ISAIAH 17 - Hakcipta - Biatah Bidayuh

Tapa re Ngukum Syria ngga Israel

¹ TUHAN nang, “Damascus re dŭh tia jadi kupo, pak re jadi tugung rakang tibawang.

² Kupo kupo di Syria re dog tagan situi tui. Kupo kupo anŭ re jadi tarun tana kupai yŭn biri ngga sapi, ka mating daya re kasig-i so nŭ.

³ Kuta Israel re rubuh, ka pritah Damascus re rubuh. Bara daya Syria anŭ adi gibabŭ udip re dog pimangŭh mun daya Israel. Aku, adi TUHAN Bisa-pŭrŭg, mbŭh minyu.”

⁴ TUHAN nang, “Andu-i re mandŭg kan bās Israel re mungan, ka kaya raja-i re manyap.

⁵ Israel re keya ka ŭmŭh di yŭn gandom muko dog ngatŭm, ka dog tingge mun ŭmŭh di rubān Rephaim kan-i mbŭh pinangŭh ngatŭm.

⁶ Nisŭ adŭ daya adi siramat, ka Israel re keya ka ndi tŭngŭn kanā adi so sopŭrŭg buwa-i dog sun, adŭ-i anŭ adi di tijuk-i, bait-i anŭ adi di daan sapang-i. Aku, TUHAN Tapa Israel, mbŭh minyu.”

⁷ Kan andu anŭ mbŭh mandŭg, daya re jiroh Pinapa ngara, adi Tapa kudus Israel, ka mite turung.

⁸ Ngara re dŭh tia bisangan di mija mija-sambah adi ngara mbŭh ndai ngga tangan adŭp ngara, puan kah sabah di pingandai adŭp ngara, anŭ inŭh tandā tandā pinatŭng tapa Asherah ngga mija-sambah yŭn badang kimanyan.

⁹ Kan andu anŭ mbŭh mandŭg, kuta kuta kupo adi bake re dog tagan ka dog tandah jadi tibawang, mun kupo kupo adi daya Hivi ngga daya Amor tagan darŭm ngara bu mangān daya Israel.

¹⁰ Israel, angān mbŭh kambŭt Tapa adi pirupas angān ka adi mun darŭd batuh grindung angān. Tanŭ ka angān purun teya pirapu' ngga angān nyambah tapa saruh.

¹¹ Pak sunggu-i rasu timbu ka bisera bait kani di andu angān purun-i, pingatŭm babŭ gŭh re mating. Kaŭs-i pinyusah ngga andam adi dŭh tikuri adŭ adi re angān kinyam.

Rais Pinganyu re Dog Ngarah

¹² Bangsa bangsa adi bikuasa guga ka dudu-i sak jawŭn girumbang bās di rawŭt.

¹³ Bangsa bangsa masang mun girumbang nyarab, pak Tapa nang ngara ka ngara ngundur, mun adi dog poh sabak di bŭngŭn sandah, mun siriyang darŭm sabak biriyung.

¹⁴ Singumi andu ngara ganas, pak ngga isan isan ngara miyap. Simŭnŭ inŭh nasip daya adi nyerang ka mirupak rais ta.