ndai so mas ngga pirak, ka tingge-i yŭn babu ngga kadā.

²¹ Kan TUHAN mandŭg di ngugoh ong, daya re bisukan di rubang ngga tāng di darŭd darŭd batuh yŭn mangān baji-I ka bisukan so kuasa ngga bragah-I.

²² Dŭhnyah sabah manusia. Mating guna ngara?